ပင်လောင်းစစ်ဘေးရှောင်စခန်းမှာ မိုးကာနဲ့ အဝတ်အစားအကူအညီ လိုအပ်နေ
မဲခေါင်၊ မေ ၃၀
ရှမ်းပြည်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ ပင်လောင်း-ဖယ်ခုံနယ်စပ် ဆောင်လန် စစ်ဘေးရှောင်စခန်းမှာ မိုးကာနဲ့ အဝတ်အစား အကူအညီတွေ အရေးပေါ် လိုအပ်နေတယ်လို့ ဒေသတွင်း သတင်းရင်းမြစ်တွေက ပြောပါတယ်။
မေလ ၂၅ ရက်နေ့ကစပြီး ပင်လောင်းမြို့နယ်မှာ နေ့စဥ်ရက်ဆက် မိုးသည်းထန်စွာ ရွာသွန်းနေတာကြောင့် မိုးကာတွေ ဆွေးမြေ့ပျက်စီးလာပြီး မိုးယိုနေတယ်လို့ ဆိုပါတယ်။
ဒေသတွင်း စစ်ဘေးရှောင်အရေး ကူညီဆောင်ရွက်ပေးနေသူတစ်ဦးက “မိုးကာက နေပူဒဏ်ကြောင့် ဆွေးလာတာလည်း ပါတာပေါ့၊ သုံးနေတာလည်း ကြာပြီဆိုတော့လေ။ အခုမိုးရွာတော့ ပိုသိသာသွားတာပေါ့။ မိုးကာ တစ်ချပ်ကို ဘယ်လောက်မှမပေးရဘူးဆိုတော့ လှူပေးစေချင်တာပေါ့နော်” လို့ ပြောပါတယ်။
မိုးယိုဒဏ်ကြောင့် အဝတ်အစားတွေ မိုးရေစိုရွှဲတဲ့ဒဏ် ခံရတဲ့အပြင် စစ်ဘေးရှောင်တွေလည်း ညအိပ်တဲ့အချိန်မှာ မိုးမိတဲ့အတွက် ဖျားနာတာတွေ ကြုံနေရပြီး လဲစရာအဝတ်အစားနဲ့ အအေးဒဏ်ကာကွယ်ဖို့အတွက် အနွေးထည်တွေ လိုအပ်နေတယ်လို့ သိရပါတယ်။
စစ်ဘေးရှောင်တစ်ဦးက “မိုးကအရမ်းသည်းတော့ တချို့ရက်တွေဆို အဝတ်အစားတွေအကုန် လွင့်ထွက်ကုန်တယ်၊ အသုံးအဆောင်ပစ္စည်းတွေရော။ အလှူရှင်ကတော့ မလာတာ ၁ နှစ် ကျော်ပြီ။ လောလောဆယ် မိုးကာ မဝယ်နိုင်သေးလို့ တိပ်နဲ့ ရသလောက် ကပ်ထားတယ်” လို့ ပြောပါတယ်။
ဆောင်လန် စစ်ဘေးရှောင်စခန်းကို ၂၀၂၃ ခုနှစ် အစပိုင်းကတည်းက လူမှုကွန်ယက်အဖွဲ့အစည်း (CSOs)၊ အစိုးရ မဟုတ်တဲ့အဖွဲ့အစည်း (NGOs) တွေ မလာရောက်တော့တာကြောင့် စားဝတ်နေရေးအခက်အခဲတွေ ကြုံတွေ့ နေရပြီး စစ်ဘေးရှောင်တွေအနေနဲ့ ထမင်းမစားရတဲ့ ရက်တွေလည်း ကြုံတွေ့နေရတယ်လို့ ဆိုပါတယ်။
အလားတူ မေလ ၂၁ ရက်နေ့ကလည်း ဆောင်လန် စစ်ဘေးရှောင်စခန်းမှာ မိုးသက်လေပြင်းကျရောက်မှုကြောင့် စစ်ရှောင်တဲ ၄ လုံး ပျက်စီးခဲ့ပြီး ပြန်ဆောက်ဖို့ ငွေကြေးအခက်အခဲ ရှိနေတယ်လို့ ဆိုပါတယ်။
ဆောင်လန်စစ်ဘေးရှောင်စခန်းမှာ အိမ်ထောင်စု ၃၅ စု၊ လူဦးရေ ၁၂၅ ဦး နေထိုင်ကြပြီး အားလုံးဟာ ကရင်နီပြည်က တိမ်းရှောင်လာသူတွေဖြစ်တယ်လို့ စုံစမ်းသိရပါတယ်။
MK-015
