မဲခေါင်၊ ဇန်နဝါရီ ၁၂
ပြည်နယ်အတွင်းရှိ ဓာတ်ဆီဆိုင် ၅ ဆိုင်ကို ဗုံးခွဲ၍ မီးရှို့တိုက်ခိုက်မှုများ ဖြစ်ပေါ်ခဲ့ပြီးနောက် ထိုင်းတောင်ပိုင်း၊ နာရသီဝပ်ပြည်နယ် အာဏာပိုင်အဖွဲ့က ညမထွက်ရအမိန့် ထုတ်ပြန်လိုက်ကာ ည ၉ နာရီမှ နံနက် ၅ နာရီ အထိ အပြင်မထွက်ကြရန် ဒေသခံများကို တားမြစ်လိုက်သည်။
နရသီဝပ်ပြည်နယ်သည် စစ်အုပ်ချုပ်ရေး ဥပဒေအောက်တွင် ဆက်ရှိနေပြီး ညမထွက်ရအမိန့်ဖြင့် လုံခြုံရေးကို ပိုမို တင်းကျပ်လိုက်ကာ အမိန့်လည်း ချက်ခြင်း အသက်ဝင်လာမည်ဟု အုပ်ချုပ်ရေးအဖွဲ့က ပြောသည်။
ကိစ္စရပ် တစ်ခုချင်းစီအပေါ် အခြေခံ၍ ခြွင်းချက်များကို စဉ်းစားသွားမည် ဖြစ်သော်လည်း ဒေသခံများ အနေဖြင့် ၎င်းတို့၏နယ်မြေရှိ စစ်ဘက်၊ ရဲဘက်နှင့် အုပ်ချုပ်ရေးအရာရှိများထံမှ ဦးစွာ ခွင့်ပြုချက် တောင်းခံရမည်ဟု အုပ်ချုပ်ရေးအဖွဲ့က ဆက်လက် ပြောကြားသည်။
နောက်ထပ် အသိပေးချက် ထပ်ထွက်လာချိန်အထိ ညမထွက်ရအမိန့် ဆက်ရှိနေမည် ဖြစ်သည်။
မသင်္ကာသူများကို နေအိမ်အတွင်း ဝင်ရောက်ရှာဖွေခြင်း အပါအဝင် လုံခြုံရေး လုပ်ငန်းစဉ်များတွင် ပါဝင် ကူညီပေးကြရန် အရပ်ဘက် အရာရှိများကိုလည်း အုပ်ချုပ်ရေးအဖွဲ့က ညွှန်ကြားခဲ့သည်။
တနင်္ဂနွေနေ့ နံနက် ၁ နာရီတွင် ယာလာ၊ ပဌာနီ နှင့် နရသီဝပ် ပြည်နယ်မှ ဓာတ်ဆီဆိုင်များကို အချိန်ကိုက် တိုက်ခိုက်မှု ဖြစ်ပေါ်ခဲ့သည်။
တစ်ဆိုင်လျှင် လူ ၄ ဦးမှ ၅ ဦး ခန့် ပါဝင်သော တိုက်ခိုက်သူများက ဆိုင်ကယ်များဖြင့် ရောက်လာခဲ့ကာ တွဲဖွင့်ထားသော စတိုးဆိုင်လေးများကို မီးရှို့ကြပြီး ဆီဖြည့်ပန့်များကို လက်လုပ်ဗုံးများ ဖောက်ခွဲ တိုက်ခိုက်ကြ၍ မီးလောင်စေခဲ့ကြောင်း ပြည်နယ်အုပ်ချုပ်ရေးမှူး ဘွန်ချွေး ဟမ်ယမ်နီက မနေ့က နေ့လယ်ပိုင်းတွင် ပြောကြားသည်။
ထိုအတောအတွင်းမှာပင် ဓာတ်ဆီဆိုင် တိုက်ခိုက်မှု ဖြစ်ခဲ့သော ပြည်နယ်သုံးခုမှ ဆီဆိုင်များတွင် လုံခြုံရေး တိုးမြှင့်ထားကြရန် စွမ်းအင်ဝန်ကြီးဌာနက အမိန့် ထုတ်ပြန်လိုက်ကာ လုံခြုံရေး အေဂျင်စီများနှင့် ပူးပေါင်း ဆောင်ရွက်သွားကြရန် တာဝန်ရှိသူများကို ညွှန်ကြားလိုက်သည်။
တစ်ချိန်တည်းမှာပင် သယ်ယူပို့ဆောင်ရေး လမ်းကြောင်းများ ပြတ်တောက်ခဲ့ပါကလည်း လောင်စာဆီ ဖြည့်တင်းမှု လုံလောက်စွာ ရှိနေရေး သေချာစေရန် လုပ်ဆောင်ထားရန်လည်း စွမ်းအင်ဝန်ကြီးဌာနက အရာရှိများကို ပြောကြားသည်။
အေးကျော်
Ref: The Nation
#MeKongNews
#ဓာတ်ဆီဆိုင်
#မီးရှို့မှု
#နရသီဝပ်
#ညမထွက်ရအမိန့်
