မဲခေါင်၊ နိုဝင်ဘာ ၈
မူဆယ်မြို့နယ်၊ စယ်လန့်ကျေးရွာမှာ ဖြစ်ပွားခဲ့တဲ့ ရှမ်းပြည်တိုးတက်ရေးပါတီ SSPP/SSA နဲ့ တအာင်း (ပလောင်) ပြည်နယ်လွတ်မြောက်ရေးတပ်ဦး PSLF/TNLA တို့ ဖြစ်ပွားခဲ့တဲ့ ပြဿနာကို ဆက်လက် မကြီးထွားစေဖို့ ၂ ဖက် ခေါင်းဆောင်တွေ ထိန်းညှိသွားမှာဖြစ်ပြီး ၂ ဖက် မဟာမိတ်ရေးရာရုံးမှ အပြန်အလှန် ဆက်သွယ် ဖြေရှင်းသွားမှာ ဖြစ်ကာ စိုင်းမောဝ်အွန် ကိုလည်း ပြန်လွှတ်ပေးလိုက်ပြီလို့ TNLA က ဒီကနေ့ ထုတ်ပြန်ပါတယ်။
မနေ့က ဖြစ်ပွားခဲ့တဲ့ စယ်လန့်ကျေးရွာ ပစ်ခတ်မှုအတွင်း TNLA ဘက်မှ ၄ ဦး အသက်ဆုံးရှုံးကာ ၂ ဦး ပြင်းထန် ဒဏ်ရာရရှိခဲ့သလို SSPP ဘက်က တပ်ဖွဲ့ဝင် ၄ ဦး အသက်ဆုံးရှုံးပြီး ၂ ဦး ဒဏ်ရာရရှိခဲ့တယ်လို့ TNLAက ထုတ်ပြန်ပါတယ်။
SSPP ရဲ့ ဒီကနေ့ ထုတ်ပြန်ချက်မှာတော့ TNLA ဘက်က ၅ ဦးထက်မနည်း ကျဆုံးပြီး SSPP ဘက်က တိုက်ပွဲ အတွင်း တစ်ဦး ကျဆုံးကာ ၂ ဦး ဖမ်းဆီး သတ်ဖြတ် ခံခဲ့ရတယ်လို့ ဖော်ပြထားပါတယ်။
ဒါပေမယ့် SSPP က စတင်ပစ်ခတ်တယ်လို့ TNLA က ဆိုထားပြီး TNLA က စတင် ပစ်ခတ်တာလို့ SSPP က ပြောဆိုထားပါတယ်။
1027 စစ်ဆင်ရေးမှာ တာဝန်ယူနေတဲ့ PSLF/ TNLA တပ်စု တစ်စုကို SSPP/SSA တပ်ဖွဲ့ဝင် ၁၀ ဦး ပါဝင်တဲ့ အဖွဲ့က စတင် ပစ်ခတ် တိုက်ခိုက်ခဲ့ အတွက် အပြန်အလှန် ပစ်ခတ်မှု ဖြစ်ပွားခဲ့ရတာလို့ TNLA ရဲ့ ထုတ်ပြန်ချက်မှာ ဖော်ပြပါတယ်။
SSPP ရဲ့ ထုတ်ပြန်ချက်မှာတော့ TNLA တပ်ဖွဲ့က စယ်လန့် ဒေသခံ စိုင်းမောဝ်အွန် ကို ဖမ်းဆီးသွားတဲ့ အတွက် အကြောင်းအရင်း သိရဖို့ TNLA တပ်ထံ အကျိုးအကြောင်း သွားမေးရာက TNLA က ဝိုင်းဝန်းပိတ်ဆို့ပြီး စတင် ပစ်ခတ်လို့ တိုက်ပွဲ ဖြစ်ပွားခဲ့တာလို့ ဖော်ပြထားပါတယ်။
အခုလို ပစ်ခတ်မှု မဖြစ်ပွားမီ နိုဝင်ဘာ ၆ ရက်နေ့မှာ TNLA ရဲ့ စခန်းတွေကို SSPPက ၈ ကြိမ် လာရောက် နှောက်ယှက်တာ၊ ဓာတ်ပုံရိုက်တာ ပြုလုပ်ခဲ့တဲ့ အတွက် ခေါ်ယူသတိပေးပြီး ပြန်လွှတ်ပေးခဲ့ပေမယ့် နိုဝင်ဘာ ၇ ရက်နေ့ မနက်မှာ SSPP ရဲ့ တိုက်နယ်မှူးဖြစ်သူ စိုင်းမောဝ်အွန်က ထပ်မံရောက်ရှိလာပြီး ဓာတ်ပုံရိုက်လို့ ခေါ်ယူ စစ်ဆေးခဲ့တယ်လို့ TNLA က ပြောပါတယ်။
အဲ့ဒီလို စစ်ဆေးမေးမြန်းချိန် SSPP မှ အရာရှိ စိုင်းလင်းနဲ့ အဖွဲ့ ရောက်ရှိလာပြီး TNLA ကို စတင် ပစ်ခတ်တာကြောင့် အပြန်အလှန် ပစ်ခတ်မှု ဖြစ်ပွားပြီး ၂ ဖက် ထိခိုက်သေဆုံးမှုအထိ ဖြစ်ပွားခဲ့တာလို့ TNLA ကပြောပါတယ်။
SSPP ရဲ့ ထုတ်ပြန်ချက်မှာတော့ ၂ ဖက် ပစ်ခတ်မှု အတွင်း ဖမ်းဆီးခံလိုက်ရတဲ့ SSPP ရဲ့ မြို့နယ်မှူး တစ်ဦးနဲ့ တပ်သား တစ်ဦးကို လူသားချင်း စာနာမှုအရ အသက်ချမ်းသာခွင့်ပေးဖို့ မေတ္တာရပ်ခံပေမယ့် TNLAက အသက်ချမ်းသာခွင့် မပေးခဲ့တာကြောင့် အသက်ဆုံးရှုံး ခဲ့ရတယ်လို့ ဖော်ပြထားပါတယ်။
လက်ရှိအချိန်မှာ အဖမ်းခံရတဲ့ စိုင်းမောဝ်အွန် ကို ပြဿနာ အချိန်မှီ ထိန်းသိမ်းနိုင်ဖို့နဲ့ မဟာမိတ်ကို ရှေးရှူသော အားဖြင့် ဒီကနေ့မှာ ရပ်မိရပ်ဖထံ ပြန်လည်အပ်နှံပြီး ဖြစ်တယ်လို့ TNLAက ပြောပါတယ်။
မြန်မာနိုင်ငံလုံးဆိုင်ဆို ရှမ်းလူငယ်ကွန်ယက်-TYNရဲ့ ထုတ်ပြန်ချက်မှာ စိုင်းမောဝ်အွန်ဟာ TYN ရဲ့ ခေါင်းဆောင်မှု အဖွဲ့ဝင် တစ်ဦးဖြစ်တယ်လို့ ဖော်ပြထားကာ ရှမ်းတိုင်းရင်းသားများ ဒီမိုကရေစီ အဖွဲ့ချုပ် -SNLDပါတီ လူငယ်ရေးရာ ကော်မတီရဲ့ ထုတ်ပြန်ချက်မှာတော့ SNLD ရဲ့ စယ်လန့်ကျေးရွာအုပ်စု အလုပ်အမှုဆောင် ကော်အတီ အတွင်းရေးမှူး ဖြစ်တယ်လို့ ဖော်ပြထားပါတယ်။
ဒါ့အပြင် SSPP ရဲ့ ထုတ်ပြန်ချက်မှာ အဖမ်းခံရတဲ့ စိုင်းမောဝ်အွန်ဟာ ဒေသခံ ရွာသားလို့ ဖော်ပြထားပြီး TNLA ရဲ့ ထုတ်ပြန်ချက်မှာတော့ စိုင်းမောဝ်အွန်ဟာ SSPP ရဲ့ တိုက်နယ်မှူး ဖြစ်တယ်လို့ ဖော်ပြထားပါတယ်။
SSPP နဲ့ TNLA တို့ဟာ မဟာမိတ်အဖွဲ့တွေ ဖြစ်ပေမယ့် ပြီးခဲ့တဲ့ စက်တင်ဘာ ၂၃ ရက်နေ့မှာလည်း ကွတ်ခိုင်မြို့နယ်၊ မိုင်းယုလေးဒေသမှာ နားလည်မှု လွဲမှားပြီး ၂ ဖက် ပစ်ခတ်မှု ဖြစ်ပွားခဲ့ပါတယ်။
အဲ့ဒီပစ်ခတ်မှု ဖြစ်ပွားပြီးနောက် ၂ ဖက် ခေါင်းဆောင်များ တွေ့ဆုံကာ နောက်နောင် ထပ်မံ မဖြစ်ပွားစေရေးနဲ့ ပြဿနာ ပေါ်ပေါက်လာပါက မဟာမိတ်အဖွဲ့ အချင်းချင်း အကောင်းဆုံး ညှိနှိုင်း တွေ့ဆုံ ဖြေရှင်းကြဖို့ သဘောတူခဲ့ကြပါတယ်။
CJ-002
#MekongNews
#စယ်လန့်ကျေးရွာ
#SSPP
#TNLA
