မဲခေါင်၊ဖေဖော်ဝါရီ ၂၂
ပြီးခဲ့သည့် ဖေဖော်ဝါရီ ၁၉ ရက်က အီတလီနိုင်ငံ မီလန်မြို့ရှိ UniCredit ဘဏ်ခွဲတစ်ခု ငွေတိုက်အတွင်း ၂၄ နှစ်အရွယ် ဘင်္ဂလားဒေ့ရှ် နိုင်ငံသားတစ်ဦး ဝင်ရောက်ခိုးယူမှု၌ ဘဏ်ငွေတိုက်ခန်း အော်တိုစနစ်အရ လော့ခ်ကျသွားသဖြင့် မည်သို့မျှ မတတ်နိုင်ဘဲ ၉ နာရီကြာ ပိတ်မိနေပြီး ၎င်းကို မီးသတ်တပ်ဖွဲ့ဝင်များက ကယ်ထုတ်ခဲ့ရသဖြင့် မီဒီယာများက ကမ္ဘာ့အမိုက်မဲဆုံး ဘဏ်သူခိုးဟု ခေါင်းစဉ်တပ် ဖော်ပြနေကြသည်။
CCTV မှတ်တမ်းများတွင် ဘဏ်အတွင်း ငွေတိုက်သေတ္တာများကို ဖွင့်ခိုးရန် ကြိုးစားနေသည့် ယင်းသူခိုးအား အတိုင်းသားမြင်နေရပြီး ၎င်းသည် ဘဏ်ဖွင့်ချိန်အတွင်း ငွေတိုက်ထဲ ခိုးဝင်ခဲ့သော်လည်း ဘဏ်ပိတ်ချိန် ရောက်သွားသည်နှင့် လုံခြုံရေးတံခါးများ အလိုအလျောက် ပိတ်သွားသောကြောင့် ပြန်မထွက်နိုင်တော့မှန်း သိပြီး တံခါး၀အနီး ခေါက်တုံ့ခေါက်ပြန် လျှောက်နေကာ နောက်ဆုံး လက်မှိုင်ချပြီး ထိုင်ချကာ လာဖမ်းမည်ကို စောင့်နေခဲ့ရတော့သည်။
ဘဏ်မှ ငှားရမ်းထားသော ပုဂ္ဂလိကလုံခြုံရေး ကုမ္ပဏီတစ်ခုသည် ငွေတိုက်အတွင်းရှိ သူခိုးကို တွေ့ရှိခဲ့ပြီး ရဲများထံ အကြောင်းကြားခဲ့သော်လည်း ငွေတိုက်သော့မှာ ဘဏ်ဖွင့်ချိန်မှသာ ပြန်ပွင့်သည့် ပရိုဂရမ် ထည့်ထားသော သေတ္တာအတွင်း၌သာ ထားရှိသဖြင့် ထိုနေ့အတွက် သော့ယူမရ ဖြစ်ခဲ့သည်။
နောက်နေ့မနက် ၈ နာရီ ဘဏ်ဖွင့်ချိန်မှ သော့ရရှိသောကြောင့် မီးသတ်တပ်ဖွဲ့ဝင်များက သူခိုးအား ကယ်တင်ရန် လုံခြုံရေးသော့နှင့် ဘဏ်တိုက်တံခါး သော့ရရန် ကြိုးစားဖွင့်ကြရာ ၉ နာရီ ကြာမြင့်ပြီးမှ ခေါ်ထုတ်နိုင်ခဲ့ကာ လူနာတင်ကားဖြင့် ဆေးရုံအရင်ပို့၍ ဆေးစစ်မှုများလုပ်ပြီးမှ စိုးရိမ်စရာမရှိသဖြင့် ဖမ်းဆီး စစ်ဆေးမှုများ လုပ်ဆောင်ခဲ့သည်။
ပြီးခဲ့သည့် ဒီဇင်ဘာ ခရစ္စမတ်ပွဲတော် ကာလကလည်း ဂျာမန်သူခိုးအဖွဲ့က ဘဏ်တစ်ခုအား ဝင်ခိုးရာတွင် ပေါင်သန်း ၃၀ ဝန်းကျင် ယူဆောင်သွားနိုင်ခဲ့ပြီး ၎င်းတို့ စီးနင်းလာသည့် ကားပါကင်မှ ထွက်ရန် ကြိုးစားမှုတွင် မျက်နှာဖုံးစွပ်သူခိုး အချို့က ပါကင် အတားအဆီးအား မတင်မောင်းထွက်ရန် ကြိုးစားနေချိန် ရိုးသားသော အဖွဲ့ဝင်သူခိုးက ပါကင်ခပေးရသည့် စက်အတွင်း အကြွေစေ့များကို တစ်စေ့ချင်း ရေတွက်ထည့်ပြီးမှ အတားအဆီး ပွင့်သွားပြီး ထွက်ပြေးခဲ့မှု ရုပ်သံဖိုင် ပျံ့နှံ့ခဲ့သေးသည်။
ကိုကလင်း
Ref: Thesun
#MeKongNews
#ဘဏ်သူခိုး
#ငွေတိုက်
#ပိတ်မိ
#ကယ်ထုတ်
