မဲခေါင်၊ စက်တင်ဘာ ၁၉
တာချီလိတ်မြို့ကနေ ထိုင်းနိုင်ငံ မယ်ဆိုင်မြို့ဘက်ကို တစ်ပါတ်စာ ယာယီနိုင်ငံကူးလက်မှတ်နဲ့သွားရောက်ပြီး ရက်ပိုနေမိတဲ့ မြန်မာနိုင်ငံသားတွေကို တာချီလိတ် လူဝင်မှုကြီးကြပ်ရေးက ဥပဒေမဲ့ ငွေကြေးညစ်ရယူနေတယ်လို့ တာချီလိတ်ဒေသခံတွေထံက သိရပါတယ်။
တာချီလိတ်နယ်စပ်ဖြစ်တဲ့ ထိုင်းနိုင်ငံ မယ်ဆိုင်မြို့နဲ့ ချင်းရိုင်းမြို့ကသို့ ဆေးရုံဆေးခန်းပြသူနဲ့ ဆွေမျိုးသားချင်းတွေဆီအလည်သွားပြီး ပြန်လာရာမှာ သတ်မှတ်ရက်ဖြစ်တဲ့ ၇ရက်ထက် ကျော်လွန်သွားသူတွေကို မြန်မာလူဝန်မှုကြီးကြပ်ရေး(လဝက)က ဥပဒေပြဌာန်းချက်မရှိ၊ ညွှန်ကြားချက်မရှိဘဲ အကြောင်းအမျိုးမျိုးပြကာ ထိုင်းဘတ် ၅၀၀ ကနေ ၁၀၀၀ အထိ တောင်းခံနေတာလို့ ကိုယ်တိုင်ကြုံခဲ့ရသူတွေက ပြောပါတယ်။
ဒါ့အပြင် ဒီရက်ပိုင်းထဲ ထိုင်းနိုင်ငံဘက်ကို သွားရောက်ပြီး ရေဘေးကြောင့် ပြန်လာလို့မရလို့ ရက်ကျော်သွားသူတွေထံကပါ ငွေညှစ်တောင်းခံတယ်လို့ ကိုယ်တိုင်ကြုံရသူရဲ့ ဆွေမျိုးတစ်ဦးက ပြောပါတယ်။
“တစ်ပါတ်စာ စာအုပ်နဲ့ ရက်နည်းနည်းကျော်တာနဲ့ မြန်မာ လဝက တွေကပိုက်ဆံတောင်းတာ၊ အရင်က အဲ့လိုတောင်းတာမရှိဘူး။ ထိုင်းဘက်ကတော့ ရက်ကျော်ရင် ဒဏ်ငွေရိုက်တာတော့ရှိတယ်။ သူတို့က တခါတည်းစာကပ်ထားတယ်၊ တစ်ရက်ကျော်ရင် ဘယ်လောက်ဆိုပြီး။ တချို့ဆို ဆေးရုံသွားတက်တာလေ၊ အဓိက ပိုက်ဆံတောင်းတာ။ ဗမာစကားမကျွမ်းကျင်တဲ့ တောင်ပေါ်သားတွေကို ပိုတောင်းတယ်”လို့ ငွေညစ်ခံရသူရဲ့ ဆွေမျိုးတစ်ဦးက ပြောပါတယ်။
ထိုင်းဘက်ကနေ မြန်မာဘက်ကို အဝင် တစ်ပါတ်စာစာအုပ်တွေပြန်လည်အပ်နှံရတဲ့ နေရာမှာ ထိုင်တဲ့ အလှည့်ကျ လူဝင်မှုကြီးကြပ်ရေး ဝန်ထမ်းက ထိုင်းနိုင်ငံအတွင်း ရက်ကျော်နေထိုင်မိခဲ့တဲ့ မြန်မာနိုင်ငံသားတွေကို လူအခြေအနေကြည့်ပြီး သတ်မှတ်ချက်မရှိ ငွေညစ်နေကြတာဖြစ်ပါတယ်။
ထိုင်းနိုင်ငံကို သွားရောက်သူတွေထဲမှ နယ်ခံ တာချီလိတ်မြို့နယ်မှတ်ပုံတင်ကိုင်ဆောင်သူတွေကို ယာယီနိုင်ငံကူးလက်မှတ် တစ်နှစ်စာ စာအုပ် လုပ်ကိုင်ခွင်ပေးထားပြီး အခြားမြို့နယ်မှတ်ပုံတင်ကိုင်ဆောင်သူတွေကိုတော့ ယာယီနိုင်ငံကူးလက်မှတ် တစ်ပါတ်စာလက်မှတ်နဲ့ နေ့စဉ်စာအုပ်လုပ်ပြီး ၂ နိုင်ငံ ကူးသန်းခွင့်ပြုပေးထားတာဖြစ်ပါတယ်။
ထိုင်း-မြန်မာ ချစ်ကြည်ရေးတံတား အမှတ်(၁)ကနေ နေ့စဉ် ထိုင်းနိုင်ငံအတွင်း သွားရောက်လည်ပတ်သူ အလုပ်အကိုင်ကိစ္စနှင့်သွားသူ မြန်မာနိုင်ငံသား ဦးရေ ၂၀၀၀ ကျော်ခန့်ရှိကြောင်း သိရပါတယ်။
MK-002
