မဲခေါင်၊ ဇန်နဝါရီ ၂၄

ကရင်နီပြည်နယ်၊ ဒီးမော့ဆိုမြို့နယ် အရှေ့ဘက်ခြမ်းကနေ စစ်ဘေးရှောင်လာတဲ့ ဒေါ်ထူးလီက သားဖြစ်သူနဲ့ သမီးဖြစ်သူကို ဒီဇင်ဘာလ တစ်လထဲမှာပဲ ဆုံးရှုံးလိုက်ရတယ်လို့ သူကပြောပါတယ်။

‘သမီးနဲ့ သားတို့ မရှိတော့ ရင်ကျိုးတယ်ပေါ့နော် စိတ်နာတယ်။ ရှေ့ဆက်ဘာဆက်လုပ်ရမလဲမသိဘူး။ အိပ်မရဘူး။ စားလည်းမဝင်ဘူး။ ဒီရက်အထိပဲ။ သတိရရင် မျက်ရည်ကျတယ်။ ဘုရားလက်ထဲပဲ အပ်ထားရတယ်။ သူတို့ကောင်းရာ ဘုံဘဝရောက်ဖို့ပဲမေတ္တာပို့နေရတယ်’

စစ်ဘေးရှောင်အမျိုးသမီး ဒေါ်ထူးလီက စစ်ကောင်စီတပ်အာဏာမသိမ်းခင်က တောင်ယာနဲ့ နှမ်းခင်းလုပ်ငန်းကို နှစ်ပေါင်း ၂၀ ကျော်လုပ်ကိုင်ခဲ့ပြီး သားသမီးတွေရှာဖွေကျွေးမွေးမှုနဲ့ ဘဝကို အေးအေးချမ်းချမ်းဖြတ်သန်းခဲ့ပါတယ်။

အာဏာသိမ်းပြီးချိန်မှာတော့ စစ်ကောင်စီတပ်ရဲ့ လေကြောင်းနဲ့ လက်နက်ကြီးရန်ကိုကြောက်လို့ ၂၀၂၁ ခုနှစ် ၅ လပိုင်းကတည်းက မိသားစုဝင်အားလုံးနဲ့အတူ ဒီးမော့ဆိုအနောက်ခြမ်းကို စစ်ဘေးရှောင်နေခဲ့ရပါတယ်။

စစ်ဘေးရှောင်ရတဲ့အချိန် သမီးကြီးဖြစ်သူက မိဘကိုပြန်လုပ်ကျွေးနိုင်ဖို့ နိုင်ငံခြားထွက်အလုပ်လုပ်ဖို့အတွက် ရန်ကုန်မှာ သင်တန်းတက်နေချိန် ၂၀၂၂ ခုနှစ် ၁၀ လပိုင်းက စစ်ကောင်စီတပ်ရဲ့ PDF တွေကို ဖုန်းဘေထောက်ပံ့တယ်ဆိုတဲ့ စွပ်စွဲချက်ကြောင့် အင်းစိန်ထောင်တွင်းဖမ်းဆီးခံခဲ့ရပါတယ်။ ဖမ်းဆီးခံရချိန်မှာ သမီးဖြစ်သူနဲ့အတူ ငွေကျပ် သိန်း ၈၀ ကျော်ပါ ပါသွားပြီး ထောင်တွင်းအာဏာပိုင်တွေက ပြန်မပေးဘူးလို့ဆိုပါတယ်။

မောင်ဖြစ်သူက မိဘတွေကို ကူညီစောင့်ရှောက်ပေးနေရင်းကနေ အမဖြစ်သူ မတရား ဖမ်းဆီးခံရတါကြောင့် စိတ်နာပြီး PDF ထဲဝင်ကာ ရှေ့တန်းတိုက်ပွဲတွေကို ဝင်ရောက်တိုက်ခိုက်နေခဲ့ပါတယ်။

အသက် ၂၅ နှစ်အရွယ် သမီးဖြစ်သူက အင်းစိန်ထောင်တွင်းရှိနေပြီး ၂၀၂၃ ခုနှစ် ၁၂ လပိုင်း ၁၈ ရက်နဲ့ ၁၉ ရက်နေ့မှာ နှလုံးရောဂါအခံကြောင့် နာမကျန်းဖြစ်ချိန် ထောင်တွင်းအာဏာပိုင်တွေက ဆေးကုသပေးဖို့ အချိန်ဆွဲနေခဲ့ပြီး အချိန်မှီကုသခွင့်မရလို့ ၂၁ ရက်နေ့မှာတော့ ထောင်တွင်းအသက်ဆုံးရှုံးခဲ့ရပါတယ်။

အသက် ၂၃ နှစ်အရွယ် သားဖြစ်သူကလည်း ၂၀၂၃ ခုနှစ် ၁၂ လပိုင်း ၂၆ ရက်နေ့မှာ တိုက်ပွဲပြင်းထန်နေတဲ့ လွိုင်ကော်မြို့သိမ်းတိုက်ပွဲအတွင်း လက်နက်ကြီးထိမှန်ကျဆုံးခဲ့ရတယ်လို့ဆိုပါတယ်။

သားဖြစ်သူရဲ့ဈာပနအခမ်းအနားပြုလုပ်ပြီးချိန်မှ သမီးဖြစ်သူ သေဆုံးရမှုကို ရေဒီယိုကနေတဆင့် သိရပြီး တလအတွင်း သားနဲ့သမီးကို ရှေ့ဆင့်နောက်ဆင့်ဆုံးရှုံးခဲ့ရတဲ့အတွက် ဝမ်းနည်းပူဆွေးနေတယ်လို့ သိရပါတယ်။

ဒါ့အပြင် သမီးဖြစ်သူ နိုင်ငံခြားထွက်နိုင်ဖို့ ရှာဖွေချေးငှားထားတဲ့ပိုက်ဆံတွေလည်း ဆုံးရှုံးခဲ့ရတဲ့အပြင် ပြန်ဆပ်ဖို့အတွက် ငွေကြေးအခက်အခဲတွေလည်း ရှိနေတယ် လို့ စစ်ဘေးရှောင်အမျိုးသမီး ဒေါ်ထူးလီက ပြောပါတယ်။

အခုလက်ရှိအချိန်မှာ နီးစပ်ရာ ဆွေမျိုးတွေက ကူညီပံ့ပိုးမှုနဲ့သာ ရှေ့ဆက်နေရပြီး သားနဲ့သမီးကို ဆုံးရှုံးရမှုအတွက် ဖြေမဆည်နိုင်ဘဲ နေ့စဉ်ငိုကြွေးမိပြီး စားမဝင်အိပ်မပျော် ဖြစ်နေရပါတယ်။

CJ-004

#MeKongNews

#သားသမီး

#ဆုံးရှုံး

#စစ်ကောင်စီ

#စစ်ရှောင်

#ထောင်ကျ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)