မဲခေါင်၊ နိုဝင်ဘာ-၁၃
ရှမ်းပြည်တောင်ပိုင်း၊ ဖယ်ခုံမြို့နယ် မြောက်ဘက်ခြမ်းက ပူချယ်ရွာမှာ စပါးရိတ်သိမ်းနေသူတွေနဲ့ စစ်ရှောင်တွေကို နိုဝင်ဘာ ၁၁ ရက်မှာ စစ်ကောင်စီက စစ်ကား ခုနှစ်စီးနဲ့ လာရောက်ခေါ်ဆောင်သွားတယ်လို့ မဲခေါင်က စုံစမ်းသိရပါတယ်။
KNDFရဲ့ ထုတ်ပြန်ချက်မှာတော့ လယ်ရိတ်ဖို့ပြင်ဆင်နေတဲ့ ပြည်သူ ၂၀၀ ဝန်းကျင်ကို စစ်ကောင်စီတပ်က ဖမ်းဆီးသွားတယ်လို့ ဖေါ်ပြထားပါတယ်။
လယ်ရိတ် ပြည်သူ ၂၀၀ ဝန်းကျင်ကို စစ်ကောင်စီတပ်နဲ့ PNO ပြည်သူ့စစ်က ဖမ်းဆီးသွားပြီး ပင်လောင်း ဘောလုံးကွင်းထဲမှာ စုစည်းထားရှိတယ်လို့ KNDF ထုတ်ပြန်ပါတယ်။
မဲခေါင်စုံစမ်းသိရှိချက်အရ ဖမ်းဆီးခံရသူ အမျိုးသမီး၊ အမျိုးသားတွေကို ပူချယ်ရွာဘုန်းကြီးကျောင်းမှာ စုစည်းထားပြီး စစ်ကားနဲ့ လာခေါ်သွားတယ်လို့ သိရတာပါ။
စစ်ကောင်စီတပ်တွေက ပင်လောင်း-ဖယ်ခုံကြားမှာရှိတဲ့ နန့်ဖာမူ၊ ပင်စုံ၊ လွယ်ကြိုင်း၊ ကုန်းပေါ၊ ဗန်းမောက်ကျေးရွာတွေနဲ့ ဖယ်ခုံမြို့ပေါ်က နေအိမ်တွေကို မီးရှို့ဖျက်ဆီးတာ၊ လယ်တွေရိတ်သိမ်းတာ၊ တန်ဖိုးကြီးပစ္စည်း ခိုးယူတာတွေကို ပြုလုပ်နေတယ်လို့ မြေပြင်သတင်းအရ သိရပါတယ်။
ပြီးခဲ့တဲ့ နိုဝင်ဘာလ ၉ ရက်ကလည်း ပင်လောင်းမြို့နယ်၊ ဗန်းမောက်ကျေးရွာအစွန်နားက အသက် ၁၈ နှစ်ကနေ ၄၀ ကြားရှိတဲ့ အမျိုးသားတွေကို နေရပ်ပြန်နေဖို့ ဖိအားပေးပြီး ၁၀ ရက်နေ့က ဖမ်းဆီးခေါ်ဆောင်ကာ စစ်မှုထမ်းခိုင်းဖို့ သင်တန်းပေးတာတွေ လုပ်နေတယ်လို့ ဒေသခံတွေကတဆင့် သိရပါတယ်။
စစ်ကောင်စီတပ်က အသက်အလတ်ပိုင်း အမျိုးသားတွေကို ပေါ်တာဆွဲနေပြီး စစ်ကြောင်းထိုးရာလမ်းတလျှောက်နဲ့ စစ်ဖြစ်ပွားရာဒေသက ပြည်သူတချို့ကို သတ်ဖြတ်တာတွေကိုလည်း တွင်တွင်ကျယ်ကျယ် ပြုလုပ်နေပေမယ့် အင်တာနက်အခက်အခဲကြောင့် ဘယ်နှယောက်သတ်ဖြတ်ခံရလဲ အတိအကျသိရဖို့ စုံစမ်းနေဆဲဖြစ်ပါတယ်။
CJ-004
#MekongNews
#ဖယ်ခုံမြို့နယ်
#ပူချယ်ရွာ
#ဒေသခံ၂၀၀ဝန်းကျင်
#စစ်ကောင်စီဖမ်းဆီး
