မဲခေါင်၊ ဖေဖော်ဝါရီ ၁
လာမည့် ဖေဖော်ဝါရီ ၈ ရက်တွင် ကျင်းပမည့် ထိုင်း အထွေထွေရွေးကောက်ပွဲအတွက် ပါတီများ မဲဆွယ်နေမှုတွင် ထူးခြားဆန်းပြားပြီး ရယ်စရာ၊ လှောင်စရာများ ဖြစ်စေသော မဲဆွယ်မှုများစွာ ရှိနေခဲ့သည်။
သက်ဆင်မိသားစု၏ ဖွေထိုင်းပါတီသည် တစ်ရက်လျှင် မီလျံနာ ၉ ဦး တိုးပွားစေရမည်ဆိုသော မဲဆွယ် မှု လုပ် ဆောင်ကာ ၎င်းတို့ပါတီ အာဏာရပါက တစ်နေ့လျှင် ဘတ် ၉ သန်းသုံးပြီး လူ ၉ ယောက်ကို မဲရွေးချယ်နှိုက်စေပြီး တစ်ဦး ဘတ်တစ်သန်းစီ မဲပေါက်စေမည်ဟု မဲဆွယ်ခဲ့သည်။
တနင်္လာမှ သောကြာ နေ့အထိ တစ်ပတ် ၅ ရက်တွင် နေ့စဉ် ဘတ်တစ်သန်းကံထူးရှင် ၉ ဦးကို မဲဝယ်စေကာ ထိုသူများသည် အခွန်ထမ်းခဲ့သော လယ်သမား၊ လုပ်အားပေး၊ သက်ကြီးနိုင်ငံသားများ ဖြစ်ရမည်ဟု ဆိုသည်။
ထို့အတွက် တစ်နှစ် ကုန်ကျငွေသည် ဘတ် ၃ ဒသမ၂၈ ဘီလီယံ ကုန်ကျမည် ဖြစ်သောကြောင့် ပြည်သူ့အခွန်များနှင့် မဲဝယ်ရန် ကြိုးစားမှုဟု ဝေဖန်နေကြရာ ပါတီခေါင်းဆောင် ဂျူလာပန်က ထိုင်းနိုင်ငံသား အားလုံး ဒစ်ဂျစ်တယ်အစိုးရ လက်အောက်ခံ နိုင်ငံသားများအဖြစ် အားလုံး ဒစ်ဂျစ်တယ်စနစ်ဖြင့် မှတ်ပုံတင်ကာ အခွန်ငွေများကိုလည်း မဖြစ်မနေ ပေးဆောင်လာရမည့် ရည်ရွယ်ချက်ဖြင့် လုပ်ဆောင်ခြင်းဖြစ်ပြီး ထိုအစီအစဉ် အထမြောက်လျှင် အခွန်စနစ်မှာ ဘတ် ၉ ထရီလီယံ ရနိုင်မည်ဟု ရှင်းပြခဲ့သော်လည်း ပါတီ၏ ရွေးကောက်ပွဲဝင် နံပါတ်သည်လည်း ၉ ဖြစ်နေသောကြောင့် အားလုံးမှာ ၉ နဝင်းဖြင့် စီစဉ်ထားခြင်း ဖြစ်မည်ဟု ထပ်မံဝေဖန်နေကြသဖြင့် ဂျူလာပန်က တိုက်ဆိုင်မှုများဖြစ်သည်ဟု ပြန်လည် ရှင်းလင်းသွားခဲ့သည်။
ပြီးခဲ့သည့် ရွေးကောက်ပွဲ ၂ ရပ်စလုံး အမတ်နေရာ တစ်နေရာပင်နိုင်ခဲ့ခြင်းမရှိသော New Alternative Party မှ ဝန်ကြီးချုပ်နေရာ ရွေးချယ်ခံမည့် မွန်ကိုလ်ကစ်ဆိုသူသည်လည်း ရွေးကောက်ပွဲအနိုင်ရပါက ၁၂ နှစ်အတွင်း အင်္ဂါဂြိုဟ်နှင့် ဗီးနပ်စ်ဂြိုဟ်များသို့ ထိုင်းအာကာသယာဉ် တစ်စီး လွှတ်တင်မည်၊ ဘတ် ၆ ဒသမ ၄ ဘီလီယံ ကုန်ကျမည့် နျူကလီးယား လက်နက်ထိပ်ဖူး ၁၀ လုံးဝယ်ကာ တိုင်းပြည်ကို ကာကွယ်မည်၊ ယခုနှစ် မကုန်မီ ထိုင်းလူမျိုး ၁၀၀၊ နောက်နှစ်မကုန်မီ ၁၀၀၀၊ ၂၀၂၈ ခုနှစ်တွင် ၁၀၀၀၀ အား လကမ္ဘာပေါ် စေလွှတ်ပေးမည်ဟု မဲဆွယ်ခဲ့သည်။
မွန်ကိုလ်ကစ်သည် လှောင်ပြောင်စရာ အကောင်း ဆုံး မဲဆွယ်ကတိအဖြစ် မဲနိုင်ပါက ထိုင်းအမျိုးသမီးတိုင်းကို ယောင်္ကျား ၄ ယောက် တရားဝင်ယူခွင့်ပြုမည် ဟုဆိုသလို အခြားဂြိုဟ်မှ ဂြိုဟ်သူများနှင့် တစ်ဂြိုဟ် တစ်ယောက်နှုန်း ထိုင်းအမျိုးသားများ လက်ထပ်ခွင့်ပေးမည်ဟု ပြောသွားသေးသည်။
၂၀၂၁ ခုနှစ်တွင် ပါတီစထောင်ပြီး ၂၀၂၃ ခုနှစ်ရွေးကောက်ပွဲတွင် စတင်ဝင်ပြိုင်သော ကွန်ဆာဗေးတစ်ပါတီ ဖြစ်သည့် United Thai Nation Party ကလည်း အကျင့်ပျက်ခြစားသည့် အစိုးရ အရာရှိများနှင့် ကျားဖြန့်လုပ်သူများကို ထိုင်းပင်လယ်ကွေ့အတွင်းရှိ စွန့်ပစ် ရေနံတွင်းတူးစင်များပေါ် ထောင်ဒဏ် တစ်သက်တစ်ကျွန်း ချထားမှုဖြင့် ပို့ဆောင်ထားမည်ဟု မဲဆွယ်ကတိစကား ဆိုသည်။
နောက်ထပ် ကွန်ဆာဗေးတစ်ပါတီတစ်ခုဖြစ်သော Economic Party ကလည်း အကျင့်ပျက်ခြစားခြင်းသည် သေဒဏ်နှင့်ညီမျှသဖြင့် သေဒဏ်ပေးမည်ဟု ဆိုသလို ပနားမားတူးမြောင်းကဲ့သို့ သမုဒ္ဒရာနှင့် ဆက်သွယ်မည့် ထိုင်းပယ်လယ်ကွေ့ ချန်ဖွန်းမှ ရနောင်းသို့ တူးမြောင်းဖောက်ကာ အန်ဒမန်ပင်လယ်နှင့် ဆက်သွယ်ပေးမည်ဟုလည်း မဲဆွယ်ခဲ့သည်။
အကျင့်ပျက်ခြစားမှု များလွန်းနေသည့် ထိုင်းနိုင်ငံတွင် ထိုအစဉ်အလာဆိုးများကို တိုက်ဖျက်ရေး Thai Pakdee Party ကလည်း ဘတ်သန်း ၁၀၀ နှင့်အထက် လာဘ်စားသူများကို သေဒဏ်ပေးမည်၊ ဘုရင့် လွတ်ငြိမ်းခွင့်မရစေရ၊ လာဘ်ထိုးသည့် ငွေအများစုသည် ဘတ် ၅၀၀ နှင့် ၁၀၀၀ တန်များဖြစ်သည့် အတွက် ထိုငွေများကို ဖျက်သိမ်းမည်ဟု မဲဆွယ် ကတိပြုခဲ့သည်။
၂၀၁၈ ခုနှစ်တွင် စတင်ထူထောင်ပြီး ပြီးခဲ့သည ရွေးကောက်ပွဲ ၂ ရပ်စလုံး အမတ်နေရာ တစ်နေရာပင် မနိုင်ခဲ့သော Green Party ကလည်း သဘာ၀ပတ်ဝန်းကျင် အခြေပြုပါတီ ဖြစ်သည့်အလျှောက် သစ်ပင်ထီကို တစ်နှစ် ၁၈ ကြိမ် ဖွင့်ပေးကာ ဂဏန်း ၁၅ လုံး ထီထိုးခွင့်ရှိသူသည် အများပိုင်မြေပေါ် သစ်ပင် ၃ ပင် စိုက်နိုင်သူတစ်စောင် ပေးမည်ဟု မဲဆွယ်ခဲ့သည်။
တိရစ္ဆာန် ထိန်းသိမ်းစောင့်ရှောက်ရေးကိုလည်း ဦးစားပေးသည့် ထိုပါတီက ခွေးများ၊ ကြောင်များ မွေးထားသူများအတွက် တစ်ကြိမ် ၃၉ ဘတ်နှုန်းဖြင့် ကျန်းမာရေး စောင့်ရှောက်စရိတ် ထုတ်ပေးသွားမည်ဟုလည်း မဲဆွယ်ခဲ့သည်။
ကိုကလင်း
Ref: thaipbs
#MeKongNews
#ထိုင်းရွေးကောက်ပွဲ
#ထူးခြားဆန်းပြား
#မဲဆွယ်
