မဲခေါင်၊ ဇန်နဝါရီ ၂၃
၎င်းတို့နိုင်ငံအတွင်း လာရောက် အခြေစိုက်ကာ ကျားဖြန့်လုပ်ငန်းများ လုပ်ခဲ့သည့် သံသယတရားခံ ၇၃ ယောက်ကို တောင်ကိုရီးယား၌ စုံစမ်းစစ်ဆေး အရေးယူသွားရေး ယခုတစ်ပတ်အတွင်း ပြန်ပို့မည်ဟု ကမ္ဘောဒီးယားက ထုတ်ပြန်ကြေညာခဲ့သည်။
ပြီးခဲ့သည့် နွေရာသီတွင် တောင်ကိုရီးယား ကျောင်းသားတစ်ဦး ကမ္ဘောဒီးယား ကျားဖြန့်လုပ်ငန်းအတွင်း အဓမ္မ ခိုင်းစေခံရခြင်းနှင့် နှိပ်စက်မှုများကြောင့် သေဆုံးခဲ့မှုကို တောင်ကိုရီးယား ထောက်လှမ်းရေးအဖွဲ့များပါ ကမ္ဘောဒီးယားသို့ လာရောက်ပြီး တောင်ကိုရီးယားသား ကျားဖြန့်သံသယ တရားခံများအား ဖြိုးခွင်းဖမ်းဆီးရန် ပူးပေါင်း ဆောင်ရွက်ခဲ့သည်။
ထိုပူးပေါင်းဆောင်ရွက်မှုအရ ကမ္ဘောဒီးယားအစိုးရသည် ငွေကြေးအားဖြင့် ဝမ် ၄၈ ဒသမ ၆ ဘီလီယံ (ဒေါ်လာ ၃၃ သန်း) လိမ်လည်ခဲ့သည့် တောင်ကိုရီးယားသား သံသယတရားခံ ၂၀၀ ဝန်းကျင်ကို ဖမ်းဆီး ထားပြီး ၇၃ ယောက်ကို ယနေ့တွင် တောင်ကိုရီးယားသို့ ပြန်လည် လွှဲပြောင်းပေးရန် စီစဉ်နေခြင်း ဖြစ်သည်။
အရှေ့တောင်အာရှရှိ မြန်မာ၊ ကမ္ဘောဒီးယားနိုင်ငံများတွင် ကျားဖြန့်လုပ်ငန်းများ အခြေစိုက်ကာ ကမ္ဘာတစ်ဝန်းရှိ သားကောင်များထံမှ နည်းမျိုးစုံဖြင့် ငွေလိမ်လည်ရယူမှုသည် ၂၀၂၃ ခုနှစ်အတွင်း ဒေါ်လာ ၁၈ ဘီလီယံမှ ၃၇ ဘီလီယံအကြား ရှိသည်ဟု ကုလသမဂ္ဂ မူးယစ်ဆေးဝါးနှင့် ရာဇဝတ်မှုတိုက်ဖျက်ရေးရုံးက ထုတ်ပြန်ထားသည်။
ယခုလအတွင်း ကျားဖြန့်ခေါင်းဆောင်ဟု သတ်မှတ်ထားသော တရုတ်နိုင်ငံသားကို ကမ္ဘောဒီးယားက ဖမ်းဆီးကာ တရုတ်သို့ လွှဲပြောင်းပေးအပ်ခဲ့သည်။
ယမန်နှစ် အောက်တိုဘာလမှ စတင်ပြီး နိုင်ငံအတွင်း ကျားဖြန့်လုပ်ငန်း လာလုပ်နေသည့် သံသယတရားခံ တောင်ကိုရီးယားနိုင်ငံသား အယောက် ၁၃၀ ဝန်းကျင်ကို ကမ္ဘောဒီးယားက ပြန်လွှဲပြောင်းပေးကာ လာအို၊ ဗီယက် နမ်၊ ထိုင်း နှင့် ဖိလစ်ပိုင်နိုင်ငံများမှ ပြန်လွှဲပေးသည့် တောင်ကိုရီးယား ကျားဖြန့်သံသယ တရားခံဦးရေမှာ ၃၀ ပင်မပြည့်ခဲ့ပေ။
ကိုကလင်း
Ref: asahi
#MeKongNews
#တောင်ကိုရီးယား
#ကျားဖြန့်သံသယ
#တရားခံ
#ကမ္ဘောဒီးယား
#ပြန်ပို့
