မဲခေါင်၊ သြဂုတ် ၄
အရှေ့မြောက်တိုင်းစစ်ဌာနချုပ် (ရမခ) တိုင်းမှူးဟောင်း ဗိုလ်ချုပ်စိုးတင့်၊ အမှတ် (၁) စစ်ဆင်ရေးကွပ်ကဲမှုဌာနချုပ် (စကခ-၁) စစ်ဆင်ရေးကွပ်ကဲရေးမှူး ဗိုလ်မှူချုပ်မျိုးမင်းထွေး၊ ရမခ စစ်ဦးစီးချုပ် ဗိုလ်မှူးချုပ် သန့်ထင်စိုးတို့ ၃ ဦးကို ကိုးကန့်တပ် MNDAA က အရှင်လက်ရ ဖမ်းမိထားတာရှိတယ်လို့ စစ်ရေးသတင်းရင်းမြစ်တွေထံမှ သိရပါတယ်။
ဖမ်းဆီးရမိတဲ့ ရမခတိုင်းမှူးဟောင်း ဗိုလ်ချုပ်စိုးတင့်ဟာ ပြီးခဲ့တဲ့ ဇူလိုင်လလယ်ပိုင်းက ရမခတိုင်းမှူးတာဝန်ကနေ အနားပေးခံထားရသူပါ။ သူရဲ့နေရာကို လက်ရှိ ရမခတိုင်းမှူးဖြစ်သူ ဗိုလ်မှူးချုပ်စိုးလှိုင်နဲ့ စစ်ခေါင်းဆောင်မင်းအောင်လှိုင်က အစားထိုးခဲ့တာပါ။
တပ်မ ၉၉ ရဲ့ တပ်မမှူးတာဝန်ယူခဲ့သူ လက်ရှိ ရမခတိုင်းမှူး ဗိုလ်မှူးချုပ်စိုးလှိုင်ရဲ့ အခြေအနေကိုတော့ သေချာမသိရသေးဘူးလို့ စစ်ရေးသတင်းရင်းမြစ်တွေက ပြောပါတယ်။ သူတိုင်းမှူးတာဝန်ယူပြီး ရက်ပိုင်းအကြာမှာပဲ ရမခကို ကိုးကန့် MNDAA ပူးပေါင်းတပ်တွေက စီးနင်းသိမ်းပိုက်လိုက်တာပါ။
“လက်ရှိတိုင်းမှူးဟောင်းနဲ့ တိုင်းမှူးသစ်ကြားမှာ ရှုပ်ထွေးတဲ့ အနေအထားတော့ ရှိနေတယ်” လို့ CDM ဗိုလ်ကြီးဇင်ယော်က မြေပြင်သတင်းတွေနဲ့ ပတ်သက်ပြီး ပြောပါတယ်။
တိုင်းမှူးတာဝန်ကို ယူခဲ့ပေမယ့် လားရှိုးမှာ ရုံးမထိုင်ဘဲ မူဆယ်မြို့မှ ကွပ်ကဲနေခဲ့ပြီး အခု ရမခ သိမ်းပိုက်ခံရချိန်မှာ ထွက်ပြေးနေတယ်လို့ သတင်းတွေ ထွက်ပေါ်နေပေမယ့် မဲခေါင်သတင်းဌာနက အတည်မပြုနိုင်သေးပါဘူး။
ရှမ်းပြည်မြောက်ပိုင်း၊ ကျောက်မဲမြို့မှာ အခြေစိုက်တဲ့ စကခ-၁ စစ်ဆင်ရေးကွပ်ကဲရေးမှူး ဗိုလ်မှူးချုပ်မျိုးမင်ထွေးဟာလည်း ယခုရက်ပိုင်းမှ ရာထူးတိုးထားပြီး MNDAA က ဖမ်းမိထားတယ်လို့ သိရပါတယ်။
လားရှိုးက စစ်ကောင်စီစခန်းတွေနဲ့ ရမခကို ကိုးကန့်တပ် MNDAA နဲ့ ပူးပေါင်းအဖွဲ့တွေက ဇူလိုင် ၃ ရက်မှာ စတင်တိုက်ခိုက်ခဲ့ပြီး တစ်လအကြာမှာ ရမခအပါအဝင် စစ်ကောင်စီစခန်းတွေအားလုံးကို သိမ်းပိုက်နိုင်ခဲ့တယ်လို့ ထုတ်ပြန်ထားပါတယ်။
ဒီလိုက်တိုက်ခိုက်မှုအတွင်း စစ်ကောင်စီရာထူးကြီးပိုင်းတွေဟာ အောက်ခြေတပ်သားနဲ့ ဒဏ်ရာရရဲဘော်တွေကို ထားခဲ့ပြီး မိသားစုဝင်တွေအပါ ၄၇၀ ကျော်ကို စစ်ဆေးရုံကနေ ကယ်တင်စောင့်ရှောက်ထားတယ်လို့ MNDAA က ဆိုပါတယ်။
စစ်တပ်သမိုင်းတလျှောက် တိုင်းစစ်ဌာနကြီးတစ်ခုလုံး သိမ်းပိုက်ခံရမှုမှာ ပထမဆုံးအကြိမ်ဖြစ်ပြီး ဒီလိုသိမ်းပိုက်ခံရတာနဲ့ ပတ်သက်ပြီး စစ်ကောင်စီဘက်က ဘာမှ ဝန်ခံပြောကြားထားတာ မရှိသေးပါဘူး။
