မဲခေါင်၊ ဇန်နဝါရီ ၂

ရှမ်းပြည်နယ်တောင်ပိုင်း လွိုင်လင်မြို့နယ်ရှိ ပအိုဝ်းကျေးရွာတွေမှာ စစ်ကောင်စီတပ်နဲ့ စစ်ကောင်စီလက်အောက်ခံ PNO ပြည်သူ့စစ်က နယ်လှည့်ပြီး ပိုက်ဆံတောင်းစားနေတယ်လို့ ‌ဒေသခံတွေကပြောပါတယ်။

လွိုင်လင်မြို့နယ်ရှိ ပအိုဝ်းကျေးရွာတွေဟာ အရင်နှစ်မှာလည်း PNO ပြည်သူ့စစ်က စစ်ကောင်စီတပ်အတွက် အသက် ၁၈ နှစ်နဲ့ ၃၅ နှစ်အောက်ယောကျ်ားတွေကို တစ်ရွာကို ၁၀ ယောက် စစ်သားစုဆောင်းတာတွေ ပြုလုပ်ခဲ့တာကြောင့် လူငယ်တွေဟာ ရွာလုံးကျွတ် ထိုင်းကို ထွက်သွားခဲ့ကြပါတယ်။

အခုနှစ်မှာတော့ စစ်သားစုဆောင်းဖို့ လူငယ်တွေမရှိတော့တာကြောင့် စစ်ကောင်စီနဲ့ စစ်ကောင်စီလက်အောက်ခံ PNO ပြည်သူ့စစ်တွေဟာ တစ်အိမ်ကို တစ်သောင်းငါးထောင်ကျပ် မကြာခဏ ငွေတောင်းစားနေတယ်လို့ ဒေသခံတွေရဲ့ ပြောကြားချက်အရသိရပါတယ်။

“PNO နဲ့ ဗမာစစ်သားတွေပဲ။ ရွာဘုန်းကြီးကျောင်းလာတည်းတယ်။ ရွာထိပ်မှာ ရွာသားတွေကို ကင်းပြန်စောင့်ခိုင်းတယ်။ ရွာမှာက လူငယ်တွေမရှိတော့ဘူး ထိုင်းဘက်ရောက်ကုန်တော့ အသက် ၆၀ နီးပါးရှိတဲ့ အဖေအမေအရွယ် လူကြီးရွယ်အိုမကျန် သူတို့ကို ကင်းစောင့်ပေးရတယ်။ ငွေက ၁၅၀၀၀ တောင်းတယ်။ တစ်ခါတည်း ၁၅၀၀၀ အပြီးထည့်ရတယ်။ ခန့်မှန်းအင်အားက ၄၀ လောက်ရှိတယ်” လို့ လွိုင်လင်မြို့ ပအိုဝ်းလူငယ်တစ်ဦးကပြောပါတယ်။

အင်အား ၄၀ ခန့်ရှိတဲ့ စစ်ကောင်စီ နဲ့ PNO ပြည်သူ့စစ် ပူးပေါင်းစစ်ကြောင်းဟာ ပအိုဝ်းရွာတွေကို နယ်လှည့်ရာမှာ ကျေးရွာရဲ့ ဘုန်းကြီးကျောင်း နဲ့ စာသင်ကျောင်းတွေမှာ တပ်စွဲပြီး ရွာသားတွေကို ၂၄ နာရီ ကင်းပြန်စောင့်ခိုင်းတာလည်း ပြုလုပ်တယ်လို့ လွိင်လင်မြို့နယ် ဒေသခံတစ်ဦးကပြောပါတယ်။

စစ်ကောင်စီနဲ့PNO ပြည်သူ့စစ်တွေ အဲ့ဒီလို နယ်လှည့်ပြီး တောင်းစားတာကို ကျေးရွာဥက္ကဌတစ်ဦးဖြစ်တဲ့ ဦးစိန်ဝင်းဆိုသူဟာလည်း တက်တက်ကြွကြွ အတူပူးပေါင်းနေတယ်လို့ ဒေသခံတွေက ပြောပါတယ်။

လွိုင်လင်မြို့နယ်ဘက်မှာ မီဒီယာလည်းမရှိ တက်ကြွလှုပ်ရှားသူလည်းမရှိတာကြောင့် PNO ပြည်သူ့စစ်ဟာ အခုလို ဖိနှိပ်မှုတွေကို ပြောင်ပြောင်တင်းတင်းလုပ်နေတာဖြစ်တယ်လို့ ဒေသခံတွေကဆိုပါတယ်။

PNO ပြည်သူ့စစ်က နယ်လှည်ပြီး ပိုက်ဆံတောင်းစားနေတဲ့ ရွာတွေကတော့ လွိုင်လင်မြို့နယ် အင်ချစ် ၊ နောင်နိမ်း ၊ လွယ်ခွင် ၊ ပန်းတိုင် ၊ ခေါင်နွဲ့စတဲ့ ပအိုဝ်းကျေးရွာတွေ ဖြစ်တယ်လို့ ဒေသခံတွေရဲ့ ပြောဆိုချက်အရ သိရပါတယ်။

နွေဦးတော်လှန်ရေးမှာ PNOပြည်သူ့စစ်ဟာ အာဏာသိမ်းစစ်တပ်ရဲ့ လက်ကိုင်တုတ်ဖြစ်လာပြီး စစ်ရေးအကြောင်းပြပြီး ဒေသခံပြည်သူတွေကို စစ်သားသစ်စုဆောင်းတာ ဆက်ကြေးကောက်ခံတာတွေကို ပြုလုပ်နေဖြစ်ပါတယ်။

CJ-002

#MeKongNews

#စစ်ကောင်စီ

#ပြည်သူ့စစ်

#တောင်းစား

#PNO

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)