မဲခေါင်၊ ဖေဖော်ဝါရီ ၂၈
ယူကရိန်းကျူးကျော်စစ် ၄ နှစ်တင်းတင်းပြည့်ချိန်တွင် နှစ်ဖက်စလုံးမှ သန်းချီသေဆုံးနေရသည့် စစ်ပွဲကြီး ရပ်တန့်သင့်ပြီဟု ပူတင်၏ သမီးတော်ဟု လူသိများသော ပလေးဘွိုင်းမော်ဒယ် ကေစီနီယာဆော့ဘ်ချက်က ရဲရဲတင်းတင်း တိုက်တွန်း ပြောဆိုခဲ့သည်။
ပြီးခဲ့သည့် ဖေဖော်ဝါရီ ၂၄ ရက်သည် ယူကရိန်းအား ရုရှားကျူးကျော်မှု ၄ နှစ်တင်းတင်း ပြည့်မြောက်ခဲ့ရာ စစ်ပွဲရပ်တန့်မှ ဖြစ်မည်ဟု ယခင်တွင် ပလေးဘွိုင်းမော်ဒယ် လုပ်ခဲ့သလို လက်ရှိ မီဒီယာထူထောင်သူ အဖြစ်နှင့် ဆိုရှယ်ဆယ်လီ အဖြစ်ပါ လုပ်နေသည့် ၄၄ နှစ်အရွယ် ကေစီနီယာဆော့ဘ်ချက်က ပူတင်အား လူသိရှင်ကြား ရည်ရွယ် တိုက်တွန်ခဲ့ခြင်း ဖြစ်သည်။
ကေစီနီယာဆော့ဘ်ချက်၏ ဖခင်သည် စိန့်ပီတာစဘာ့ဂ် မြို့တော်ဝန်လည်း ဖြစ်ပြီး ပူတင်၏ နိုင်ငံရေး အကြံပေးတစ်ဦးလည်း ဖြစ်ကာ ဆော့ဘ်ချက်က အော်သိုဒေါ့ ခရစ်ယာန်ဘာသာ နှစ်ခြင်းခံခဲ့သောကြောင့် ပူတင်၏ သမီးတော် (Putin’s goddaughter) ဟု လူသိများခဲ့သည်။
ယူကရိန်းနှင့် ၎င်းအား အထောက်အပံ့ပေးသည့် နိုင်ငံများမှ အဓိက ပစ်မှတ်များကို နျူကလီးယားဒုံးကျည်ဖြင့် ပစ်ခတ်သင့်ပြီဟု ရုရှားသမ္မတဟောင်း မက်ဗီဒက်က ကြိမ်းမောင်း ပြောဆိုလာပြီးနောက် ဆော့ဘ်ချက်၏ ဝေဖန်မှုများ ထွက်ပေါ်လာခြင်း ဖြစ်သည်။
“ရုရှားတွေ သေဆုံးနေရတယ်။ ယူကရိန်းသားတွေလည်း သေဆုံးနေရတယ်။ တစ်ခါတရံ မျက်စိတစ်မှိတ်အတွင်း သေဆုံးနေကြပြီး တချို့က နာကျင်မှုတွေခံစားနေရပြီးမှ သေဆုံးကြရတယ်။ ၂ နိုင်ငံစလုံးရဲ့ မြို့တွေဟာ အပူပေးနိုင်စွမ်း၊ အလင်းပေးနိုင်စွမ်း မရှိဘဲ အေးခဲနေကြတယ်။ ဒါကြောင့် လုံး၀ ရပ်တန့်သင့်ပါပြီ။ ၂ နိုင်ငံစလုံး ဒီစစ်ပွဲကြောင့် နောက်ဆက်တွဲ ရေရှည်ဆိုးကျိုးတွေကို ခံစားရဦးမယ်” ဟု ၎င်းက ဆိုသည်။
၄ နှစ်တာကျူးကျော်စစ်အတွင်း ရုရှားစစ်သား သေဆုံးမှုသည် ၁ ဒသမ ၂၅ သန်းရှိခဲ့ပြီဖြစ်ပြီး ဒုတိယကမ္ဘာစစ်ကြီးအတွင်း ကျဆုံးခဲ့သည့် အမေရိကန်စစ်သား အရေအတွက်ထက်ပင် များနေပြီဖြစ်ကာ အနောက်နိုင်ငံ အကြီးအကဲများ အကဲဖြတ်မှုအရ နိုဝင်ဘာလနောက်ပိုင်း ရုရှားစစ်သားများ လစဉ် ၄ သောင်းဝန်းကျင် သေဆုံးနေသည်ဟု ယုံကြည်ရသည်။
ကိုကလင်း
Ref: Thesun
#MeKongNews
#ယူကရိန်းစစ်ပွဲ
#ရပ်တန့်
#ပူတင်
#ပလေးဘွိုင်းမော်ဒယ်
