မဲခေါင်၊ ဇန်နဝါရီ ၄
ရှမ်းပြည်တောင်ပိုင်း၊ ဖယ်ခုံမြို့နယ်၊ ပီကင်းရွာအနီးတဝိုက် ကျေးရွာတွေကို နှစ်လကျော်ကာလအတွင်း လေကြောင်းကနေ ဗုံး ၅၁ လုံး ကြဲချခဲ့တဲ့ စစ်ကောင်စီဟာ ပြည်သူလူထုအခြေအနေပျက်ပြားအောင် ၂၀၂၅ မှာ ပိုမိုလုပ်ဆောင်လာနိုင်တယ်လို့ IEC ရဲ့ အတွင်းရေးမှူး(၂)က ယူဆပါတယ်။
၂၀၂၄ ခုနှစ်၊ နိုဝင်ဘာလမှ ၂၀၂၅ ခုနှစ်၊ ဇန်နဝါရီ ၃ ရက်အထိ နှစ်လကျော်ကာလအတွင်း လေကြောင်းကနေဗုံး ၅၁ လုံးကြဲချခဲ့ရာမှာ ပြည်သူ နှစ်ဦး သေဆုံးပြီး သုံးဦး ဒဏ်ရာရရှိကာ နေအိမ် ကိုးလုံး ပြိုကျပျက်စီးခဲ့ပြီး ပတ်ဝန်းကျင် နေအိမ် လေးလုံး ဗုံးစထိမှန်တာကြောင့် အစိတ်အပိုင်းတချို့ ပျက်စီးကာ ဘာသာရေးအဆောက်အအုံတစ်ခုလည်း ပျက်စီးခဲ့ပါတယ်။
၂၀၂၅ ခုနှစ်၊ ဇန်နဝါရီ ၃ ရက်၊ ညနေ ၅ နာရီခွဲခန့်မှာ ပီကင်းအနီးနားက တဲနားရွာအနီးကို စစ်ကောင်စီက လေကြောင်းကနေ ဗုံးခြောက်လုံး ကြဲချတိုက်ခိုက်ပြီးနောက် ကင်းထောက်ဒရုန်းတွေဝေဟင်မှာ အချိန်ကြာကြာပျံဝဲခဲ့တယ်လို့ဒေသခံတွေကပြောပါတယ်။ အဲဒီတိုက်ခိုက်မှုမှာ ပြည်သူ ထိခိုက်မှု မရှိဘူးလို့ သိရပါတယ်။
“၂၀၂၅ ခုနှစ် အတွင်းမှာ ဗုံးကြဲတာတွေ၊ ထိုးစစ်ဆင်တာတွေ နေရာအနှံ့ ရှိနိုင်တယ်၊ အဓိကက လူထုတွေအတည်တကျ အခြေတကျနေလို့မရအောင်နဲ့ လူမှုစီးပွားရေး ပျက်အောင်လုပ်ပြီး အဲ့ဒီကနေတဆင့် သူတို့အင်အားကို ပြန်စုတာလုပ်ဖို့ရှိတယ်လို့မြင်တယ်” လို့ ကရင်နီကြားကာလ အုပ်ချုပ်ရေးကောင်စီ IEC ရဲ့ အတွင်းရေးမှူး( ၂) ဦးဗညားက မဲခေါင်ကိုပြောပါတယ်။
၂၀၂၄ ခုနှစ်၊ ဒီဇင်ဘာလ ၂၇ ရက်၊ ညနေ ၃ နာရီမှာ ပီကင်းဈေးအနီးကို ဗုံး နှစ်လုံးကြဲချတာကြောင့် ပြည်သူ နှစ်ဦးဒဏ်ရာရကာ လက်ဖက်ရည်ဆိုင် တစ်ဆိုင်၊ အပ်ချုပ်ဆိုင် တစ်ဆိုင်နဲ့ နေအိမ် လေးလုံး ပျက်စီးခဲ့ရပါတယ်။
၂၀၂၄ ခုနှစ်၊ ဒီဇင်ဘာ ၃ ရက် ၊ မနက်အစောပိုင်း ၃ နာရီခန့်မှာ ဆိုင်ခွန်ကျေးရွာအနီးကို လေယာဉ်နှစ်စီးနဲ့ ဗုံးအလုံး ၄၀ ကျော် ကြဲချတိုက်ခိုက်ခဲ့တာကြောင့် အသက် ၁၃ နှစ်အရွယ် နွားကျောင်းသား သေဆုံးခဲ့ရပြီး နေအိမ်အနည်းငယ်ပျက်စီးခဲ့ပါသေးတယ်။
၂၀၂၄ ခုနှစ်၊ နိုဝင်ဘာလ ၁၈ ရက်၊ နေ့လည် ၁၂ နာရီမှာ လအိကျေးရွာအနီးက ဘန်ကောက်စစ်ရှောင်စခန်းကို ဗုံး သုံးကြိမ် ကြဲခဲ့တာကြောင့် အသက် ၄၀ အရွယ်အမျိုးသမီး သေဆုံးပြီး စစ်ရှောင်စခန်းတစ်ခုလုံး ပြိုကျပျက်စီးခဲ့ရပါတယ်။
စစ်ကောင်စီက တိုက်ပွဲဖြစ်ပွားခြင်းမရှိဘဲ စစ်ရှောင်ပြည်သူတွေနဲ့ ဒေသခံတွေ ရှိရာနေရာတွေကို လေကြောင်းကနေ ဗုံးကြဲတိုက်ခိုက်တာတွေ တွင်တွင်ကျယ်ကျယ်ပြုလုပ်နေတာကြောင့် ပြည်သူတွေအထူးသတိထားနေထိုင်ကြဖို့ကိုလည်း တော်လှန်ရေးအင်အားစုတွေက တိုက်တွန်းထားပါတယ်။
စစ်ကောင်စီက ၂၀၂၄ ခုနှစ်စကနေ နှစ်ကုန်တဲ့အထိ တစ်နှစ်တာကာလအတွင်း လေကြောင်းကနေ ဗုံးကြဲတိုက်ခိုက်မှုပေါင်း ၇၈၁ ကြိမ်အထိပြုလုပ်ခဲ့ပြီး လက်နက်ကြီးနဲ့ ပစ်ခတ်တာ၊ ဒရုန်းနဲ့ဗုံးကြဲတာတွေကြောင့် အရပ်သားပြည်သူ ၇၉ ဦးသေဆုံးခဲ့ရပြီး နေအိမ် ၅၈၅ လုံး၊ ဆေးရုံဆေးခန်းနဲ့ စာသင်ကျောင်း ခု ခြောက်လုံးအထိ ပျက်စီးခဲ့ရတယ်လို့ တိုးတက်သောကရင်နီပြည်သူ့အင်အားစု PKPF က ဇန်နဝါရီလ ၁ ရက်က ထုတ်ပြန်ထားပါတယ်။
CJ-004
#MeKongNews
#ရှမ်းပြည်တောင်ပိုင်း
#ဖယ်ခုံမြိုနယ်
#ပီကင်းရွာတဝိုက်
#နစ်လကျော်အတွင်း
#ဗုံး၅၁လုံးကျော်ကြဲ
ပုံ။ ၂၀၂၄ခုနှစ်၊ ဒီဇင်ဘာလ ၂၇ ရက်က ပီကင်းဈေးအနီးဗုံးကြဲစဉ်က ပျက်စီးခဲ့တဲ့ပုံဟောင်း။
