မဲခေါင်၊ ဒီဇင်ဘာ ၂

စစ်ကိုင်းတိုင်း၊ ကောလင်းမြို့ရှိ ပုဂ္ဂလိကဘဏ်များမှငွေသားလက်ကျန် ကျပ်ငွေသန်းပေါင်း (၄၄,၅၁၈.၂၉၇) ကို၊ ကြားကာလဗဟိုဘဏ်ရဲ့ လမ်းညွှန်ချက်အရ လုပ်ထုံးလုပ်နည်းနှင့်အညီ စိစစ်ကာ စနစ်တကျ လက်ခံသိမ်းဆည်းထားတယ်လို့ NUGကထုတ်ပြန်ကြေညာထားပါတယ်။

ကောလင်းခရိုင် ပေါင်းစပ်ညှိနှိုင်းရေးအဖွဲ့ရဲ့ တင်ပြချက်အရ အချို့သော ပုဂ္ဂလိကဘဏ်တွေမှာ လုံခြုံရေးစည်းကျိုးပေါက်ပြီး၊ ဘဏ်ငွေတိုက်ခန်း (Vault) ကို ဖောက်ထွင်းဝင်ရောက်ရန် ကြံစည်ထားတဲ့ အထောက်အထားများ တွေ့ရှိရပြီး အချိန်မီကာကွယ်တားဆီးနိုင်ခဲ့တာကြောင့် အပ်နှံငွေများ ဆုံးရှုံးခဲ့ခြင်း မရှိဘူးလို့လည်း ဖော်ပြချက်မှာပါရှိပါတယ်။

အမျိုးသားညီညွတ်ရေးအစိုးရ၊ ကြားကာလဗဟိုဘဏ်အနေဖြင့် ကောလင်းခရိုင်၊ ကောလင်းမြို့ရှိ ပုဂ္ဂလိကဘဏ်များ၏ ငွေသားလက်ကျန် လက်ခံသိမ်းဆည်းထားရှိမှုကို စာရင်းသွင်း မှတ်တမ်းတင်ထားတယ်လို့လည်း ကြေညာချက်မှာ ပါရှိပါတယ်။

ပြည်သူလူထုတွေရဲ့ အပ်နှံငွေများ နစ်နာဆုံးရှုံးမှုမရှိစေဖို့ တာဝန်ခံလျက် ဥပဒေနဲ့အညီ ပြည်ထောင်စုဘဏ္ဍာ ရန်ပုံငွေအဖြစ် သတ်မှတ်ကာ စနစ်တကျ စီမံခန့်ခွဲသွားမှာဖြစ်တယ်လို့ အမျိုးသားညီညွတ်ရေးအစိုးရ ကြားကာလဗဟိုဘဏ်က ကြေညာထားပါတယ်။

MK-006

#MeKongNews

#ကောလင်း

#ဘဏ်

#သိမ်းဆည်း

#အပ်ငွေ

#သိန်းလေးသောင်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)