မဲခေါင်၊ ဇန်နဝါရီ ၄
နိုင်ငံရေး အကျဉ်းသားများ ကူညီစောင့်ရှောက်ရေးအသင်း (အေအေပီပီ)စာရင်းအရ အကျဉ်းထောင်အသီးသီးမှာ ထောင်ချခံထားရဆဲ နိုင်ငံရေးအကျဉ်းသူ အကျဉ်းသား ၉၉၅၈ ဦးရှိတဲ့အထဲမှာမှာ စစ်ကောင်စီက ဒီကနေ့ ၆၀၀ ခန့်ကို လွတ်ငြိမ်းချမ်းခွင့် ပေးပါတယ်။
အဲဒီ လွတ်ငြိမ်း ၆၀၀ ထဲမှာ လွတ်ရက်စေ့တွေနဲ့ ရက်ပိုင်း လပိုင်းလွတ်ရက်နီးနေသူတွေ ပါဝင်တယ်လို့ သိရပေမယ့် အရေအတွက်နဲ့ ဘယ်သူဘယ်ဝါဆိုတာကိုတော့ မဲခေါင်ကအတည်ပြုနေဆဲဖြစ်ပါတယ်။
ပျမ်းမျှအားဖြင့် အဲဒီ ၆၀၀ ခန့်ဟာ ပုဒ်မ ၅၀၅ နဲ့ ထောင်သွင်းအကျဉ်းချခံရသူတွေဖြစ်ပြီး အဲဒီအထဲမှာ ကချင်ပြည်နယ်ဝန်ကြီးချုပ်(ဟောင်း) ဦးခက်အောင် ပါဝင်တယ်လို့ စစ်ကောင်စီရဲ့ ပြန်ကြားရေးဝန်ကြီးအဆင့်ရှိ ဇော်မင်းထွန်းက ပြည်တွင်းမီဒီယာတွေကို ဖြေကြားတာပါ။ လွတ်ငြိမ်းချမ်းသာခွင့်ထုတ်ပြန်ချက်မှာတော့ ပုဒ်မအလိုက် သီးခြားဖေါ်ပြတာမျိုး မရှိပါဘူး။
အေအေပီပီက ၂၀၂၅ ခုနှစ်၊ ဇန်နဝါရီ ၃ ရက်ထုတ်ပြန်ချက်မှာ မတရားအာဏာလုမှုဖြစ်စဉ်နဲ့ ဆက်စပ်ပြီး ဖမ်းဆီးခံခဲ့ရသူ စုစုပေါင်း ၂၈၀၉၆ ဦးရှိပြီး အဲဒီအထဲက ၂၁၄၉၉ ဦးဟာ ထိန်းသိမ်းခံနေရဆဲဖြစ်ပြီး ၉၉၅၈ ဦးမှာ ထောင်ဒဏ်ချမှတ်ခံထားရတယ်လို့ ဖေါ်ပြထားပါတယ်။
ဒီနေ့ (ဇန်နဝါရီလ ၄) ကျရောက်တဲ့ (၇၇) ကြိမ်မြောက်လွပ်လပ်ရေးနေ့ အထိမ်းအမှတ်အနေနဲ့ အကျဉ်းထောင်၊ အချုပ်ထောင်နဲ့ စခန်းအသီးသီးမှာ ပြစ်ဒဏ်ကျခံနေသူတွေထဲက ၅၈၆၄ ဦးကို လွတ်ငြိမ်းချမ်းသာခွင့်ပေးခဲ့တာပါ။ အဲဒီပမာဏထဲမှာမှ ပုဒ်မ ၅၀၅ နဲ့ အကျဉ်းကျခံနေရသူ ၆၀၀ ခန့် ပါတဲ့သဘော ဖြစ်ပါတယ်။
စစ်ကောင်စီရဲ့ ထုတ်ပြန်ချက်မှာ လူသတ်မှု၊ မုဒိမ်းမှု၊ ပေါက်ကွဲမှု၊ မတရားသင်း၊ လက်နက်မှုတွေ၊ မူးယစ်ဆေးဝါးမှု၊ သဘာဝဘေး၊ အကြမ်းဖက်နဲ့ အဂတိမှုတွေမှအပ တည်ဆဲ ဥပဒေအရပ်ရပ်မှ ပြစ်မှုတစ်ခုခုနဲ့ စပ်လျဉ်းပြီး ပြစ်ဒဏ်ချမှတ်ခံရကာ အကျဉ်းထောင်၊ အချုပ်ထောင် စခန်းအသီးသီးမှာ ပြစ်ဒဏ်ကျခံနေရတဲ့ အကျဉ်းသား၊ အကျဉ်းသူတွေကို ရာဇဝတ်ကျင့်ထုံးအရ ကျခံရန် ကျန်ရှိတဲ့ ပြစ်ဒဏ်က ၆ ပုံ ၁ ပုံ လွတ်ငြိမ်းသက်သာခွင့်ပြုတယ်လို့ ဖေါ်ပြပါတယ်။
စစ်ကောင်စီရဲ့ ထုတ်ပြန်ချက်အရဆိုရင် အာဏာလုဖြစ်စဉ်နဲ့ ဆက်စပ်နေတဲ့အထဲမှာ ပုဒ်မ ၅၀၅ နဲ့ ပြစ်ဒဏ်ကျခံနေရသူ ၆၀၀ သာပါဝင်ပြီး ပေါက်ကွဲမှု၊ မတရားအသင်းဆက်သွယ်မှု၊ အကြမ်းဖက်မှုလို့ စွဲချက်တင်ခံထားရတဲ့ အမှုတွေ မပါဝင်ပါဘူး။
ထောင်ဒဏ်တစ်သက်ချမှတ်ခံထားရသူ ၁၄၄ ဦးကို ထောင်ဒဏ် ၁၅ နှစ်လျှောချ ပြောင်းလဲလိုက်တယ်လို့ ထုတ်ပြန်ကြေညာပါတယ်။
ဒီ့အပြင် ထိုင်းနိုင်ငံသားနဲ့ အင်ဒိုနီးရှားနိုင်ငံသား ၁၈၀ ကိုလည်း ပြစ်ဒဏ်လွတ်ငြိမ်းခွင့်နဲ့ ပြည်နှင်ဒဏ်ပေးခဲ့တယ်လို့ ဖေါ်ပြထားပါတယ်။
ထိုင်းနိုင်ငံသားတွေဟာ တာချီလိတ်မြို့နယ်ဘက်မှာ လောင်းကစားမှုတွေနဲ့ပတ်သက်ပြီး ဖမ်းဆီးထိန်းသိမ်းထားသူများဖြစ်ကာ အင်ဒိုနီးရှားနိုင်ငံသားတွေဟာ မြန်မာ့ပင်လယ်ပြင်မှာ ငါးဖမ်းသင်္ဘောနဲ့ ဝင်ရောက်လာကြသူတွေဖြစ်တယ်လို့လည်း ဇော်မင်းထွန်းက ပြည်တွင်းမီဒီယာတွေကို ပြောပါတယ်။
MK-012
#MeKongNews
#လွတ်ငြိမ်းချမ်းသာခွင့်
#ပုဒ်မ၅၀၅
#၆၀၀လွတ်မြောက်
#ထိုင်းနဲ့အင်ဒိုနီးရှား
