မဲခေါင်၊ မတ် ၁၇
ကျူးဘားကျွန်းနိုင်ငံသည် ဗင်နီဇွဲလားမှ ရေနံအဓိကတင်သွင်းရာ မဟာမိတ်နိုင်ငံဖြစ်ရာ ဗင်နီဇွဲလား သမ္မတ မာဂျူရိုကို အမေရိကန်ဘက်က ဖမ်းဆီးခေါ်ဆောင်သွားအပြီး မည်သည့် ရေနံတင်သင်္ဘောမှ ရောက်မလာသည်မှာ ၃ လကြာခဲ့ပြီဖြစ်သောကြောင့် ကျွန်းနေရာအားလုံးနီးပါး လျှပ်စစ်မီး ပြတ်တောက်သွားရပြီ ဖြစ်သည်။
ပြည်သူ ၁၀ သန်းကျော် လျှပ်စစ်မီးမရတော့ဘဲ ဗင်နီဇွဲလားအရေး စကတည်းက တစ်နေ့ နာရီ ၂၀ မီးပြတ်သည့်ဒဏ်ခံနေရသည့် ကျူးဘားပြည်သူများ ယခု အားလုံးနီးပါး မီးမရတော့သည့် အဖြစ်သို့ ရောက်ရှိပြီးနောက် ဒေါ်နယ်ထရမ့်က ကျူးဘားကို မိမိ ဆန္ဒရှိသည့်အလျှောက် မှောက်လိုမှောက် လှန်လိုလှန် သိမ်းလိုသိမ်းပိုက်နိုင်သည်ဟု Air Force One ပေါ်မှတဆင့် သတိပေးပြောကြားသွားခဲ့သည်။
ကျူးဘားသည် အမေရိကန်ကို စိန်ခေါ်ကာ ဗင်နီဇွဲလားအပြင် အဓိက မူးယစ်ဆေးဝါးတင်ပို့ရာ တောင်အမေရိကနိုင်ငံများနှင့် မဟာမိတ်လုပ်ပြီး အမေရိကန်သို့ မူးယစ်ဆေးသွင်းရာ ကွန်းထောက် ကျွန်းဖြစ်လာသောကြောင့် ဒေါ်နယ်ထရမ့်က အမေရိကန်နိုင်ငံ၏ ၅၁ ပြည်နယ်မြောက် ပြည်နယ်သစ် ဖြစ်လာနိုင်သည်ဟုဆိုကာ သိမ်းပိုက်ရန် ကြုံးဝါးထားဖူးသည်။
ယခုနောက်ဆုံး “ငယ်ငယ်ကတည်းက ကျွန်တော်တို့ကြားဖူးနေတာ ဘယ်တော့ ကျူးဘားကို အမေရိကန်သိမ်းမလဲ ဆိုတဲ့ အသံတွေပါ။ အခုကျွန်တော့်လက်ထက်မှာ ကျူးဘားကို တက်သိမ်းခဲ့မယ်ဆိုရင် ဂုဏ်ယူစရာကြီးပါ။ လက်ရှိကျူးဘားဆိုတာ အရာအားလုံး လဲပြိုနေတဲ့ ချိနဲ့နိုင်ငံ(weakened state) ပါ။ ဒါကြောင့် ကျွန်တော် သိမ်းချင်တယ်လို့ ခံစားရရင် သိမ်းလိုက်ရုံပဲ။ မသိမ်းချင်ဘူးဆိုလည်း သဘောအတိုင်းပဲ။ ခင်ဗျားတို့ အမှန်တရားကို သိချင်တယ်ဆိုရင်ပြောမယ်။ ကျူးဘားကို ကျွန်တော် လုပ်ချင်ရာ လုပ်နိုင်တယ်” ဟု ဒေါ်နယ်ထရမ့်က ပြောဆိုသွားခဲ့သည်။
သို့သော် ထရမ့်က လက်ရှိ အီရတ်နှင့်တိုက်ခိုက်နေသည့် အရှေ့အလယ်ပိုင်းအရေးပြီးမှ ကျူးဘားအရေး ဖြေရှင်းမည်ဟုဆိုကာ ရင်းနှီးချစ်ကြည်စွာဖြင့် ဆွေးနွေးပြီး သိမ်းယူသည်မျိုး မဖြစ်လျှင်လည်း ရန်သူလို သိမ်းယူမှုမျိုးဖြစ်နိုင်သည်ဟုပါ ကြုံးဝါးပြောဆိုသွားခဲ့သည်။
ကိုကလင်း
Ref: Thesun
#MeKongNews
#ကျူဘား
#ဒေါ်နယ်ထရမ့်
#လျှပ်စစ်မီး
#ရေနံ
