မဲခေါင်၊ ဇန်နဝါရီ ၁၀
တအာင်းတပ်မတော်ကို တပ်မဟာ ၉ ခု အဖြစ် တိုးချဲ့ပြင်ဆင်ပြီး အုပ်ချုပ်ရေးလုပ်ငန်းတွေ အဆင်ပြေချောမွေ့စေဖို့ မြို့ ၁၈ မြို့ပါဝင်တဲ့ ခရိုင် ၅ ခုကိုလည်း ပြင်ဆင်စုဖွဲ့သဘောတူခဲ့ကြတဲ့ TNLA က တော်လှန်ရေး အောင်ပွဲယူဖို့ အချိန်အခါကောင်းဖြစ်တယ်လို့ ဒီကနေ့ ထုတ်ပြန်ကြေညာပါတယ်။
လက်ရှိအချိန်ဟာ တိုင်းရင်းသား လက်နက်ကိုင်တော်လှန်ရေးအဖွဲ့အစည်းတွေနဲ့ နွေဦးတော်လှန်ရေးအင်အားစုတွေအားလုံး စုပေါင်းရုန်းကန်ပြီး တော်လှန်ရေးအရှိန်ကို အမြင့်ဆုံးလွှင့်တင်ပါက အောင်ပွဲရယူဖို့ အချိန်အခါကောင်းဖြစ်တယ်လို့ ဆိုပါတယ်။
ဖိအားအမျိုးမျိုးကြားမှ ရုန်းကန်နိုးထကြတဲ့ တော်လှန်ရေးအင်အားစုအသီးသီး နိုင်ငံတဝှမ်း နယ်မြေဒေသအသီးသီးမှာ ဘုံရန်သူကိုထိုးစစ်ဆင်တော်လှန်နေကြတာကြောင့် စစ်ကောင်စီဟာ သမိုင်းတွင်ကျဆုံးမှုတွေနဲ့ ဆက်တိုက်ကြုံတွေ့နေရတယ်လို့ ထုတ်ပြန်ချက်မှာ ဖေါ်ပြပါတယ်။
တအာင်းတပ်မတော် TNLA အနေနဲ့ တပ်မဟာ ၉ ခုအဖြစ် တိုးချဲ့ပြင်ဆင်ပြီး အုပ်ချုပ်ရေးလုပ်ငန်းတွေ အဆင်ပြေချောမွေ့စေဖို့ မြို့ ၁၈ မြို့ပါဝင်တဲ့ ခရိုင် ၅ ခုကိုလည်း ပြင်ဆင်စုဖွဲ့ သဘောတူညီခဲ့ကြပါတယ်။
၁၀၂၇ စစ်ဆင်ရေးမှာ ထိန်းသိမ်းရရှိထားတဲ့ မြို့ ၁၂ မြို့ အပါအဝင် တအောင်းတပ်မတော်အခြေစိုက်ထားတဲ့ နယ်မြေဒေသတွေကို လုံခြုံရေး၊ တရားဥပဒေစိုးမိုးရေး၊ ပညာရေး၊ ကျန်းမာရေးနဲ့ လူမှုဘဝဖွံ့ဖြိုးတိုးတက်ရေးကိစ္စတွေကို တာဝန်ခံမှုရှိစွာ ဦးဆောင်စီမံအုပ်ချုပ်သွားမှာဖြစ်ပြီး ဒေသခံမိဘပြည်သူတွေ ပါဝင်နိုင်တဲ့ လူထုအစိုးရ အမြန်ဆုံးပေါ်လာရန် ဆောင်ရွက်သွားမယ်လို့လည်း ထုတ်ပြန်ချက်မှာ ဖော်ပြထားပါတယ်။
တော်လှန်ရေးကာလအတွင်း အသက်ခန္ဓာ၊ နေအိမ်အဆောက်အအုံနဲ့ လုပ်ငန်းတွေ စွန့်လွတ်ပျက်ဆီးခဲ့ကြတဲ့ ပြည်သူတွေနဲ့ တအောင်းတပ်မတော် တပ်ဖွဲ့ဝင်အားလုံးကို ဘဝပြန်လည်ရှင်သန်ထူထောင်ရေး၊ လုံခြုံအေးချမ်းတဲ့ လူအဖွဲ့အစည်း တည်ဆောက်နိုင်ရန်အတွက် တအောင်းပြည်အတွင်း လူမျိုးပေါင်းစုံ ပြည်သူတွေနဲ့အတူ လက်တွဲတည်ဆောက်သွားမှာဖြစ်တယ်လို့ နှစ်ပတ်လည်အစည်းအဝေးမှာ သဘောတူခဲ့ကြပါတယ်။
တအာင်းပြည်ရှိ PSLF ယာယီဌာနချုပ်မှာ ပြီးခဲ့တဲ့ ဇန်နဝါရီ ၃ ရက်မှ ဇန်နဝါရီ ၇ ရက်အထိ ၅ ရက်ကြာ ကျင်းပပြုလုပ်ခဲ့တဲ့ နှစ်ပတ်လည်အစည်းအဝေးအပြီးမှာ အခုလို ထုတ်ပြန် ကြေညာလိုက်တာပါ။
၁၀၂၇ စစ်ဆင်ရေးအတွင်း TNLA က နမ့်ဆန်၊ မန်တုံ၊ နမ္မတူ၊ နမ့်ခမ်း၊ ကွတ်ခိုင်၊ ကျောက်မဲ၊ မိုင်းလုံ၊ မိုင်းငေါ့၊ မိုးမိတ်၊ မိုကုတ်၊ သီပေါနဲ့ နောင်ချို စတဲ့မြို့တွေကို တိုက်ခိုက်သိမ်းပိုက်ပြီး အုပ်ချုပ်ရေး၊ တရားဥပဒေစိုးမိုးရေးနဲ့ ပြန်လည်ထူထောင်ရေးတွေ လုပ်ဆောင်နေပါတယ်။
CJ-017
#MeKongNews
#TNLA
#နွေဦးတော်လှန်ရေး
#အောင်ပွဲဆင်
#တပ်မဟာ၉ခု
