မဲခေါင်၊ ဧပြီ ၂
ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ (Steering Council for the Emergence of a Federal Democratic Union – SCEF) ဖွဲစည်းနိုင်မှုအပေါ် ဒေသအခြေပြု CDM နိုင်ငံ့ဝန်ထမ်းများကောင်စီများ(ရှမ်းပြည်နယ် CDM ကောင်စီ(ယာယီ) အပါအဝင် CDM ဒေသကောင်စီ ၈ ခု) က ကြိုဆိုထောက်ခံကြောင်း ပူးတွဲကြေညာ ချက်တစ်ရပ်ကို ယမန်နေ့ ဧပြီ ၁ ရက်တွင် ထုတ်ပြန်လိုက်သည်။
ယင်းကြေညာချက်တွင် ပြီးခဲ့သည့် မတ် ၃၀ ရက်တွင် ဖွဲ့စည်းလိုက်သည့် SCEF အဖွဲ့ကို လှိုက်လှဲစွာ ကြိုဆိုထောက်ခံကြောင်းနှင့် အာဏာရှင်စနစ် အပါအဝင် မည်သည့် အာဏာရှင်စနစ်ကိုမဆို အမြစ်ပြတ်ဖယ်ရှားရေး၊ စစ်တပ်၏ နိုင်ငံရေးတွင် ပါဝင်ပတ်သက်မှုကို အပြီးတိုင် အဆုံးသတ်ရေး၊ ၂၀၀၈ ဖွဲစည်းပုံအခြေခံဥပဒေအား အပြီးတိုင်ဖျက်သိမ်းရေး နှင့် အသွင်ကူးပြောင်းရေးကာလ တရားမျှတမှု ဖော်ဆောင်ရေး စသည့် နိုင်ငံရေးဦးတည်ချက် (၆) ရပ်သည် CDM ဝန်ထမ်းများ၏ ခိုင်မာသော ရပ်တည်ချက်၊ မျှော်မှန်းချက်များနှင့် ထပ်တူကျလျက်ရှိသည်ဟု ဆိုသည်။
အထူးသဖြင့် ပြည်နယ် / ဖက်ဒရယ်ယူနစ်များအကြား မျှဝေသုံးစွဲသော အချုပ်အခြာ အာဏာ (Shared Sovereignty) နှင့် စုပေါင်းခေါင်းဆောင်မှု (Collective Leadership) မူဝါဒများအပေါ် အခြေခံခြင်းသည် အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့် အပြည့်အဝရှိသော ဖက်ဒရယ်ဒီမိုကရေစီ ပြည်ထောင်စုသစ်ဆီသို့ လျှောက်လှမ်းရာတွင် ခိုင်မာကောင်းမွန် သော အုတ်မြစ်တစ်ခု ဖြစ် လာမည်ဟု လေးနက်စွာ ရှုမြင်သည်ဟု ထုတ်ပြန်ချက်က ဆိုသည်။
CDM နိုင်ငံ့ဝန်ထမ်းများသည် စစ်အာဏာရှင် စနစ်၏ မည်သည့် ယန္တရားကိုမဆို ငြင်းပယ်တော်လှန်ခဲ့ကြသူများဖြစ်သည်နှင့်အညီ၊ ယခုပေါ်ပေါက်လာသော SCEF သည် တော်လှန်ရေးအဖွဲ့အစည်းအသီးသီး၏ စစ်ရေး၊ နိုင်ငံရေးလှုပ်ရှားမှုများကို တရားဝင်မှုရှိသော ခေါင်းဆောင် မှုဖြင့် စုစည်းညှိနှိုင်းပေးခြင်းအားဖြင့် အာဏာရှင်စနစ် အမြစ်ပြတ်ရေးအတွက် အရှိန်အဟုန် မြှင့်တင်ပေးနိုင်မည့် နိုင်ငံရေး အခင်းအကျင်းသစ် တစ်ခုဖြစ်ကြောင်း ယုံကြည်သည်ဟု ဖော်ပြထားသည်။
ထို့ပြင် ဖက်ဒရယ်ပြည်ထောင်စုသစ် တည်ဆောက်ရေးဟူသည့် ဘုံရည်မှန်းချက် အောင်မြင်နိုင်စေရန်ဒေသကောင်စီ ၈ ခုမှ CDM နိုင်ငံ့ဝန်ထမ်းများ အားလုံးသည် SCEF ၏ မူဝါဒလမ်းညွှန်ချက်များအတိုင်း တော်လှန်ရေးအောင်ပွဲ အမြန်ဆုံး ရရှိစေရေးနှင့် အသွင်ကူး ပြောင်းရေးကာလ အစီအမံများကို အကောင်အထည် ဖော်ဆောင်ရာတွင် မိမိတို့ ကျရာကဏ္ဍမှ ပူးပေါင်းပါဝင်သွားမည် ဖြစ်ကြောင်း သဘောထား ထုတ်ပြန် အပ်ပါသည်ဟု ဖော်ပြပါရှိသည်။
ယင်းကြေညာချက်ကို ပူးတွဲထုတ်ပြန်သည့် အဖွဲ့အစည်းများမှာကချင်ပြည်နယ် CDM နိုင်ငံ့ဝန်ထမ်းများကောင်စီ (KSCCSC)၊ ကရင်နီပြည် နိုင်ငံ့ဝန်ထမ်း အကြမ်းမဖက် အာဏာဖီဆန်ရေးလှုပ်ရှားမှုကောင်စီ (KSCSC-CDM)၊ စစ်ကိုင်းဖက်ဒရယ်ယူနစ် CDM နိုင်ငံ့ဝန်ထမ်းများကောင်စီ (CCSC-SFU)၊ ပဲခူးဒေသ CDM နိုင်ငံ့ဝန်ထမ်းကောင်စီ (BRCC)၊ မန္တလေးဒေသ အကြမ်းမဖက် အာဏာဖီဆန်ရေးအဖွဲ့ (MCDMO)၊ မွန်ပြည်နယ် CDM နိုင်ငံ့ဝန်ထမ်းများကောင်စီ (CCSC-MON)၊ ရန်ကုန်ဖက်ဒရယ်ယူနစ် CDM၊ နိုင်ငံ့ဝန်ထမ်းများအဖွဲ့အ စည်း(YFCCO) နှင့် ရှမ်းပြည်နယ် CDM ကောင်စီ (ယာယီ) တို့ဖြစ်ကြောင်း ကြေညာချက်အရ သိရသည်။
SCEF တွင် အမျိုးသား ညီညွတ်ရေးအစိုးရ (NUG)၊ ပြည်ထောင်စုလွှတ်တော် ကိုယ်စားပြုကော်မတီ (CRPH) တို့နှင့်အတူ ကရင်အမျိုးသားအစည်းအရုံး (KNU)၊ ကချင်လွတ်လပ်ရေးအဖွဲ့ (KIO)၊ ကရင်နီအမျိုးသား တိုးတက်ရေးပါတီ (KNPP) နှင့် ချင်းအမျိုးသားတပ်ဦး (CNF) တို့ ပါဝင်ကြသည်။
#MeKongNews
#SCEF
#ကြိုဆို
#ရှမ်းပြည်
#CDM
#ဒေသကောင်စီ
