မဲခေါင်၊ ဧပြီ ၃၀
ထိုင်းဝန်ကြီးချုပ်ဟောင်း သက်ဆင်ရှာနာဝပ်သည် လာမည့် မေ ၁၁ ရက်တွင် ပြစ်ဒဏ်ကာလ ကုန်ဆုံးသည်အထိ အီလက်ထရွန်းနစ်ခြေရာခံကိရိယာ ဝတ်ဆင်ထားရမည့် ခံဝန်ဖြင့် ပြန်လည် လွတ်မြောက်လာရန် သေချာနေပြီ ဖြစ်သည်။
၎င်းသည် အသက် ၇၀ နှစ်နှင့်အထက် ဖြစ်နေခြင်း၊ ကျန်ရှိသော ပြစ်ဒဏ်ကာလမှာ တစ်နှစ်အောက်သာ ရှိတော့ခြင်း၊ ပြန်လည် ပြုပြင်ပြောင်းလဲရေးနှင့် အပြုအမူပိုင်းဆိုင်ရာ ကောင်းမွန်လာစေရန် လေ့ကျင့်မှုများကို ခံယူခဲ့ပြီးနောက် ၎င်း၏ သဘောထားနှင့် အပြုအမူများမှာ အကောင်းဘက်သို့ ပြောင်းလဲလာမည်ဟု ယုံကြည်ရခြင်းတို့ကြောင့် ခံဝန်ဖြင့် ပြန်လည်လွှတ်ပေးရန် သတ်မှတ်ချက်များနှင့် ကိုက်ညီရခြင်း ဖြစ်သည်။
ထို့ပြင် ပြစ်မှု ထပ်မံကျူးလွန်နိုင်ခြေ အလွန်နည်းပါးသည်ဟု သုံးသပ်ခြင်းတို့ကြောင့်လည်း ဖြစ်သည်။
ယခုမှစ၍ ၁၁ ရက်အကြာတွင် ဖွေထိုင်းပါတီ၏ အဓိပတိ သက်ဆင်သည် အကျဉ်းထောင်ပြင်ပတွင် လွတ်လပ်ခွင့်ကို ပြန်လည်ရရှိတော့မည်ဖြစ်သော်လည်း နောက်ထပ် လေးလကြာသည်အထိ ခံဝန်စောင့်ကြည့်မှုအောက်တွင် ရှိနေဦးမည် ဖြစ်သည်။
၎င်းသည် ယခုနှစ် စက်တင်ဘာ ၉ ရက်တွင်မှ ကျခံထားရသော တစ်နှစ်ထောင်ဒဏ်မှ အပြီးတိုင် လွတ်မြောက်မည်ဟု မျှော်လင့်ရသည်။
ထိုသတင်းကောင်းသည် ဖွေထိုင်းနှင့် သက်ဆင်ကို ထောက်ခံသော ရှပ်နီအဖွဲ့ဝင်များအတွက် လာမည့် မေလ ၁၀ ရက်မှ ၁၁ ရက်အတွင်း ကျင်းပရန် ပြင်ဆင်ထားသည့် အခမ်းအနားကြီးနှင့်လည်း တိုက်ဆိုင်နေသည်။
ဖွေထိုင်းဘက်တော်သား ရှပ်နီထောက်ခံသူများအကြား ပျံ့နှံ့နေသော အချက်အလက်များအရ မေ ၁၁ ရက် နံနက်ပိုင်းတွင် ဝန်ကြီးချုပ်ဟောင်း သက်ဆင် အကျဉ်းထောင်မှ ထွက်လာမည်ကို ကြိုဆိုရန် မေ ၁၀ ရက် နေ့လယ် ၂ နာရီမှစတင်၍ ညနေပိုင်းအထိ စင်များဆောက်လုပ်ကာ ဂုဏ်ပြုပွဲများ ပြုလုပ်သွားမည်ဖြစ်ကြောင်း သိရသည်။
သက်ဆင်၏ ခံဝန်လွတ်မြောက်ခွင့်သည် အခြေခံမူများ၊ လူ့ဂုဏ်သိက္ခာ၊ နိုင်ငံသားဖြစ်မှု အခွင့်အရေးနှင့် တရားစီရင်ရေး ထုံးတမ်းစဉ်လာရှိ အထူးလွတ်ငြိမ်းချမ်းသာခွင့် မူဝါဒတို့နှင့် ကိုက်ညီသည့်အတွက် ၎င်းအနေဖြင့် သဘောတူကြောင်း အယူခံတရားရုံး တရားသူကြီးချုပ်ဟောင်း ဆူရော့ချန်သရာဖီထပ်က ပြောကြားခဲ့သည်။
“၂၀၀၆ ခုနှစ်ကတည်းက စီရင်ချက်တွေအရ ဝန်ကြီးချုပ် သက်ဆင်ရရှိခဲ့တဲ့ အကျိုးဆက်တွေဟာ လက်တွေ့ကျတဲ့ ဥပဒေစံနှုန်းတွေထက် ကျင့်ဝတ်ဆိုင်ရာ စံနှုန်းတွေကို ပိုပြီး ထင်ဟပ်နေပါတယ်။ ဒါကြောင့် သူဟာ ဥပဒေကို လေးစားလိုက်နာပြီး ရလဒ်တွေကို လက်ခံခဲ့တာကြောင့် လူ့အဖွဲ့အစည်းအနေနဲ့ သူ့ကို အခွင့်အရေးတစ်ခု ပေးသင့်ပါတယ်” ဟု ၎င်းက ဆိုသည်။
ထို့ပြင် ယခုနှစ် ဖေဖော်ဝါရီ ၉ ရက်တွင် ထွက်ပေါ်ခဲ့သော စီရင်ချက်ကို သက်ဆင်အနေဖြင့် ထွက်ပြေး တိမ်းရှောင်ခြင်း မရှိဘဲ ရင်ဆိုင်ခဲ့ခြင်းသည် ၎င်း၏ စိတ်ဓာတ်နှင့် ပြတ်သားမှုကို ပြသနေခြင်းဖြစ်ကြောင်း၊ ထို့ကြောင့် ထိုင်းလူ့အဖွဲ့အစည်းအနေဖြင့် ၎င်းအပေါ် ထားရှိသော အစွဲအလမ်းများကို ကျော်လွှားသင့်ကြောင်း ဆူရော့က ထောက်ပြခဲ့သည်။
နိုင်ငံရေးအခြေအနေနှင့် ပတ်သက်၍ သတင်းများအရ သက်ဆင်သည် လွတ်မြောက်ပြီးနောက် ချန်ဆောင်လား နေအိမ်တွင် ရှင်နာဝပ်ထရာ မိသားစုနှင့်အတူ အချိန်အနည်းငယ် ဖြတ်သန်းမည်ဖြစ်သည်။
ထို့နောက် သင့်တော်သည့်အချိန်တွင်မှ ဖွေထိုင်းပါတီ လွှတ်တော်ကိုယ်စားလှယ်များ၏ လာရောက်တွေ့ဆုံ ဂါရဝပြုမှုကို လက်ခံသွားမည်ဟု မျှော်လင့်ရသည်။
မေ ၁၁ ရက်နောက်ပိုင်း ၎င်း၏ နိုင်ငံရေးအခန်းကဏ္ဍနှင့် ပတ်သက်၍မူ သက်ဆင်သည် ရှေ့တန်းမှပါဝင်မှုကို လျှော့ချသွားဖွယ်ရှိပြီး နိုင်ငံရေးအရ ချက်ချင်း လှုပ်ရှားမှုမျိုး ပြုလုပ်ရန် မရှိနိုင်ပေ။
အကြောင်းမှာ ၎င်းအနေဖြင့် ခံဝန်စည်းကမ်းချက်များကို လိုက်နာရမည် ဖြစ်သောကြောင့် ရဲဆေးရုံတွင် ရှိနေစဉ်ကာလကကဲ့သို့ မီဒီယာများရှေ့တွင် အတွေ့ရများမည်မဟုတ်ကြောင်း ခန့်မှန်းရသည်။
Ref: The Nation
#MeKongNews
#ထိုင်းဝန်ကြီးချုပ်ဟောင်း
#သက်ဆင်
#ခံဝန်
#ပြန်လွတ်
