မဲခေါင်၊ ဇန်နဝါရီ ၂၆
ထိုင်းနိုင်ငံ၊ ထရက်ပြည်နယ်နှင့် ဆန့်ကျင်ဘက်နေရာ ၃ နေရာတွင် ကမ္ဘောဒီးယားတပ်ဖွဲ့များက ကတုတ်ကျင်းနှင့် မြောင်းများ တူးဖော်နေပြီး တူးမြောင်းမှာ နယ်စပ်တစ်လျှောက် တစ်ကီလိုမီတာကျော် ရှည်လျားပြီး ထိုင်းတပ်စခန်းများနှင့် မီတာ ၅၀၀ ခန့်သာ ကွာဝေးကြောင်း ရေတပ်သတင်းရင်းမြစ်က ယနေ့ ပြောကြားသည်။
ကတုတ်မြောင်းတူးဖော်မှုသည် ထရက်ပြည်နယ် ဘမ်ဆမ်လန်ဒေသ တစ်ဖက်တစ်ချက်တွင်ဖြစ်ကာ အနီးအနားမှ ဘန်သာဆင်၊ ဘန်နောင်ရီး၊ ဘန်ချာမက် ဒေသများအထိ ရောက်ရှိသည်ဟု ဆိုသည်။
၎င်းလုပ်ရပ်ကို ထိုင်းတပ်ဖွဲ့များနှင့် ထိပ်တိုက်ဆိုင်ထားသည့် ပုံစံအဖြစ် ဖော်ပြသည်။
အပစ်အခတ်ရပ်စဲမှုအပြီးတွင် ကမ္ဘောဒီးယားတပ်များက ထိုင်းနယ်စပ်စခန်းများနှင့် အပြိုင် ကတုတ်ကျင်းမြောင်းများကို တစ်ကီလိုမီတာကျော် အထိ တိုးချဲ့ဖောက်လုပ်ခဲ့ကြောင်း သတင်းရင်းမြစ်က ဆိုသည်။
သို့သော် ကမ္ဘောဒီးယား တပ်ဖွဲ့များ၏ လှုပ်ရှားမှုများသည် ကမ္ဘောဒီးယားပိုင်နက် နယ်မြေအတွင်း၌သာ ဖြစ်ပြီး ထိုင်းနယ်စပ်ကို ထိပါးခြင်း မရှိကြောင်း သတင်းရင်းမြစ်က အလေးအနက် ပြောကြားသည်။
ထိုင်းတပ်ဖွဲ့များသည် နည်းဗျူဟာအရ အသာစီးရှိသော နေရာများတွင် ဆက်ရှိနေသည်ဟု ဆိုသည်။
သို့သော် ကမ္ဘောဒီးယားက ထိုင်းစခန်းနေရာများကို ဒရုန်းများပျံသန်း၍ ထောက်လှမ်းရေးနှင့် စောင့်ကြည့်လေ့လာမှုများ လုပ်ဆောင်ခဲ့သည်ကို ထိုင်းအာဏာပိုင်များက လေ့လာ တွေ့ရှိထားကြသည် ဖြစ်ရာ ဒရုန်းများ ပျံသန်းမှုကို တရားဝင်လမ်းကြောင်းမှ တစ်ဆင့် ထိုင်းနိုင်ငံက ကန့်ကွက်ထားသည်။
တင်းမာမှုများကြောင့် ထိပ်တိုက် ရင်ဆိုင်တွေ့မှု အသစ်များဆီ ဦးတည်သွားမည်ကို ပြောရန် စောလွန်းနေသေးသော်လည်း ယင်းဒေသ၏ အကဲဆတ်သော အခြေအနေကြောင့် ထိုင်းတပ်ဖွဲ့များက နိုးနိုးကြားကြား သတိရှိနေကြ သည်ဟု သတင်းရင်းမြစ်က ဆိုသည်။
အေးကျော်
Ref:khaosod
#MeKongNews
#ထိုင်းနယ်စပ်
#ကမ္ဘောဒီးယား
#ကတုတ်ကျင်း
