မဲခေါင် ၊ ဖေဖော်ဝါရီ ၁၉
ရှမ်းပြည်အတွင်း နေထိုင်တဲ့ဒေသခံပြည်သူ မည်သူမဆို နိုင်ငံခြားကို မိသားစုလိုက် ထွက်ပြေးတိမ်းရှောင်ပါက နေအိမ်ဥစ္စာတွေကိုသိမ်းဆည်းသွားမယ်လို့ ရှမ်းပြည် ပြန် လည်ထူထောင်ရေးကောင်စီ RCSS က ယနေ့ ဖေဖော်ဝါရီ ၁၉ ရက်မှာထုတ်ပြန်လာပါတယ်။
လက်ရှိဖြစ်ပေါ်နေတဲ့ နိုင်ငံရဲ့ စစ်ရေးပဋိပက္ခ ကာလအတွင်း ရှမ်းပြည်အတွင်း နေထိုင်တဲ့ မည်သည့်တိုင်းရင်းသား လူမျိုးမဆို အသက် ၁၈ နှစ်က ၄၅ နှစ်အထိ ကျား၊ မ အားလုံး ရှမ်းပြည်အမျိုးသားရေး တာဝန် ထမ်းဆောင်နိုင်ရန်အတွက် စစ်မှုထမ်းမူဝါဒနဲ့ မြေယာမူဝါဒတွေကို RCSS/SSAက ရှမ်းဘာသာနဲ့ ဒီနေ့မှာ ထုတ်ပြန်တာပါ။
RCSS တပ်ဖွဲရဲ့ စစ်မှုထမ်းမူဝါဒထဲမှာ (၁) အသက် (၁၈) နှစ် ပြည့်လျှင် ၆ နှစ် စစ်မှုထမ်းရန် (၂) တက္ကသိုလ်အဆင့် ပြီးမြောက်သူများ သင်ကြားရေးနဲ့ ရုံးလုပ်ငန်း တာဝန်ထမ်းဆောင်ရန် (၃) စက်မှုလက်မှု ကျွမ်းကျင်သူတွေ၊ လျှပ်စစ်ပစ္စည်း၊ စက်ပစ္စည်းနဲ့ ယာဉ်ထိန်းသိမ်းရေးတို့ လုပ်ဆောင်ရန် (၄) နည်းပညာကျွမ်းကျင်သူတွေအနေနဲ့ ဒရုန်းတပ်ဖွဲ့၊ IT နဲ့ Website ဆိုင်ရာ တာဝန်ထမ်းဆောင်ရန် (၅) နိုင်ငံရေး၊ စည်းရုံးရေးနှင့် မှတ်တမ်းထိန်းသိမ်းရေး ကျွမ်းကျင်သူတွေကတော့ သက်ဆိုင်ရာအလိုက် တာဝန်ထမ်းဆောင်ရန် စသဖြင့်ဖော်ပြ ပါရှိပါတယ်။
ထို့ပြင် နိုင်ငံ့ပြင်ပဖြစ်တဲ့ ထိုင်း၊ တရုတ်နဲ့ လာအို စတဲ့ နိုင်ငံခြားကိုရောက်ရှိနေသူတွေလည်း RCSS ဆီကို စစ်မှုထမ်းရန် စာရင်းပေးသွင်းကာ တာဝန်လာရောက် ထမ်းဆောင်ရမယ်လို့လဲ ဆိုထားပါတယ်။
RCSS က ပေးအပ်တဲ့တာဝန်တွေကို ရှောင်လွှဲပြီး မိသားစုလိုက် နိုင်ငံခြားကို ထွက်ပြေးတိမ်းရှောင်သူတွေရဲ့ နေအိမ်ဥစ္စာတွေ၊ ၃ နှစ်အထိ လုပ်ကိုင်ခြင်းမရှိတဲ့ တောင်ယာတွေကို
ကျေးရွာပိုင်အဖြစ် သိမ်းဆည်းမှာဖြစ်ပြီး အိမ်ခြံမြေ ရောင်းချခွင့်ကို သက်ဆိုင်ရာ အုပ်ချုပ်ရေးမှူးထံက ခွင့်ပြုချက် ရယူရန်လည်း RCSS တပ်ဖွဲ့၏ မြေယာမူဝါဒတွင် ဖော်ပြထားပါတယ်။
RCSSဟာ ယနေ့ချိန်ထိ NCA ကို ကိုင်စွဲထားပြီး စစ်ကောင်စီရဲ့ အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ကော်မတီ NSPNC နဲ့လည်း ပုံမှန်တွေ့ဆုံ ဆွေးနွေးလျက်ရှိနေတာဖြစ်သလို ဝမ်ဟိုင်းအခြေပြု SSPP/ SSA လိုပဲရှမ်းလက်နက်ကိုင်တပ် ၂ တပ်လုံးဟာခုချိန်ထိ စစ်အာဏာရှင်တိုက်ခိုက်ရေးမှာလက်ရှိပါဝင်လာခြင်း မရှိသေးပါဘူး။
MK-012
