မဲခေါင်၊ မတ် ၃၁
ကိုးကန့်တပ်ဖွဲ့ – MNDAA ထိန်းချုပ်ထားသည့် ကြူကုတ် ပန်ဆိုင်းမြို့တွင် လက်နက်ကိုင် လူတစ်စုက လူငယ်တဦးကို ပြန်ပေးဆွဲပြီး ကျပ်သိန်း ၄၅၀ ဖြင့် ပြန်လည်ရွေးခိုင်းခဲ့ရာ ငွေလွှဲပေးခဲ့သော်လည်း လူကိုပြန်မလွှတ်ပေးကြောင်း သတင်းရင်းမြစ်များထံမှ သိရသည်။
ရှမ်းပြည်မြောက်ပိုင်း၊ သိန္နီမြို့နယ်နေ လူငယ်တစ်ဦးသည် ပန်ဆိုင်း ကြူကုတ်မြို့တွင် အလုပ်လုပ်နေရာမှ လက်နက်ကိုင်လူတစုက ပြန်ပေးဆွဲသွားခဲ့ခြင်းဖြစ်သည်။
ပြန်ပေးသမားများက ပြန်ရွေးငွေ သိန်း ၄၅၀ တောင်းဆိုရာတွင် မိသားစုဝင်များက ရှိသမျှ ပစ္စည်းဥစ္စာများ ရောင်းချကာ ရရှိလာသည့် သိန်း ၁၇၀ အား ပြန်ပေးသမားများကို လွှဲပေးခဲ့သည်ဟု သတင်းရင်းမြစ်က ပြောသည်။
“ပြန်ပေးသမားတွေကို တောင်းပန်ပြီး ရှိသမျှရောင်းချလို့ ရတဲ့ငွေ သိန်း ၁၇၀ ကို မိသားစုဝင်တွေက လွှဲပေးလိုက်တာ၊ ငွေလွှဲပေးပြီးတော့လည်း အခုထိ လူက ပြန်မလွတ်လာဘူး။ ငွေရတာနဲ့ ပြန်ပေးသမားတွေက အဆက်အသွယ် ဖြတ်တောက်သွားလိုက်တာ”ဟု ဖြစ်စဉ်ကို သိရှိသည့် သတင်းရင်းမြစ်တစ်ဦးက ပြောသည်။
ပြန်ပေးဆွဲခံရသူသည် အသက် ၂၅ နှစ်အရွယ် မောင်ကျောခေဖြစ်ပြီး သိန္နီမြို့နယ်၊ မိုင်းပါးကျေးရွာအနီး ကောင်းခါးရွာမှ ဖြစ်သည်ဟု သတင်းရင်းမြစ် ၏ ပြောပြချက်အရ သိရသည်။
မောင်ကျောခေသည် ပြီးခဲ့သည့် ၂၀၂၅ ခုနှစ်ကတည်းက ကိုးကန့်တပ်ဖွဲ့ ထိန်းချုပ်ထားသည့် ပန်းဆိုင်း ကြူကုတ်မြို့ရှိ ဆံပင်ညှပ်ဆိုင်တစ်ဆိုင်တွင် အလုပ် သွားလုပ်နေသူ ဖြစ်ပြီး မတ် ၁ ရက်တွင် လက်နက်ကိုင် လူတစ်စု၏ ပြန်ပေးဆွဲခံခဲ့ရခြင်း ဖြစ်သည်။
“မတ်လ ၁ ရက်နေ့မှာ ပြန်ပေးဆွဲခံရတယ်။ မတ်လ ၅ ရက်နေ့မှာ သူဆက်သွယ်လာပြီး ပိုက်ဆံ သိန်း ၄၅၀ ပေးရမယ်လို့ ပြောတယ်။ မပေးရင် သတ်ပစ်ခံရမယ်လို့လည်း ပြောတယ်။ အဲဒါမိသားစုက ရှိသမျှ ရောင်းချပြီး ၁၇၀ သိန်းကို လွှဲပေးလိုက်တာ၊ လူက အခုထိ ပြန်မလွတ်လာသေးဘူး။ တခုခုဖြစ်သွားမှာလည်း သူ့မိသားစုက အလွန် စိုးရိမ်နေတယ်”ဟု မိသားစုနှင့် နီးစပ်သူတစ်ဦးက ပြောသည်။
မောင်ကျောခေ၏ မိသားစုဝင်များသည် ကျေးလက်နေ သာမန် မိသားစုများသာ ဖြစ်သဖြင့် ပြန်ပေးသမားများ တောင်းသည့် သိန်း ၄၅၀ကို ပေးနိုင်စွမ်းမရှိသော်လည်း အိမ်တွင်ရှိသည့် ပစ္စည်းများကို ရောင်းချကာ ပြန်လွှတ်ပေးမည်ဆိုသည့် မျှော်လင့်ချက်ဖြင့် သိန်း ၁၇၀ ကို လွှဲပြောင်းပေးခဲ့ခြင်း ဖြစ်သည်။
“သူတို့လည်း ရှိတဲ့လူမဟုတ်ဘူး။ သာမန်မိသားစုပဲ ၊ ပိုက်ဆံပေးရင် လွတ်မယ်ဆိုလို့ ရှိသမျှ ရောင်းချပြီး လွှဲပေးလိုက်တာ။ ပြန်ပေးသမားတွေက ပိုက်ဆံပေးရင် မိုင်းယု ၁၀၅ မိုင်မှာ ပြန်လာပို့ပေးမယ်လို့ ပြောတယ်။ အဲဒါကြောင့် ငွေလွှဲပြီး ၁၀၅ မိုင်မှာ ၂ ရက်လောက် သွားစောင့်သေးတယ်။ ပြန်မလာပို့တဲ့အပြင်ကို အခုထိ အဆက်အသွယ်ပါ မရတော့ဘူး”ဟု ဖြစ်စဉ်ကို သိရှိသည့် သတင်းရင်းမြစ်ကပြောသည်။
အဆက်အသွယ်ရချိန်တွင် မောင်ကျောဖေ ပြောပြချက်အရ ပြန်ပေးဆွဲသမားများက အခန်းတစ်ခန်းထဲတွင် ၎င်းကို ပိတ်ထားပြီး ရိုက်နှက်နှိပ်စက်ကာ လက်သည်းလည်း အနှုတ်ခံထားရကြောင်း သတင်းရင်းမြစ်က ပြောသည်။
ကြူကုတ် ပန်ဆိုင်းမြို့ကို ၁၀၂၇ စစ်ဆင်ရေးအတွင်း ကိုးကန့်တပ်ဖွဲ့ – MNDAA က စစ်ကောင်စီကို တိုက်ထုတ်ပြီး သိမ်းပိုက်ခဲ့ခြင်း ဖြစ်သည်။
ပြီးခဲ့သည့် မတ် ၁၇ ရက်တွင်လည်း ကွတ်ခိုင်မြို့နယ်၊ ဟိုနားကျေးရွာတွင် ကိုးကန့်တပ်ဖွဲ့ဝင်များက ဒေသခံနေအိမ်ကို ဓားပြတိုက်ကာ ရွှေငွေများကို ယူဆောင်သွားခဲ့မှု ဖြစ်ပွားခဲ့သည်။
#MeKongNews
#ကြူကုတ်
#ပန်ဆိုင်း
#လူငယ်တစ်ဦးကို
#ပြန်ပေးဆွဲ
ဓာတ်ပုံ-CJ
