မဲခေါင်၊ စက်တင်ဘာ ၂၁

ရှမ်းအရှေ့၊ မိုင်းဆတ်၊ မိုင်းတုံခရိုင်အတွင်းက တရားမဝင် ရွှေတူးဖော်မှုတွေမှာ ရေချောင်းတွေကို တားဆီးပြီး ရေလှောင်တမံတွေလုပ်ဆောင်ခဲ့တာ​ကြောင့် ရေကြီးရေလျှံတာကို ပိုမိုဆိုးရွားစေခဲ့တယ်လို့ ဒေသခံ​တွေကဝေဖန်ပြောဆိုနေကြပါတယ်။

ပြီးခဲ့တဲ့ ယာဂီမုန်တိုင်းတိုက်ခတ်မှုရဲ့နောက်ဆက်တွဲ ရေကြီးရေလျှံမှုမှုမှာ တောင်ကျချောင်း​တွေမှာ တရားမဝင်ရွှေသတ္တုတူးဖော်မှုတွေရဲ့ ပရမ်းပတာတူးဖော်တာ၊ မြေစာအစုအပုံ​တွေ၊ ဆည်ဖို့ လုပ်ဆောင်မှု​တွေ၊ သစ်ခုတ်ယူမှုတွေကြောင့် ပိုမိုဆိုးရွားစွာ ရေဘေးဒဏ်သင့်ရတာလို့ ဒေသခံတွေကပြောကြပါတယ်။

“ချောင်းတွေတစ်လျှောက် လုပ်ကွက်တွေက အများကြီးဘဲ မြေစာပုံကြီးတွေ၊ တမံတုတ်ထားတာတွေက ရေစီးကြောင်းပြောင်းတာတွေ ဖြစ်စေတဲ့အပြင် တောင်ကျရေတွေက ဆည်တွေပါကျိုးပြီး ရေအားပိုကြီးတော့ဖျက်ဆီးအား ပို ကောင်းသွားတာ၊ တရားမဝင်ဆိုတော့ ဘာမှ တာဝန်ယူတာမရှိဘူး၊ ပိုက်ဆံရပြီးရော ခွင့်ပြုပေးတဲ့သူတွေကလဲ ဘာမှလုပ်မပေးနိုင်ဘူး၊ ပြည်သူပဲခံရတာ”လို့ မိုင်းဆတ် ​ဒေသခံ၁ဦးက မဲခေါင်သတင်းဌာနကိုပြောပါတယ်။

ပြီးခဲ့တဲ့ ရေကြီးရေလျှံမှုအတွင်း မိုင်းဆတ်-တာချီလိတ် ကားလမ်းက အဓိက ဆိုက်ခေါင်၊ နမ့်ကျန်းတံတားတွေကျိုးကျတာ၊ လွယ်ဆမ်ဆုံ​တောင်တက်ကားလမ်းပျက်စီးတာတွေအပါ မိုင်းဆတ် မြို့မစျေး
ရေဝင်လို့ ဆိုင်တွင်းကုန်ပစ္စည်းအားလုံးလိုလို ပျက်စီးရတာအပြင် နမ့်ဆွမ်ချောင်းရေဝင်လို့ နေအိမ်အများအပြား ထိခိုက်ခဲ့ရတယ်လို့ သိရပါတယ်။

လက်ရှိမှာ ကုန်စည်တွေ စျေးတင်မရောင်းဖို့နဲ့ ကျောင်းသား​တွေကျောင်းတက်နိုင်ဖို့ တံတားတွေကို ဖြတ်သန်းနိုင်အောင် ပြုလုပ်ထားပေးပြီး “ဝ”တပ်ဖွဲ့က ပူးပေါင်းပြင်ဆင်နေတယ်လို့ သိရပါတယ်။

မိုင်းဆတ် က နမ့်ခုတ်၊ နမ့်ဆင်းချောင်းတွေမှာ ရွှေလုပ်ကွက်အများအပြားကို နယ်မြေခံစစ်တပ်က ​ဌာနေပြည်သူ့စစ်အဖွဲ့တွေနဲ့ တရုတ်လူမျိုးအများအပြားကိုလုပ်ခွင့်ပေးထားတာဖြစ်ပြီး ရေချောင်းတွေဟာ
“ဝ”တောင်ပိုင်းနယ်မြေတွေကိုဖြတ်သန်းစီးဆင်းပြီး တာချီလိတ်၊ မယ်ဆိုင်ချောင်းရေထဲစီးဝင် ကြတာဖြစ်ပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)