မဲခေါင်၊ ဇွန် ၁၅
စစ်ကောင်စီ၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ – NSPNC နှင့် ရှမ်းပြည်တိုးတက်ရေးပါတီ -SSPPတို့ နေပြည်တော်တွင် ဇွန် ၁၂ ရက်၌ တွေ့ဆုံဆွေးနွေးခဲ့ကြသည်။
တွေ့ဆုံမှုအတွင်း စစ်ကောင်စီဘက်က NCA ထိုးထားသည့်အဖွဲ့နှင့် မထိုးသည့်အဖွဲ့များ ပါဝင်သည့် NCA Plus ကဲ့သို့ အကောင်အထည်ဖော်မည့် ငြိမ်းချမ်းရေးလုပ်ငန်းစဉ်ကို လျာထားကြောင်း၊ အွန်လိုင်းလိမ်လည်မှုနှင့် ပတ်သက်သည့် ကိစ္စများအား ဆောင်ရွက်မှုမရှိစေရေး SSPP နှင့် ပူးပေါင်းဆောင်ရွက်နိုင်ရန်အတွက် စဉ်ဆက်မပြတ် ထိတွေ့လိုကြောင်း၊ SSPP အဖွဲ့၏ ငြိမ်းချမ်းရေးနှင့် ပတ်သက်ပြီး ရှေ့ဆက်ဆောင်ရွက်မည့် လုပ်ငန်းစဉ်များအား ဆွေးနွေးရန် ပြောကြားခဲ့သည်ဟု စစ်ကောင်စီထုတ်ပြန်ချက်တွင် ဖော်ပြသည်။
ရှမ်းပြည်တိုးတက်ရေးပါတီ – SSPP ဘက်ကမူ ငြိမ်းချမ်းရေးသည် အမှန်တကယ်လိုအပ်ပြီး SSPPအနေဖြင့် နိုင်ငံရေးပြဿနာကို နိုင်ငံရေးနည်းဖြင့်ဖြေရှင်းရန် အမြဲတောင်းဆိုခဲ့ကြောင်း၊ ဖြစ်နိုင်သည့်ကိစ္စများကို ဦးစားပေး ဆွေးနွေးသွားမည်ဖြစ်ကြောင်း SSPP ဒုတိယဥက္ကဌ ၂ စဝ်ခွန်ဆိုင်က ပြန်လည်ဆွေးနွေးခဲ့ကြောင်း ထုတ်ပြန်ချက်အရ သိရသည်။
ယင်းတွေ့ဆုံဆွေးနွေးမှုတွင် SSPP ကိုယ်စားလှယ်များကို ဒုတိယဥက္ကဌ-၂ ဒုတိယဗိုလ်ချုပ်ပြီး စဝ်ခွန်ဆိုင် ဦးဆောင်ခဲ့ပြီး စစ်ကောင်စီဘက်တွင်မူ NSPNC ဥက္ကဌ ဒုတိယဗိုလ်ချုပ်ကြီး ရာပြည့်က ဦးဆောင်ဆွေးနွေးခဲ့သည်။
ထို့ပြင် တွေ့ဆုံမှုအတွင်း တန်းတူရေးကို အခြေခံပြီး ကိုယ်ပိုင်ပြဋ္ဌာန်းခွင့်ရှိသည့် ဒီမိုကရေစီနှင့် ဖက်ဒရယ်စနစ်တို့ကို အခြေခံသည့် ပြည်ထောင်စုပေါ်ထွန်းရေး၊ ယုံကြည်မှုထိခိုက်စေသည့် ဖြစ်စဉ်များအပေါ် သင်ခန်းစာယူပြီး ထပ်မံမဖြစ်ပွားအောင် အလေးထားဆောင်ရွက်ရေး၊ အွန်လိုင်းလိမ်လည်မှု တိုက်ဖျက်ရေး၊ မူးယစ်ဆေးဝါးတိုက်ဖျက်ရေး စသည်များကို အပြန်အလှန် ဆွေးနွေးခဲ့ကြသည်ဟုလည်း ဆိုသည်။
နှစ်ဖက်တွေ့ဆုံဆွေးနွေးမှုနှင့်ပတ်သက်ပြီး အသေးစိတ် ထပ်မံသိရှိနိုင်ရန် SSPP ပြောရေးဆိုခွင့်ရှိသူများကို ထပ်မံမေးမြန်းရန် ဆက်သွယ်ခဲ့သော်လည်း ဖုန်းလက်ခံ ဖြေဆိုခြင်းမရှိပေ။
ရှမ်းပြည်တိုးတက်ရေးပါတီ – SSPP သည် ပြည်နယ်အဆင့် နှင့် ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးလက်မှတ် ထိုးထားသော်လည်း တနိုင်ငံလုံးဆိုင်ရာပစ်ခတ်တိုက်ခတ်မှုရပ်စဲရေးစာချုပ်-NCAတွင်မူ လက်မှတ်ရေးထိုးထားခြင်း မရှိသည့်အဖွဲ့ ဖြစ်သည်။
#MeKongNews
#စစ်ကောင်စီ
#SSPP
#နေပြည်တော်
#တွေ့ဆုံ
