မဲခေါင်၊ နိုဝင်ဘာ ၁၆
ကယန်းအမျိုးသားတပ်မတော်(KNA)က ရှမ်းပြည်တောင်ပိုင်းနဲ့ ကရင်နီနယ်စပ်၊ ဖယ်ခုံဒေသက တိုက်ပွဲတွေမှာ တော်လှန်ရေးပူးပေါင်းတပ်ဖွဲ့တွေနဲ့အတူ ပါဝင်တိုက်ခိုက်နေပြီဖြစ်တယ်လို့ KNA ရဲ့ ပြောရေးဆိုခွင့်ရှိသူ ခွန်းဆောင်ဒူက မဲခေါင်သတင်းဌာနကို ပြောပါတယ်။
မိုးဗြဲမှာ မိုးဗြဲ PDF၊ ဒီးမော့ဆို PDF၊ KND နဲ့အတူ KNAက ပူးပေါင်းတိုက်ပွဲဝင်နေသလို ဖယ်ခုံဘက်မှာလည်း ဖယ်ခုံ PDF၊ အင်းလေး PDF၊ KNDFတပ်ဖွဲ့တွေနဲ့အတူ KNA က ပူးပေါင်းပြီး စစ်ရေးဖော်ဆောင်နေတာလည်း ရှိတယ်လို့ သိရပါတယ်။
“အရင်ကတည်းက ပါဝင်လုပ်ဆောင်နေတာတွေတော့ ရှိခဲ့တယ်။ ဒါပေမယ့် KNA နာမည်နဲ့တော့ မဟုတ်ခဲ့ဘူးပေါ့။ အခုကတော့ KNA အနေနဲ့ ထဲထဲဝင်ဝင် ပါဝင်ပြီးတော့ တိုက်ပွဲတွေမှာ ပါဝင်နေပြီလို့ အသိပေးချင်ပါတယ်” လို့ ခွန်းဆောင်ဒူက မဲခေါင်သတင်းဌာနကို ပြောပါတယ်။
စစ်ကောင်စီက ပင်လောင်း-ဖယ်ခုံလမ်းကို ဒေသခံတွေ သွားလာဖြတ်သန်းခွင့်ပိတ်ပင်ကာ ပင်လောင်းကနေ ဖယ်ခုံကို အင်အား ၅၀၀ ခန့် စစ်ကူပို့ဆောင်နေသလို ဖယ်ခုံကနေ မိုးဗြဲကိုဆင်းဖို့ စစ်ကြောင်း လှုပ်ရှားနေတာကြောင့် တိုက်ပွဲတွေ ပြင်းထန်နေတယ်လို့ သိရပါတယ်။
စစ်ကောင်စီတပ်ကို တိုက်ခိုက်ရန် လွိုင်ကော်၊ ဒီးမော့ဆို၊ မိုးဗြဲ၊ ဖယ်ခုံမြို့နဲ့ ကယန်းဒေသတွေရှိ ပြန့်ကြဲနေတဲ့ကယန်းလက်နက်ကိုင်တပ်ဖွဲ့တွေကို တစ်စုတစ်စည်းတည်း ပြန်လည်ပေါင်းစုပြီးကယန်းအမျိုးသား တပ်မတော်(KNA)ကို အောက်တိုဘာလ ၂၉ ရက်က စတင်ဖွဲ့စည်းခဲ့တာဖြစ်သလို လက်ရှိမှာတော့ တိုက်ပွဲတွေမှာ ပါဝင်နေပြီဖြစ်တယ်လို့ သိရပါတယ်။
ကယန်းအမျိုးသားတပ်မတော်(KNA)အနေနဲ့ လူမျိုးတမျိုး၊ အစုအဖွဲ့တခုအတွက် တိုက်ခိုက်ဖို့ရည်ရွယ်ပြီးတော့ ဖွဲ့စည်းလိုက်တာမဟုတ်ဘဲ ညီညွတ်ရေးနဲ့ ပေါင်းစည်းရေးမူကိုပဲ ဦးတည်ဆောင်ရွက်သွားမှာဖြစ်ပြီး ကယန်းဒေသအတွင်းရှိ တော်လှန်ရေးမှာ ဦးဆောင် ပါဝင်နေတဲ့ ပုဂ္ဂိုလ်တွေနဲ့ ကော်မတီတရပ် ဖွဲ့စည်းကာ စုပေါင်းဦးဆောင်မှုနဲ့ ချီတက်သွားမှာဖြစ်တယ်လို့လည်း ခွန်းဆောင်းဒူက ဆိုပါတယ်။
ဓာတ်ပုံ-KNA
CJ-003
#MekongNews
#KNA
#တော်လှန်ရေးနဲ့ပူးပေါင်း
#ရှမ်းတောင်
#ကရင်နီအစပ်
