မဲခေါင်၊ ဖေဖော်ဝါရီ ၂၀

ရှမ်းပြည်တောင်ပိုင်း၊ ဟိုပုံးမြို့နယ်ရှိ ကျုးမုံ့ရွာနဲ့ဟွေးတက်ရွာ ဘုန်းကြီးကျောင်းတွေမှာ လက်နက်ကြီးအထိုင်ချပြီး မဲနယ်တောင်ဘက်ကို ဒီနေ့ ဖေဖော်ဝါရီ ၂၀ ရက်နေ့ မနက်ပိုင်းက ပစ်ခတ်နေတယ်လို့ ဒေသခံတွေဆီက သိရပါတယ်။

ဟိုပုံးမြို့နယ်က ကျုးမုံ့ကျေးရွာနှင့် ဟွေးတက်ကျေးရွာကြားက ကုန်းကျောင်း ဘုန်းကြီးကျောင်းမှာ စစ်ကောင်စီက နေရာယူထားပြီး မဲနယ်တောင်ဘက်ကို ယနေ့မနက် ၁၁ နာရီဝန်းကျင်က လက်နက်ကြီးတွေနဲ့ဆက်တိုက် ပစ်ခတ်ခဲ့ကြောင်း သိရပါတယ်။

အမြောက်တွေဟာ မဲနယ်တောင်ဒေသ၊ လွယ်မောတောင်ဘက်ကို ပစ်နေတာဖြစ်လို့ စံဖူးအုပ်စု၊ ပန်အွတ်ရွာတွေဘက်က ဒေသခံတွေထွက်ပြေးပြီး စစ်ဘေးရှောင်ကုန်ကြပြီလို့သိရပြီးလက်နက် ကြီးပစ်ခတ်မှုကြောင့် ထိခိုက်သူရှိမရှိကိုမူ မသိရသေးပါဘူး။

စစ်ကောင်စီရဲ့ အမြောက်တပ်ဟာ ဆိုက်ခေါင်အပြင် အခုဟိုပုန်း ကျုးမုံ့မှာပါ အထိုင်ချပြီး ပတ်ဝန်းကျင်ကျေးရွာတွေကို ပစ်ခတ်နေတာပါ။

ပြီးခဲ့တဲ့ ဖေဖော်ဝါရီ ၁၄နဲ့ ၁၆ရက်တွေက မဲနယ်တောင်ကြောက ပတ်ချားကလိုးကျေးရွာနဲ့ ကျေက္ကခြားရွာတေတွေကို လေယာဥ်နဲ့ဗုံးကြဲ၊ ဒရုန်းနဲ့ဗုံးချလို့ ကလေး၁ ဦး၊ ကိုယ်ဝန်ဆောင် ၁ ဦးအပါအဝင် ၃ ဦးသေဆုံးခဲ့ရပြီး သေဆုံးသူ ကိုယ်ဝန်ဆောင်ရဲ့ သားသမီး ၄ ဦးနဲ့ အခြား ၇ ဦးဒဏ်ရာတွေ အသီးသီးရခဲ့ကြတာရှိပါတယ်။

လက်ရှိမှာတော့ စစ်ကောင်စီဟာ သူ့ရဲ့အမြောက်တပ်တွေကို ဆိုက်ခေါင်အပြင် ဟိုပုံးကျုမုံ့မှာ နေရာထပ်တိုးထိုင်ပြီး ပတ်ဝန်းကျင်ကို ပစ်ခတ်နေတာဖြစ်ကြောင်း သိရပါတယ်။

ယင်းအမြောက်တပ်တွေဟာ အောင်ပန်းက အမြောက်တပ်မ (၉၀၃) နဲ့ ဟဲဟိုးက အမြောက်တပ်တွေ ဖြစ်တယ်လို့ စစ်တပ်အသိုင်းအဝန်းက စုံစမ်းသိရပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)