မဲခေါင်၊ ဖေဖော်ဝါရီ ၄
UWSA ထိန်းချုပ် နယ်မြေတွင် မူးယစ်ဆေးဝါး တစ်တန်ခွဲကျော် သယ်ဆောင်လာသည့်ကားကို ဖမ်းဆီးမိပြီး”ဝ” ပြည်နယ်တရားစီရင်ရေးကော်မတီ – WSP က တရုတ်နိုင်ငံမှ သက်ဆိုင်ရာ တရားဥပဒေစိုးမိုးရေးအဖွဲ့များနှင့် ပူးပေါင်း၍ ယုံးဟော်နယ်စပ်ဂိတ် မှတစ်ဆင့် လွှဲပြောင်းခဲ့ကြောင်း ဒေသတွင်းသတင်း Wa News Land က ဖော်ပြထားသည်။
ဖေဖော်ဝါရီ ၂ ရက်တွင် ဖမ်းမိ အိုက်စ် (Methamphetamine) ၁၆၂၂ ဒသမ ၉ ကီလိုဂရမ် (စုစုပေါင်း ၅၆အိတ်)နှင့် မူးယစ်ဆေးဝါး ထုတ်လုပ်ရာတွင် အသုံးပြုသည့် ပစ္စည်း ၂ မျိုးတို့ကို တရုတ်ဘက်သို့ တရားဝင် လွှဲပြောင်းပေးခဲ့ကြောင်း သတင်းတွင် ဖော်ပြထားသည်။
တရုတ်ဘက်မှ ပေးပို့သော တိကျသည့် သတင်းအချက်အလက်များအပေါ် အခြေခံ၍ စုံစမ်းထောက်လှမ်းကာ ဖမ်းဆီးရမိခဲ့ခြင်း ဖြစ်သည်ဟု WSP ကဆိုသည်။
ယင်းမူးယစ်ဆေးဝါးများသည် “ဝ”ဒေသမှ တစ်ဆင့် နယ်စပ်ဖြတ်ကျော် သယ်ဆောင်ရန် ရည်ရွယ်ထားခြင်း ဖြစ်ပြီး၊ “ဝ”ဒေသဘက်မှ ကြားဖြတ် ဟန့်တားကာ ဖမ်းဆီးခဲ့ပြီး သက်ဆိုင်ရာ တရားခံများကို ဥပဒေအရ အရေးယူဆောင် ရွက်ထားသည်ဟု သိရသည်။
#MeKongnews
#ဖမ်းမိ
#မူးယစ်ဆေးဝါး
#တရုတ်
#WSP
