မဲခေါင်၊ အောက်တိုဘာ ၁၇
တအာင်းအမျိုးသားလွတ်မြောက်ရေးတပ်မတော် (TNLA) ထိန်းချုပ်ထားတဲ့ မိုးမိတ်မြို့မှာ တိုက်ပွဲအတွင်း ပျက်စီးသွားတဲ့နေအိမ်တွကြောင့် ဒေသခံတွေ နေရပ်မပြန်နိုင်ကြသေးဘူးလို့ သိရပါတယ်။
“မြို့ထဲမှာတော့ အိမ်တွေအများကြီးမီးလောင်ထားလို့ တော်တော်များများပြန်မလာကြသေးဘူး။ လက်ခုပ်တန်း ရပ်ကွက်မှာအများကြီးအရှို့ခံထားရတာ။ တချို့ကြလည်းနေစရာ အိမ်မရှိတော့လို့ ပြန်မလာကြတာ” လို့ မြို့ခံအမျိုးသမီးတစ်ဦးက ပြောပါတယ်။
မိုးမိတ်မြို့မှာမြို့သိမ်းပြီး ၂ လကျော်ကြာအထိ မြို့နေလူထု တစ်ဝက်လောက်သာ နေရပ်ကို ပြန်လာနိုင်သေးတယ်လို့ ဆိုပါတယ်။
“မြို့က နှစ်ခါတောင်စစ်ဖြစ်ထားတော့ တစ်ချို့ကြလည်းကြောက်ပြီး ပြန်မလာကြသေးတာ၊ တစ်ချို့ကြလည်း နေစရာမရှိလို့ ပြန်မလာကြတာ” လို့ မြို့ခံတစ်ဦးကပြောပါတယ်။
လက်ရှိ မိုးမိတ်မြို့မှာ ဖုန်းလိုင်း၊ အင်တာနက်လိုင်းများနဲ့ လျှပ်စစ်မီးများ ပြတ်တောက်နေပြီး တစ်နာရီ နှစ်ထောင်နဲ့ အသုံးပြုလို့ရတဲ့ starlink wifi (ဂြိုလ်တုအင်တာနက်) ဆိုင်များလည်း ဖွင့်လှစ်ထားတာတွေ့ ရပါတယ်။
ရှမ်းပြည်မြောက်ပိုင်းမှာရှိတဲ့ မိုးမိတ်မြို့မှာ ၂၀၁၄ သန်းခေါင်စာရင်းအရ လူဦးရေ ၆ သောင်းကျော် ရှိပြီး ကချင်၊ ပလောင်၊ ရှမ်းနဲ့ ဗမာ တိုင်းရင်းသားတွေ နေထိုင်ကြပါတယ်။
KIA နဲ့ PDF ပူးပေါင်းတပ်က ပြီးခဲ့တဲ့ ဇန်နဝါရီ ၁၈ မှာ မိုးမိတ်မြို့ရှိ စစ်ကောင်စီတပ်ကို ထိုးစစ်ဆင်ခဲ့တာဖြစ်ပြီး ဇန်နဝါရီ ၂၅ မှာ မြို့ကို ယာယီထိန်းထားတဲ့ KIA နဲ့ PDF ပူးပေါင်းတပ်များက တပ်ဆုတ်ခွာသွားပြီးနောက် စစ်ကောင်စီများက မြို့ထဲကိုပြန်လည် ဝင်ရောက်ထိန်းချုပ်ခဲ့တာ ဖြစ်ပါတယ်။
KIA နဲ့ PDF ပူးပေါင်းတပ်များက မိုးမိတ်မြို့မှ တပ်ဆုတ်ပြီနောက် ၁၀၂၇ ဒုတိယပိုင်း ဇွန်လ ၂၅ မှစပြီး TNLA နဲ့ ပူးပေါင်းတပ်များက မိုးမိတ်မြို့ရှိ စစ်ကောင်စီကို တစ်ဖန် ထိုးစစ်ဆင်တိုက်ခိုက်ခဲ့ရာ ဇူလိုင်လ ၃၁ မှာ မိုးမိတ်မြို့ကို အပြီးသတ် သိမ်းပိုက်ရရှိခဲ့တာ ဖြစ်ပါတယ်။
MK – 016
