မဲခေါင်၊ ဖေဖော်ဝါရီ ၂
ရွှေချွတ်လုပ်ငန်း လုပ်ကိုင်သည့် လားရှိုးမြို့မှ နေအိမ်တစ်အိမ် ဓားပြတိုက်ခံရပြီး ရွှေ ၅ ပိဿာခန့်နှင့် ငွေသားသိန်းထောင်ချီ ပါသွားခဲ့ကြောင်း ဒေသခံများထံမှ သိရသည်။
ဖေဖော်ဝါရီ ၁ ရက်၊ မွန်းလွဲ ၁၂ နာရီခန့်တွင် လားရှိုးမြို့၊ ရပ်ကွက် (၄) ရှိ ရွှေချွတ်လုပ်ငန်း လုပ်ကိုင်သည့် နေအိမ်သို့ သေနတ်ကိုင်ဆောင်ထားသည့် လူ ၇ ဦးခန့်က ကား ၃ စီးဖြင့် ရောက်ရှိလာကာ ဝင်ရောက်ဓားပြတိုက်ခဲ့ခြင်းဖြစ်ကြောင်း ဒေသခံများက ပြောသည်။
ယင်းနေအိမ်မှာ ရွှေထည်ချွတ်ခြင်း၊ ရွှေကုန်ချောနှင့် ရွှေအပေါင်ခံခြင်းလုပ်ငန်းများ လုပ်ကိုင်သည့်နေရာဖြစ်ကြောင်း သိရသည်။
ဓားပြအဖွဲ့သည် လုပ်ငန်းခွင်အတွင်းမှ ပစ္စည်းများကို ယူဆောင်ပြီးနောက် ပြန်လည်ထွက်ခွာချိန်တွင် သေနတ်ဖြင့် ခြောက်လှန့်ပစ်ခတ်ခဲ့ကာ ၎င်းတို့ထံမှ သေနတ်အတိုတစ်လက် ကျကျန်ရစ်ခဲ့ကြောင်း ရပ်ကွက် (၄) နေ ဒေသခံတစ်ဦးက မဲခေါင်သို့ ပြောသည်။
“ပြီးခဲ့တဲ့ရက်က ဆရာတော် အသတ်ခံရတဲ့ မဟာဗောဓိရုံကျောင်းတိုက်ရဲ့ အနောက်ဘက်က ရွှေဆိုင်အိမ်မှာ ဖြစ်တာပါ။ မနေ့က ဆရာတော်ရဲ့ ဈာပန မပို့ခင်မှာတင် ဝင်ပြီးဓားပြတိုက်သွားတာ။ ရွှေ ၅ ပိဿာနဲ့ ငွေသား သိန်းထောင်ကျော် ပါသွားတယ်လို့ ကြားရတယ်” ဟု ၎င်းက ပြောသည်။
ပြီးခဲ့သည့် ဇန်နဝါရီ ၂၈ ရက်ကပင် ယင်းရပ်ကွက်ရှိ မဟာဗောဓိရုံကျောင်းတိုက် ဆရာတော် ဦးကေသရ သတ်ဖြတ်ခံရသည့်ဖြစ်စဉ် ဖြစ်ပွားခဲ့ပြီး၊ ယမန်နေ့ ဆရာတော်၏ ဈာပနနာရေးချရန် ပြင်ဆင်နေချိန်၌ပင် ကျောင်းတိုက်အနောက်ဘက်၌ ယခုကဲ့သို့ ဓားပြတိုက်မှု ထပ်မံဖြစ်ပွားခဲ့ခြင်း ဖြစ်သည်။
လားရှိုးမြို့တွင် လူသတ်မှု၊ ဓားပြတိုက်မှု၊ လုယက်မှုနှင့် ခိုးမှုများ နေ့စဉ်နှင့်အမျှ ဆက်တိုက်ဖြစ်ပွားနေသဖြင့် ဒေသခံပြည်သူများမှာ အလွန်အမင်း ထိတ်လန့်စိုးရိမ်စွာဖြင့် နေထိုင်သွားလာနေကြရကြောင်း သိရှိရသည်။
#MeKongNews
#လားရှိုး
#ဓားပြတိုက်
#ရွှေလုပ်ငန်း
#မဟာဗောဓိရုံကျောင်းတိုက်
