မဲခေါင်၊ ဇူလိုင် ၂၃
ရှမ်းပြည်တောင်ပိုင်း၊ ညောင်ရွှေမြို့နယ်၊ စံကားမြို့ အနီးတဝိုက်မှာ တိုက်ပွဲပြင်းထန်ပြီး ဘုန်းကြီးကျောင်းနဲ့ လူနေအိမ်တွေမှာ စစ်ဘေးရှောင်တွေ တိုးလာတဲ့အတွက် အခက်အခဲတွေဖြစ်လာနေတယ်လို့ ဒေသတွင်း သတင်းအရင်းအမြစ်တွေက ပြောပါတယ်။
စံကားမြို့ အနီးတစ်ဝိုက်မှာ ဇူလိုင်လ ၁၉ ရက်နေ့ကစပြီး စစ်ကောင်စီ၊ ပအိုဝ်းပြည်သူ့စစ် (PNA) ပူးပေါင်းတပ်နဲ့ ပအိုဝ်းအမျိုးသား လွတ်မြောက်ရေး တပ်မတော် (PNLA)တို့ ပြင်းထန်တိုက်ပွဲ ဖြစ်ပွားနေတာကြောင့် နီးစပ်ရာ ကျေးရွာ ၁၀ ခုကနေ အခုလို တိမ်းရှောင်လာရတာပဲ ဖြစ်ပါတယ်။
“သူတို့က လူများနေပြီဆိုတော့ အခုတောင် နေရာ မရှိတော့ဘူး ပြောနေတာ။ လူများလာရင် ဘုန်းကြီးကျောင်းမှာလည်း စားဝတ်နေရေး ပိုခက်ခဲလာနိုင်တယ်လေ။ နေရာထိုင်ခင်းလည်း အဆင်ပြေမှာ မဟုတ်ဘူး။ ကျမတို့ ရွာတော့ စစ်မဖြစ်သေးဘူး။ ဖြစ်လာရင်လည်း စံကားကိုပြေးဖို့က မလွယ်တော့ဘူး” လို့ မင်းရွာခံ တစ်ဦးက ပြောပါတယ်။
စံကားမြို့ မြို့တွင်း လူနေအိမ်တွေမှာ စစ်ဘေးရှောင် ၃၀၀ ကျော်ခန့် ခိုလှုံနေပြီး ဘုန်းကြီးကျောင်းမှာလည်း ၂၀၀ ကျော် ရှိပြီ ဖြစ်တာကြောင့် ထပ်လက်မခံတော့ဘူးလို့ ဆိုပါတယ်။
ဒါ့အပြင် မှော်ဘီတံတားကိုလည်း စစ်ကောင်စီတပ်က ပိတ်ထားတာကြောင့် ဒေသခံတွေအတွက် ထွက်ပြေးတိမ်းရှောင်ဖို့ ရေလမ်း တစ်လမ်းထဲသာ ကျန်ရှိပြီး ရုတ်တရက် အရေးအပေါ် အခြေအနေတွေမှာ အခက်အခဲ ကြုံရနိုင်တယ်လို့ ဆိုပါတယ်။
“နောင်ဗိုရွာတော့ ပြန်ကုန်ကြပြီတဲ့။ လင်လန်က ဘုန်းကြီး ပေးမပြန်သေးဘူး။ ရေ၊ မီး အပြည့်စုံတော့ ပေးထားတယ်။ နေရာထိုင်ခင်းတော့ နည်းနည်းကြပ်တယ်။ စားသောက်ဖို့ကလည်း အဆင်ပြေအောင် လုပ်လို့ရသေးတယ်။ ရက်ကြာလာရင်တော့ အဆင်မပြေဖြစ်လာမှာ စိတ်ပူတယ်။ ဘုန်းကြီးကလည်း ထပ်လက်မခံတော့ဘူး ပြောတယ်” လို့ စစ်ဘေးရှောင် တစ်ဦးက ပြောပါတယ်။
စံကားမြို့ အနီးတစ်ဝိုက်မှာ တိုက်ပွဲ ပြင်းထန်နေဆဲ ဖြစ်ပြီး ဟူးရန်း၊ ချမ်းသာ၊ လင်လမ်၊ ထီးဟန်းသား၊ နန်းဗွန်၊ ဆည်ခေါင်း၊ ထီရီး၊ ကုန်းပြား၊ နောင်ဗို၊ လွယ်ဗောင် စတဲ့ ကျေးရွာတွေက ဒေသခံ ထောင်ချီဟာ တိမ်းရှောင်နေရတယ်လို့ သိရပါတယ်။
လက်ရှိမှာ ကုန်းပြားဘုန်းကြီးကျောင်း အပါအဝင် ဆောင်းပြောင်းနဲ့ ဆယ်ခေါင်းက နေအိမ်တချို့ဟာ စစ်ကောင်စီရဲ့ လက်နက်ကြီး ပစ်ခတ်မှုကြောင့် ပျက်စီးသွားခဲ့ပြီး နယ်မြေတည်ငြိမ်သွားတဲ့ တချိန်ကြရင် နေရပ်ပြန်ဖို့ ခက်ခဲလာနိုင်တယ်လို့ စစ်ဘေးရှောင်တွေက သုံးသပ်ပါတယ်။
MK-014
