မဲခေါင်၊ ဒီဇင်ဘာ ၂၁
ရှမ်းပြည်အရှေ့ပိုင်း၊ ‘ဝ’ဒေသ မိုင်းပေါက်မှာ လိုင်စင်ရ ပုဂ္ဂလိက ဆေးခန်းတွေ အများအပြားရှိနေပေမယ့် ဆေးကုသစရိတ်ကြီးမားတဲ့အပြင် ဆရာဝန်မဟုတ်သူတွေက ဆေးကုသနေတယ်လို့ ဒေသခံတွေဆီကသိရပါတယ်။
လိုင်စင်ရ ဆေးခန်းတွေမှာ ဆေးကုသခွင့် လက်မှတ်နဲ့ ဆရာဝန်လုပ်ပိုင်ခွင့်တွေကို ဆရာဝန်ကိုမပေးပဲ ဆရာဝန်မဟုတ်သူတွေက လုပ်စားနေတယ်လို့ ဒေသသတင်းဌာန Wa News Land က ကနေ့ (ဒီဇင်ဘာ၂၁) ဖော်ပြလာပါတယ်။
“ကျနော် ဆေးခန်းပြတာ ဆရာဝန်မဟုတ်တဲ့တစ်ယောက်က တစ်နေရာကို ဖုန်းဆက်မေးပြီး ဆေးပေးတာ၊ ဆရာဝန်လည်းမဟုတ်၊ သူနာပြုလည်းမဟုတ်၊ ကုန်တာကတော့ ယွမ် ၂၀၀ တောင် တောင်းတာ” လို့ ကိုယ်တိုင်ဆေးခန်းပြခဲ့သူတစ်ဦးက မဲခေါင်ကို ပြောပါတယ်။
သူ့အနေနဲ့ မိတ်ဆွေတစ်ဦး လမ်းညွှန်ချက်အရ ကျိုင်းတုံမှာ သွားရောက်ဆေးကုသခဲ့ရာ ကျပ်ဆယ်သိန်း(၁၀သိန်းကျပ်)ကျော်သာ ကုန်ကျပြီး မိုင်းပေါက်မှာဆိုရင် ကျပ်သိန်းငါးဆယ်(သိန်း၅၀ကျပ်)ကုန်ကျမယ်လို့ ပြောပါတယ်။
အလားတူ ပန်ဆန်း(ပန်ခမ်း) ဘက်မှာလည်း ဆရာဝန်မရှိဘဲ ဖွင့်ထားတဲ့ ဆေးခန်းတွေ ရှိနေတယ်လို့ WNL မှာ ပါရှိပါတယ်။
‘ဝ’ ဒေသက ပြန်လာတဲ့ အမည်မဖော်လိုသူ ဆေးဝန်ထမ်းတစ်ဦးရဲ့ ပြောကြားချက်အရ မိုင်းပေါက်မြို့မှာ အနောက်တိုင်းထုတ်ဆေးဝါးရောင်းချခွင့် လိုင်စင်တွေကို ချမပေးသလို မြန်မာဆေးခန်းနဲ့ တရုတ်ဆေးခန်းကြား အာဏာပိုင်တွေရဲ့ ခွဲခြားဆက်ဆံမှုတွေ ရှိနေပါတယ်။
“ကုသစရိတ်လည်း များတယ်၊ ဆေးကုပေးချင်တာတောင် ကုသခွင့်မရတဲ့အခြေအနေဆိုတော့ လူနာတွေဘက်က ကုသမှုနဲ့ပတ်သက်ပြီး ဆိုးကျိုးတွေ ခံစားနေရတာပေါ့” လို့ အဲ့ဒီဆေးဝန်ထမ်းက ပြောပါတယ်။
WNL ရဲ့ ဖော်ပြချက်မှာတော့ “ဝ” ပြည်နယ် အုပ်ချုပ်ရေးအနေနဲ့ မြန်မာ၊ တရုတ် ပုဂ္ဂလိက ဆေးခန်းတွေရဲ့ လက်ရှိမြေပြင် အခြေအနေတွေကို သေချာစီစစ်ပေးစေလိုပြီး မူဝါဒ ပြဌာန်းချက်နဲ့ မကိုက်ညီတဲ့ ဆေးခန်းတွေကို ထိထိရောက်ရောက် အရေးယူစေလိုကြောင်း သတင်းအရင်းအမြစ်က ပြောတယ်လို့ ဖေါ်ပြထားပါတယ်။
MK-012
#ဝဒေသ
#မိုင်းပေါက်
#ဆေးကုသ
#ဆရာဝန်မဟုတ်သူ
#ကုသစရိတ်ကြီး
#ကျိုင်းတုံ
