မဲခေါင်၊ နိုဝင်ဘာ ၁
ရှမ်းပြည်မြောက်ပိုင်း၊ ကွမ်းလုံမြို့နယ်၊ ကံမိုင်းမှာ အခြေချတဲ့ (ရမခ) လက်အောက်ခံတပ်ရင်း ခလရ (၁၄၃) မှ လူဦးရေ (၄၁) ဦးသည် ညီနောင်မဟာမိတ် (၃)ဖွဲ့ ထံသို့ လက်နက်ချပြီး အလင်းဝင်လာခဲ့တယ်လို့ သိရပါတယ်။
အဲ့ဒီလို မြောက်ပိုင်းမဟာမိတ် သုံးဖွဲ့ထံ လက်နက်ချအလင်းဝင်လာတဲ့ (၄၁) ဦးမှာ ဒု-တပ်ရင်းမှူး (၁) ဦးနဲ့ တပ်ခွဲမှူး (၂) ဦးပါဝင်တယ်လို့ The Kokang က ဒီနေ့မှာ အထူးသတင်းအနေနဲ့ ထုတ်ပြန်ပါတယ်။
ကံမိုင်းဒေသမှာ အခြေချတပ်ထိုင်ထားတဲ့ စစ်ကောင်စီတပ်ဖွဲ့ဝင်တွေဟာ တပ်စခန်းအတွင်းမှာသာ ခိုအောင်းပြီး စစ်ကူများကိုစောင့်ဆိုင်းနေခဲ့တာပါ။
အောက်တိုဘာလ (၂၈) ရက်နေ့ ညပိုင်းတွင် ညီနောင်မဟာမိတ် (၃) ဖွဲ့ မှ အဲ့ဒီတပ်ရင်းကို လက်နက်ချအလင်းဝင်ရန် တောင်းဆိုခဲ့ပါတယ်။ နှစ်ဦးနှစ်ဘက်မှ တစ်နေ့လုံး ဆွေးနွေးတိုင်ပင်ခဲ့ကြပြီးနောက် အောက်တိုဘာလ (၃၀) ရက်နေ့မှာ ခလရ (၁၄၃) တပ်ဖွဲ့ဝင်တွေက လက်နက်ချပြီးအလင်းဝင်လာခဲ့ပါတယ်။ စစ်ရေးပစ္စည်းများ၊ လက်နက်ခဲယမ်းများကိုလည်း တပ်စခန်းတွင် ထားရှိခဲ့ပြီး ဆုတ်ခွာခဲ့တယ်လို့ ဆိုပါတယ်။
အလင်းဝင်လာတဲ့ စစ်ကောင်စီတပ်ဖွဲ့ဝင် (၄၁) ဦးကို MNDAA က တစ်ဦးလျှင် လမ်းစရိတ် (၁၅)သိန်း (စုစုပေါင်း သိန်း ၇၀၀ ကျော်)ပေးပြီး လွတ်ငြိမ်းချမ်းသာခွင့်ပေးလိုက်တယ်လို့ ဆိုပါတယ်။
လက်ရှိအချိန် စစ်ကောင်စီတပ်ဖွဲ့မှာ လူအင်အားအလွန်ချို့တဲ့နေပြီး တပ်ရင်း (၁) ရင်းမှာ လူအင်အား (၁၀၀)ခန့်သာရှိပါတော့ပြီး ထွက်ပြေးသူ၊ ကျဆုံးသူများလည်း နေ့စဉ်နှင့်အမျှ ဆက်တိုက်တိုးများနေပါတယ်။
“ကာမိုင်းဒေသမှာရှိတဲ့ စစ်ကောင်စီတပ်ဟာ ယခုကဲ့သို့ တပ်ရင်း(၁)ရင်းလုံး လက်နက်ချ အလင်းဝင်တဲ့ အခြေအနေမျိုး လုံးဝမရှိခဲ့ကြောင်း၊ ဒါကိုကြည့်ခြင်းအားဖြင့် စစ်ကောင်စီတပ်၏ အတွင်းပိုင်းဟာ လုံးဝပျက်စီးနေပြီး ပြိုကွဲမည့်အခြေအနေသို့ရောက်ရှိနေပြီ ” လို့ MNDAA ရှေ့တန်းအရာရှိတစ်ဦးက ပြောပါတယ်။
ခလရ (၁၄၃) မှ ရရှိခဲ့တဲ့ ပစ္စည်းတွေမှာ ဆက်သွယ်ရေးစက် (၃) ခု၊ ရိုင်ဖယ်သေနတ် (၂၇) လက်၊ စက်လက်အငယ် (၅) လက်၊ RPG (၂) လက်၊ Sniper (၁) လက်၊ စက်လက်အကြီး (၂) လက်၊ Type -82 စိန်ပြောင်း (၁) လက်၊ ၆၀မမ စိန်ပြောင်း (၂) လက်၊ ၅.၅၆ ကျည် (၁၁) ဖာ၊ ၅.၅၆ Shot Gun ကျည် (၈၀၀၀)တောင့်၊ အီနာဂါ (၃) ဖာ၊ ရိုင်ဖယ်ကျည်ကပ် (၁၃၀) ခု၊ MA-4 ဗုံးသီး(၈၀) လုံး၊ ဗုံးသီးအမျိုးမျိုး (၂၄၇) လုံး၊ ၈၂မမ ဗုံးသီး (၉၁) လုံး၊ ၁၀၀မမ ဗုံးသီး (၄၆) လုံး ၊ MA-4 (၄)လက် ၊ လက်ကိုင်ဖုန်း (၂၈) လုံး၊ စကားပြောစက် (၇) ခု၊ ဆန် (၃၈) အိတ်၊ Readymade Food (၁၂) ဖာ၊ ကုလားပဲ (၃) ပုံး၊ ဆေး (၅) ဖာ၊ စားသုံးဆီ (၃) ပုံး၊ လောင်စာဆီ (၃) ပုံး၊ ဝက် (၁) ကောင် တို့ ဖြစ်တယ်လို့ ကိုးကန့်က သတင်းထုတ်ပြန်ထားပါတယ်။
#MeKongNews
#ကိုးကန့်
#စစ်ကောင်စီ
#တပ်ရင်း
#လက်နက်ချ
#စစ်ကူ
