မဲခေါင်၊ ဇွန် ၂၆
ထိုင်းနိုင်ငံ၊ ဘန်ကောက်မြို့၊ လတ်ကရာဗန်းခရိုင်အတွင်းရှိ ချာလောင်ကရွန်လမ်းပေါ်တွင် ယနေ့ညနေပိုင်းက မိုးသက်လေပြင်း ကျရောက်ခဲ့မှုကြောင့် လျှပ်စစ်ဓာတ်တိုင် ၄၀ ခန့် လဲပြိုခဲ့ပြီး၊ ယင်းဒေသတစ်ခုလုံးတွင် လျှပ်စစ်မီးနှင့် အင်တာနက်လိုင်းများ ပြတ်တောက်သွားခဲ့ကြောင်း သိရသည်။
ညနေ ၅ နာရီခွဲဝန်းကျင်တွင် ယင်းဖြစ်ပွားခဲ့ပြီး ချာလောင်ကရွန်လမ်းပေါ်ရှိ လမ်းသွယ် ၃၁ နှင့် ၅၇ အကြား ၂ ကီလိုမီတာခန့် ရှည်လျားသော လမ်းပိုင်းကို ထိခိုက်ခဲ့ကြောင်း လတ်ကရာဗန်းခရိုင် အုပ်ချုပ်ရေးရုံးက ထုတ်ပြန်သည်။
ဓာတ်တိုင်များသည် လမ်း၏ဝဲယာနှစ်ဖက်စလုံးတွင် လဲပြိုကျခဲ့သဖြင့် လမ်းကြောင်းတစ်ခုလုံး လုံးဝဖြတ်သန်း၍ မရအောင် ပိတ်ဆို့သွားခဲ့သည်။
ဒေသခံမျက်မြင်သက်သေများ၏ ပြောကြားချက်အရ ပြင်းထန်သော လေဆင်နှာမောင်းသဏ္ဌာန် လေဝဲကြီးတစ်ခု ထိုဧရိယာအတွင်း ဖြတ်သန်းတိုက်ခတ်သွားပြီး ဓာတ်တိုင်များကို လဲပြိုစေခဲ့ခြင်းဖြစ်ကြောင်း ရဲတပ်ဖွဲ့က ကိုးကားဖော်ပြသည်။
ထို့ပြင် နေအိမ်အများအပြား အမိုးများလန်ထွက်ပျက်စီးခဲ့ကာ ယာဉ်အစီးရေ ၃၀ ခန့်လည်း ထိခိုက်ပျက်စီးခဲ့ရပြီး၊ အနည်းဆုံး ၂ ဦးမှာ ၎င်းတို့၏ ကားများအတွင်း ပိတ်မိနေခဲ့ကြောင်း သိရသည်။
မျက်မြင်များ၏ ပြောပြချက်အရ ဆီဒင်အမျိုးအစား ကိုယ်ပိုင်အစီးငယ်တစ်စီးမှာ လဲပြိုကျလာသည့် လျှပ်စစ်ဓာတ်တိုင်ကြောင့် ကားရှေ့ပိုင်း ကြေမွပျက်စီးသွားခဲ့ပြီး ယာဉ်မောင်းဖြစ်သူမှာ ကားအတွင်း၌ ပိတ်မိနေခဲ့ကြောင်း သိရသည်။
ရူအမ်ကတညုဖောင်ဒေးရှင်းမှ ကယ်ဆယ်ရေးသမားများနှင့် ဒေသခံပြည်သူများသည် ဖြတ်တောက်ရေးကိရိယာများကို အမြန်ယူဆောင်ကာ သည်းထန်စွာ ရွာသွန်းနေသည့် မိုးထဲရေထဲ၌ အချိန်နှင့်လု၍ သွားရောက်ကူညီခဲ့ကြသည်။
ကယ်ဆယ်ရေးသမားများသည် အခင်းဖြစ်ပွားရာနေရာ၌ ဒဏ်ရာရရှိသူ ၃ ဦးကို ရှေးဦးသူနာပြုစုခြင်းများ ပြုလုပ်ပေးခဲ့ပြီးနောက် အနီးရှိဆေးရုံသို့ ပို့ဆောင်ပေးခဲ့သည်။
ယခုဖြစ်စဉ်ကြောင့် လူသေဆုံးမှုရှိကြောင်း သတင်းထုတ်ပြန်ချက် မရှိသေးပေ။
အိမ်ခြေနှင့် စီးပွားရေးလုပ်ငန်း ရာပေါင်းများစွာတွင် လျှပ်စစ်မီးနှင့် အင်တာနက်လိုင်းများ ပြတ်တောက်မှုဒဏ်ကို ရင်ဆိုင်နေရသဖြင့် မြို့တော်လျှပ်စစ်အာဏာပိုင်အဖွဲ့မှ ဝန်ထမ်းများသည် လဲပြိုကျနေသည့် ဓာတ်တိုင်များနှင့် လျှပ်စစ်ကေဘယ်ကြိုးများကို ဖယ်ရှားကာ လျှပ်စစ်မီး ပြန်လည်ရရှိစေရန် အချိန်လု ကြိုးပမ်းနေကြသည်။
Ref:Bangkok Post
#MeKongNews
#ဘန်ကောက်
#မိုးသက်လေပြင်း
#ဓာတ်တိုင်
#လဲပြို
