မဲခေါင်၊ ဇန်နဝါရီ ၁၃
အီရန်နိုင်ငံတွင် ပြည်တွင်းသုံး ငွေကြေး ရီယလ်စျေးနှုန်း အလွန်ကျဆင်း လဲပြိုသွားခြင်းကြောင့် ကုန်စျေးနှုန်းများ အဆမတန် မြင့်တက်ရာမှ ပေါက်ဖွားလာသော ဆန္ဒပြမှု ၂ ပတ်ကျော်လာချိန်တွင် ခါမီနီ၏ အစ္စလာမ္မစ်နိုင်ငံတော် ပြိုလဲလုနီး ဖြစ်လာကာ ဆန္ဒပြသူများက နိုင်ငံအလံတော်ဟောင်း ဖြစ်သော ဘုရင်ခေတ်က ခြင်္သေ့နှင့် နေတံဆိပ်ပါ အလံများကို ပြန်လည် လွှင့်ထူခဲ့ကြသည်။
ထို့နောက် အီလွန်မာ့စ်၏ လူမှုကွန်ရက် X နှင့် Tasnim သတင်းမီဒီယာအပါ အကောင့်များစွာ၌ ခြင်္သေ့နှင့် နေမင်းတံဆိပ်အလံ များစွာ ပြောင်းလဲလိုက်ပြီး တောင်းဆိုချက်များကြောင့် ပြောင်းပေးလိုက်ကြောင်း X အကြီးအကဲ တစ်ဦးက ထုတ်ပြန်သည်။
ပြီးခဲ့သည့် ဇန်နဝါရီ ၁၀ ရက်တွင် ခါမီနီအစိုးရအား ဆန့်ကျင်သည် လူတစ်စုထဲမှ အမျိုးသားတစ်ဦးက လန်ဒန်ရှိ အီရန်သံရုံးတွင် ခါမီနီ အစိုးရ အသိအမှတ်ပြု အီရန်အလံကို တက်ဖြုတ်ကာ ခြင်္သေ့နှင့် နေမင်းတံဆိပ်ပါ ဘုရင်ခေတ် အလံဟောင်းကို ပြန်လည် လွှင့်ထူခဲ့သည်။
အီရန်သည် ခြင်္သေ့နှင့် နေတံဆိပ်အလံအား ဘုရင်လက်ထက် နှစ်ပေါင်းများစွာ အသုံးပြုခဲ့ပြီး ၁၉၇၉ ခုနှစ်တွင်မှ အစ္စလာမ္မစ် တော်လှန်ရေးအတွင်း ရှားဘုရင် မိုဟမ်မက်ရီဇာ ပါလာဗီကို ဖြုတ်ချကာ ခါမီနီ ခေါင်းဆောင်သော အစ္စလာမ္မစ် နိုင်ငံတော်အဖြစ် အလံပြောင်းလဲ အသုံးပြုခဲ့ခြင်း ဖြစ်သည်။
သို့သော် အီရန် တရားဝင်အစိုးရ လူမှုကွန်ရက် အကောင့်များတွင်မူ ခါမီနီလက်ထက် အီရန်အလံပုံများသာ ဆက်လက် ဖော်ပြထားဆဲ ဖြစ်သည်။
အီရန်တွင် ခါမီနီအစိုးရ ကျရှုံးလုအနေအထား၌ ဆန္ဒပြသူများကို ပစ်ခတ် သတ်ဖြတ်နေရာ သတင်းတချို့တွင် ပြည်သူထောင်ချီ သေ ဆုံးပြီး ဖြစ်ကြောင်း ဖော်ပြနေကြသလို အီရန်တော်လှန်ရေး အစောင့်တပ်၏ အကြမ်းဖက်သူများကြောင့် လုံခြုံရေးအရာရှိ ၁၀၀ ကျော် သေဆုံးရပြီး ဖြစ်သည်ဟု ထုတ်ပြန်ထားသည်။
ထိုသို့ အီရန်ပြည်သူများကို သတ်ဖြတ်မှုကြောင့် စစ်ရေးအရ ဝင်ပါကာ အကူအညီပေးတော့မည်ဆိုသည့် စစ်ဆင် ရေး စီမံချက်များအား အမေရိကန်သမ္မတ ဒေါ်နယ်ထရမ့်က စီစဉ်နေကြောင်းလည်း သတင်းများက ဆိုသည်။
ကိုကလင်း
Ref: albawaba
#MeKongNews
#အီရန်
#ဘုရင်စနစ်
#တောင်းဆို
#ပိုကျယ်ပြန့်
