မဲခေါင်၊ နိုဝင်ဘာ ၂၆
ထိုင်းတပ်မတော် တပ်မဟာ ၃ နယ်မြေနဲ့ မြန်မာဘက်ခြမ်းရှမ်းအရှေ့ပိုင်း မယ့်ဟောင်ဆန်ဒေသအနီး ထိုင်း တော်ဝင်နယ်ခြားစောင့်တပ်နဲ့ “၀” ပြည် သွေးစည်းညီညွှတ်ရေး တပ်မတော် (UWSA) တို့ နယ်မြေအငြင်းပွားမှုကြောင့် စစ်ရေးတင်းမာနေတယ်လို့ သတင်းတွေ ထွက်ပေါ်ခဲ့ပေမယ့် ထိုင်းတပ်ချုပ် ဗိုလ်ချုပ် ပါနာကလူးပလော့တက်က ဒေသခံတွေကို စိုးရိမ်စရာအခြေအနေမရှိသေးကြောင်း ပြောရေးဆိုခွင့်ရှိသူကနေ နိုဝင်ဘာ ၂၆ ရက်မှာ အသိပေးထုတ်ပြန်ခိုင်းခဲ့ပါတယ်။
နိုဝင်ဘာ ၂၅ ရက်နေ့က ထိုင်းဘက်က UWSA တပ်စခန်းချထားတဲ့ နယ်မြေ ၇ ခုဟာ ထိုင်းပိုင်နက်ထဲ ရောက်နေလို့ ဒီဇင်ဘာ ၁၈ ရက်မတိုင်ခင် အပြီး နောက်ဆုတ်ထွက်ခွာဖို့ ဖိအားပေးလာမှုကြောင့် UWSA ဘက်က ဒီစခန်း တွေဟာ ထိုင်းပိုင်နက်လုံး၀မဟုတ်တဲ့အတွက် ဖယ်ပေးဖို့ အကြောင်းမရှိကြောင်း တုံ့ပြန်ခဲ့လို့ နှစ်ဖက်တပ်တွေ ဟာ ဒီဒေသမှာ ဟောင်ဝစ်ဇာတွေနဲ့ လက်နက်ကြီးတွေ အပြန်အလှန်တပ်ဆင် အသင့်ပြင်ထားလို့ တင်းမာမှု အမြင့်ဆုံး အခြေအနေရောက်နေကြောင်း UWSA ဘက်က ပြောဆိုကြောင်း RFA က ရေးသားဖော်ပြသွားပါတယ်။
ဒါကြောင့် မယ့်ဟောင်ဆန်၊ ဒွိုင်ဟာမာ၊ နောင်လျန်ဒေသ အခြေစိုက်ထားတဲ့ နှစ်ဖက်တပ်တွေကြားမှာ ပြည်သူတွေ အထိတ်တလန့်ဖြစ်နေလို့ ထိုင်းတပ်ချုပ်ဟာ နိုဝင်ဘာ ၂၆ ရက် ညနေပိုင်းမှာ စာထုတ်ပြန်ပြီး နှစ်ဖက်တပ် တွေ တိုက်ပွဲဖြစ်ပွားတဲ့အထိ အန္တရာယ်ရှိတဲ့အခြေအနေမဟုတ်ကြောင်း ထိုင်းတပ်မတော်ပြောရေးဆိုခွင့်ရှိသူ ဗိုလ်မှူးကြီး သီရတ်ဆွန်ဘက်ဆရီက ထုတ်ပြန်သွားကြောင်း ထိုင်း Khaosod မီဒီယာက ဖော်ပြသွားပါတယ်။
ဒီသတင်ဖော်ပြမှုမတိုင်ခင် နာရီပိုင်းကပဲ ထိုင်း Thai Enquirer မီဒီယာကလည်း ထိုင်း ဒုတိယဝန်ကြီးချုပ် ဖမ်သမ်ဝီချာယာချိုင်က နှစ်ဖက်စလုံး လက်နက်ကိုင်တပ်ဖွဲ့တွေဖြစ်လို့ နှစ်ဖက် အပြန်အလှန်ပြင်ဆင်ထားမှု တွေရှိတာသာဖြစ်ပြီး WUSA ဘက်ကလည်း နယ်မြေထပ်တိုးပြီး ဝင်လာတာမရှိသလို ပြဿနာရင်းမြစ်ကလည်း နှစ်ပေါင်းများစွာကတည်းက တည်ရှိနေခဲ့တာဖြစ်လို့ သံတမန်နည်းနဲ့သာ ဆွေးနွေးပြောဆိုသွားမှာဖြစ်တယ်လို့ ဆိုပါတယ်။
ဒေသတွင်း တည်ငြိမ်အေးချမ်းစွာ ရှိနေသေးပြီး စစ်ကောင်စီ နိုင်ငံခြားရေးဝန်ကြီးဆီ ဒီအရေး အကြောင်းကြားခဲ့ပေမယ့် ပြည်တွင်းရေး ပဋိပက္ခကြောင့် ဒီအရေးကို စစ်ကောင်စီဘက်က ဖြေရှင်းပေးနိုင်ဦးမှာမဟုတ်ဘူးလို့ တုံ့ပြန်ခဲ့ကြောင်း ရေးသားဖော်ပြသွားပါတယ်။
Ref: Thai Enquirer and Khaosod
MKF-001
#MeKongNews
#မယ်ဟောင်ဆောင်
#စစ်ရေး
#တင်းမာ
#UWSA
#စစ်ကောင်စီ
#သံတမန်
#ဝ
