မဲခေါင်၊ နိုဝင်ဘာ ၂၃
ကရင်နီပြည်၊ ဒီးမော့ဆိုမြို့နယ်၊ ချယ်ရီကုန်းရှိ လူနေအိမ်နဲ့ စစ်ဘေးရှောင်စခန်းတွေကြားမှာ ဖွင့်လှစ်ထားတဲ့ KTV တွေကြောင့် လေကြောင်းအန္တရာယ် ကျရောက်မှာကိုဒေသခံတွေက စိုးရိမ်နေကြပါတယ်။
ညအချိန်မတော် KTV ကထွက်ပေါ်လာတဲ့မီးစက်သံ၊ သီချင်းသံတွေဟာ အိပ်ရေးပျက်တာ၊ နာတာရှည်ရောဂါသည်တွေအတွက် စိတ်အနှောင့်အယှက်ဖြစ်တာတွေအပြင် စစ်ကောင်စီရဲ့ ဗုံးကြဲလေယာဉ်သံကိုပါ မကြားနိုင်တဲ့အထိ ကျယ်လောင်လွန်းတယ်လို့ ဒေသခံတချို့က ပြောပါတယ်။
လေယာဉ်သံမကြားရတဲ့အခြေအနေမို့ ကြိုတင်ရှောင်ရှားခိုအောင်းချိန်မရပဲ ဗုံးကြဲခံရမှာကိုစိုးရိမ်နေကြတာဖြစ်ပါတယ်။
“ည တစ်နာရီ ၂ နာရီအထိဆိုတော့ လွန်လွန်းတယ်လေ၊ အကုန်လုံး အိပ်နေတဲ့ အချိန်ဆို အသံက ဟိန်းနေတာပဲ၊ လာတဲ့သူတွေကလည်း ဟေးလားဝါးလား အော်လားဟစ်လားနဲ့၊ လွတ်မြောက်နယ်မြေမှာမို့ပဲ တော်သေးတယ်” လို့ ချယ်ရီကုန်းဒေသတွင်း ခိုလှုံနေသူ အမျိုးသားတစ်ဦးက ပြောပါတယ်။
KTV တွေကို ကရင်နီပြည်ကြားကာလ အုပ်ချုပ်ရေးကောင်စီ (IEC) အပါအဝင် တော်လှန်ရေးအင်အင်းစု အဖွဲ့အစည်းတွေရဲ့ ခွင့်ပြုချက်နဲ့ ဖွင့်လှစ်ထားဖြစ်ပြီး ရဲဘော်တွေ ကိုယ်တိုင်သွားရောက်ပျော်ပါးနေတာ၊ ကမ်ပိုင်းစုဝေးတာတွေလည်း မြင်တွေ့နေရတယ်လို့ဆိုပါတယ်။
“ရဲဘော်တွေကိုယ်တိုင် ပါဝင်နေတော့ ပိုဆိုးတာပေါ့၊ ဒီကာလမှာရှိသင့်တယ် မရှိသင့်ဘူးဆိုတာထက် ထိန်းထိန်းသိမ်းသိမ်းလေး ဖြစ်စေချင်တာပါ၊ ကိုယ့်ဖက်က အရင်လိုက်နာမှ ပြည်သူတွေလည်း လိုက်နာမှာပါ” လို့ တော်လှန်ရေး အဖွဲ့စည်းတစ်ခုရဲ့ မြေပြင်တပ်ဖွဲ့ဝင်တစ်ဦးက ပြောပါတယ်။
ချယ်ရီကုန်းက KTV တွေကို IEC နဲ့တော်လှန်ရေးအဖွဲ့အစည်းတွေရဲ့ ခွင့်ပြုချက်နဲ့ ဇူလိုင်လပိုင်းမှာ စတင်ဖွင့်လှစ်ခဲ့ကြတာဖြစ်ပြီး အောက်တိုဘာလပိုင်းမှာ ဆိုင်ရှင်တွေဖက်က စည်းကမ်းမလိုက်နာမှုတွေကြောင့် ပိတ်သိမ်းခဲ့ရပါတယ်။
အဲဒီနောက် နိုဝင်ဘာလအတွင်းမှာ ဆိုင်ရှင်တွေဖက်က ညှိနှိုင်းတောင်းဆိုမှုနဲ့အတူ ပြည်သူ့အုပ်ချုပ်ရေး အဖွဲ့ဝင်တွေဖက်က စည်းကမ်းသစ်တွေ ချမှတ်ပြီး ပြန်လည်ဖွင့်လှစ်ခွင့် ပြုခဲ့တာပါ။
IEC ဖက်က KTV တွေကို ညအချိန်မတော်အထိ မဖွင့်လှစ်ကြဖို့နဲ့ WY, ICE, K စတဲ့ မူးယစ်ဆေးတွေ မသုံးစွဲကြဖို့ ချမှတ်ထားပေမယ့်လက်တွေ့မြေပြင်မှာတော့ ဆိုင်ရှင်တွေဖက်က လိုက်နာမှုမရှိသေးပါဘူး။
လတ်တလောအခြေနေတွေနဲ့ပါတ်သက်ပြီး IEC ရဲ့တစ်စုံတရာပြောဆိုမှုရရှိဖို့အတွက် မဲခေါင်ကဆက်သွယ်ခဲ့ပေမယ့် ဆက်သွယ်လို့မရပါဘူး။
ချယ်ရီကုန်းမှာ KTV စတင်ဖွင့်လှစ်စဉ်က လေးဆိုင်ခန့်သာ ရှိခဲ့ပေမယ့် IEC ရဲ့ ညှိနှိုင်းမှုအပြီးမှာတော့ ၁၀ ခုအထိ တိုးလာပြီး အရင် ငြိမ်းချမ်းစဉ်ကာလတုန်းက လွိုင်ကော်မြို့မှာ ဖွင့်လှစ်ထားတဲ့ KTV အရေအတွက် ပိုများတယ်လို့ စုံစမ်းသိရပါတယ်။
ဖွင့်လှစ်ထဲထားတဲ့ KTV တွေထဲက တချို့ဆိုင်တွေဟာ တော်လှန်ရေးအဖွဲ့အစည်းတွေနဲ့ ပတ်သက်မှု ရှိတယ်လို့ ပြောဆိုနေကြပေမယ့် ခိုင်လုံတဲ့အတည်ပြုချက်မရသေးသလို အဖွဲ့အစည်းတွေရဲ့တာဝန်ရှိသူတွေလည်း မီဒီယာတွေကို ငြင်းဆိုတာမျိုး မတွေ့ရသေးပါဘူး။
MK-14
#MeKongNews
#ကရင်နီပြည်
#ဒီးမော့ဆိုမြို့နယ်
#ချယ်ရီကုန်း
#KTV
#ဆူညံသံ
#လေကြောင်းအန္တရာယ်
#စိုးရိမ်နေရ
