မဲခေါင်၊ ဇန်နဝါရီ ၂၂
ထိုင်းနှင့် အမေရိကန်တို့ ပူးတွဲဦးဆောင်မည့် (၄၅) ကြိမ်မြောက် Cobra Gold 2026 စစ်ရေးလေ့ကျင့်မှုတွင် နိုင်ငံပေါင်း ၃၀ ပါဝင်မည်ဖြစ်ပြီး မြန်မာနှင့် ကမ္ဘောဒီးယားအား မဖိတ်ခေါ်ထားကြောင်း သတင်းများအရ သိရသည်။
ယင်းစစ်ရေးလေ့ကျင့်မှုကို ဖေဖော်ဝါရီ ၂၄ ရက်မှ မတ် ၆ ရက်အထိ ထိုင်းနိုင်ငံရှိ နေရာအသီးသီးတွင် ကျင်းပသွားမည်ဖြစ်ပြီး နိုင်ငံပေါင်း ၃၀ မှ စစ်သည်အင်အား ၈ ထောင်ကျော် ပါဝင်မည်ဖြစ်သည်။
နှစ်စဉ်ကျင်းပသည့် ယင်းစစ်ရေးလေ့ကျင့်မှုအား ယခုနှစ်တွင် အင်အားအလုံးအရင်း လေ့ကျင့်မှုနှစ် – “Heavy Year” အဖြစ် သတ်မှတ်ထားပြီး ထိုင်းတပ်မတော်နှင့် အမေရိကန် အင်ဒို – ပစိဖိတ် စစ်ဌာနချုပ်တို့က အိမ်ရှင်အဖြစ် ပူးတွဲကျင်းပမည် ဖြစ်သည်။
စစ်ရေးလေ့ကျင့်မှုတွင် အဓိကအဖွဲ့ဝင် ၇ နိုင်ငံအဖြစ် ထိုင်း၊ အမေရိကန်၊ စင်ကာပူ၊ အင်ဒိုနီးရှား၊ ဂျပန်၊ တောင်ကိုရီးယားနှင့် မလေးရှားတို့ ပါဝင်ကြမည်ဖြစ်သည်။
ထို့အတူ တရုတ်၊ အိန္ဒိယနှင့် သြစတြေးလျတို့သည်လည်း လူသားချင်းစာနာမှုဆိုင်ရာ အကူအညီပေးရေး သို့မဟုတ် ဘေးအန္တရာယ်ကယ်ဆယ်ရေး လေ့ကျင့်ခန်းများကဲ့သို့ ကဏ္ဍအချို့တွင် ပူးပေါင်းလေ့ကျင်မည် ဖြစ်သည်။
ယင်းစစ်ရေးလေ့ကျင့်မှုသည် စစ်ဘက်ဆိုင်ရာ ပူးပေါင်းဆောင်ရွက်မှုများကို ခိုင်မာစေရန်နှင့် ကြည်း၊ ရေ၊ လေ၊ အာကာသနှင့် ဆိုက်ဘာနယ်ပယ် အားလုံးပါဝင်သည ့်ပူးတွဲစစ်ဆင်ရေးစွမ်းရည်များကို မြှင့်တင်ရန် ရည်ရွယ်ကြောင်း ထိုင်းစစ်တပ်က ထုတ်ပြန်သည်။
ယခု စစ်ရေးလေ့ကျင်မှုတွင် ကွပ်ကဲထိန်းချုပ်ရေး လေ့ကျင့်ခန်း၊ လူသားချင်းစာနာမှုဆိုင်ရာ အကူအညီနှင့် သဘာဝဘေးအန္တရာယ် ကယ်ဆယ်ရေးလုပ်ငန်းများ၊ မြေပြင်စစ်ရေးလေ့ကျင့်မှုများနှင့ ကမ်းတက် စစ်ဆင်ရေးများ၊ ကျည်အစစ်ဖြင့် ပတ်ခတ်မှုများ၊ လက်နက်ကြီး ပစ်ခတ်မှုများ၊ ရေကြောင်း တိုက်ခိုက်မှုများနှင့် ဒရုန်းဟန့်တားမှုများ စသည့် လေ့ကျင့်ခန်းများ ပါဝင်မည်ဖြစ်ကြောင်း သိရသည်။
ယခုနှစ်တွင် ဘင်္ဂလားဒေ့ရှ်၊ ကနေဒါ၊ ဖီဂျီ၊ ပြင်သစ်၊ ယူကေ၊ အီတလီ၊ မွန်ဂိုလီးယား၊ နီပေါ၊ နယူးဇီလန်နှင့် ဖိလစ်ပိုင်တို့က အထောက်အကူပြု နိုင်ငံအဖွဲ့ဝင်များအဖြစ် ပါဝင်မည်ဖြစ်သည်။
ထို့အတူ ဘရူနိုင်း၊ ဂျာမနီ၊ ဂျော်ဒန်၊ လာအို၊ နယ်သာလန်၊ ပါကစ္စတန်၊ ဆော်ဒီ၊ ဆွီဒင်၊ တီမောနှင့် ဗီယက်နမ် စသည့် ၁၀ နိုင်ငံက လေ့လာသူအဖြစ် ပါဝင်မည်ဖြစ်သည်။
Cobra Gold စစ်ရေးလေ့ကျင့်မှုကို ထိုင်းနိုင်ငံတွင် နှစ်စဉ်ကျင်းပခဲ့ရာ လက်ရှိ၌ အရှေ့တောင်အာရှတွင် သက်တမ်းအရင့်ဆုံး နိုင်ငံစုံ စစ်ရေးလေ့ကျင့်မှုများထဲမှ တစ်ခု ဖြစ်လာခဲ့သည်။
ယခုနှစ် လေ့ကျင့်ခန်းများတွင် သမရိုးကျ စစ်ဆင်ရေးများအပြင် ဒရုန်းတိုက်ဖျက်ရေးနှင့် အချက်ပြ ထောက်လှမ်းရေး ကဲ့သို့သော ခေတ်သစ်နည်းပညာမြင့် စစ်ရေးကဏ္ဍများကိုပါ အထူးအလေးပေး ထည့်သွင်းလာသည်ကို တွေ့ရသည်။
Ref:Khaosod English
#MeKongNews
#မြန်မာ
#ကမ္ဘောဒီးယား
#Cobra_Gold
#စစ်ရေးလေ့ကျင့်မှု
