မဲခေါင်၊ ဖေဖော်ဝါရီ ၄

အိန္ဒိယသမုဒ္ဒရာ မောရိသျှကျွန်းနိုင်ငံတွင် ပါဝင်သော အမေရိကန်နှင့် ဗြိတိန်တို့ တည်ဆောက်ထားသည့် ချားဂို့စ်ကျွန်းစုမှ လေတပ်စခန်းသည် မဟာဗျူဟာမြောက် အရေးပါပြီး ၎င်းကို ဆက်လက် လည်ပတ်နိုင်ရေး အနီးကပ် လုပ်ဆောင်သွားကြရန် ဗြိတိန်ဝန်ကြီးချုပ် ကီယာစတာမာ နှင့် အမေရိကန်သမ္မတ ဒေါ်နယ်ထရမ့့််တို့က သဘော တူခဲ့ကြ သည်ဟု ဗြိတိန်ဝန်ကြီးချုပ်ရုံးက ပြောသည်။

ဒီယေဂိုဂါစီယာ လေတပ်စခန်း တည်ရှိသော ကျွန်းတစ်ကျွန်း အပါအဝင် ကျွန်းစု၏ အချုပ်အခြာကို လက်လွှတ်သွားရန် ဗြိတိန်၏ ၂၀၂၅ ခုနှစ် သဘောတူညီချက်ကို ဒေါ်နယ်ထရမ့်က ပြီးခဲ့သည့်လတွင် ဝေဖန်ခဲ့ပြီး ကြီးမားသော မိုက်မဲမှု၊ အားနည်းမှုအဖြစ် ပြောကြားခဲ့သည်။

ယမန်နေ့က ထရမ့်နှင့် စတာမာတို့ စကားပြောခဲ့ကြပြီး ယင်းလေတပ်စခန်း၏ အနာဂတ် လည်ပတ်မှုကို အာမခံနိုင်ရန် ၂ နိုင်ငံ အနီးကပ် လုပ်‌ဆောင်သွားကြရန် ၂ ဖက်အစိုးရများက သဘောတူကြောင်းနှင့် ထပ်မံ၍ စကားပြောကြဦးမည်ဟု ‌‌ဒေါင်းနင်းလမ်းရုံးက ထုတ်ပြန်ပြောကြားသည်။

ဗြိတိန်ဝန်ကြီးချုပ် ကီယာစတာမာသည် သမ္မတထရမ့်နှင့် ရင်းနှီးသော ဆက်ဆံ‌ရေး ထူထောင်နိုင်ခဲ့ကာ အခွန်လျှော့ ချပေးရန် ပထမဆုံး ညှိနှိုင်းနိုင်ခဲ့သည့် ခေါင်းဆောင် ဖြစ်သော်လည်း ထရန့်၏ ဂရင်းလန်းဝယ်ယူ‌ရေး ရည်မှန်းချက်နှင့် ချားဂို့စ်ကျွန်းစုအရေး သဘောထား ကွဲပြားမှုများကြောင့် ဆက်ဆံရေး လှုပ်ခတ်မှု ဖြစ်ခဲ့သည်။

ပြီးခဲ့သည့်နှစ်တွင် ဝါရှင်တန်က ထောက်ခံခဲ့သော သဘောတူညီချက်အရ ချားဂို့စ်ကျွန်းစု အချုပ်အခြာကို ၎င်းတို့၏ ကိုလိုနီဟောင်း ‌‌မော်ရိသျှသို့ ဗြိတိန်က ပြန်လည် ပေးအပ်ခဲ့သော်လည်း ဒီယေဂိုဂါစီယာ လေတပ်စခန်းကို ၉၉ နှစ် အငှားစာချုပ်ဖြင့် ထိန်းချုပ်မှု ဆက်လက် ရယူထားခဲ့သည်။

ဗြိတိန်၏ ထုတ်ပြန်ချက်နှင့် ပတ်သက်၍ မှတ်ချက်ပေးရန် ရိုက်တာသတင်းဌာန၏ တောင်းဆိုမှုကို အိမ်ဖြူတော်က ချက်ခြင်း မတုံ့ပြန်ခဲ့ပေ။

ဒီယေဂိုဂါစီယာ လေတပ်စခန်းမှ လုပ်ဆောင်ခဲ့သော မကြာမီက စစ်ဆင်ရေးများတွင် ၂၀၂၄ နှင့် ၂၀၂၅ ခုနှစ်၌ ယီမင်နိုင်ငံမှ ဟူသီပစ်မှတ်များအား ဗုံးကြဲတိုက်ခိုက်ခြင်း၊ ဂါဇာသို့ လူသားချင်းစာနာမှု အကူအညီများ ပေးပို့ခြင်းများ ပါဝင်ခဲ့သည်။

အေးကျော်
Ref: Reuters
#အိန္ဒိယသမုဒ္ဒရာ
#ချားဂို့စ်လေတပ်စခန်း
#မဟာဗျူဟာမြောက်
#ဗြိတိန်
#အမေရိကန်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)