မခေါင်၊ ဇန်နဝါရီ ၉
ပစိဖိတ်သမုဒ္ဒရာ အရှေ့ပိုင်းနှင့် ကာရစ်ဘီယံပင်လယ်မှ ရေကြောင်း တိုက်ခိုက်မှုများ ဖြစ်ပေါ်ခဲ့ပြီးနောက် မူးယစ် ဆေးဝါး ဂိုဏ်းများကို တိုက်ဖျက်ရေး ကုန်တွင်း စစ်ဆင်မှုများလည်း ဖြစ်ပေါ်လာလိမ့်မည်ဟု အမေရိကန် သမ္မတ ဒေါ်နယ်ထရန့်က ပြောကြားသည်။
“မူးယစ်ဆေးဝါးဂိုးဏ်းတွေနဲ့ ပတ်သက်ပြီး အခုဆိုရင် ကျနော်တို့က မြေပြင်တိုက်ခိုက်မှုတွေ စတင်သွားပါမယ်။ အဲဒီဂိုဏ်းတွေက မက္ကဆီကိုနိုင်ငံကို အုပ်စိုးနေကြတယ်” ဟု ယမန်နေ့က ထုတ်လွှင့်ခဲ့သော ဖောက်စ်သတင်းဌာနမှ ရှောင်ဟန်နစ်တီနှင့် တွေ့ဆုံမေးမြန်းခန်းတွင် ထရမ့်က ပြောသည်။
ပြီးခဲ့သည့် သီတင်းပတ်ကုန်က ဗင်နီဇွဲလားသမ္မတ နီကိုးလပ်စ် မာဂျူရိုအား မထင်မှတ်ဘဲ စီးနင်းဖမ်းဆီးခဲ့ပြီးနောက် ထရမ့်၏ မှတ်ချက်များ ထွက်ပေါ်လာခြင်းဖြစ်သည်။
ယင်းမတိုင်မီတွင် ထရမ့်က လက်ဝဲယိမ်း ခေါင်းဆောင်အပေါ် လပေါင်းများစွာ စီးပွားရေးနှင့် စစ်ရေး ဖိအားများ ပေးခဲ့သည်။
ဗင်နီဇွဲလားမှ မူးယစ်ဆေးဝါးများ သယ်ဆောင်လာသည် ဆိုသော လှေသင်္ဘောများကို ရေပြင်တွင် တိုက်ခိုက်ခဲ့သလို ၎င်းရေယာဉ်များ ဆိုက်ကပ်သည့် ဆိပ်ခံတစ်ခုကိုလည်း မြေပြင် တိုက်ခိုက်မှု လုပ်ခဲ့သည်။
သို့သော် မက္ကဆီကို မူးယစ်ဆေးဝါး ဂိုဏ်းများအပေါ် တိုက်ခိုက်မှုမှာ အမေရိကန်ဘက်မှ ကြီးမားသော စစ်ရေး အရှိန်မြှင့်မှု ဖြစ်လာနိုင်သည်။
မာဂျူရိုအား ဖမ်းဆီးလိုက်ပြီး အမေရိက တိုက်အပေါ် ဝါရှင်တန်၏ လွှမ်းမိုးမှုအကြောင်း ထရန့်က ပြောကြား လာခဲ့ပြီးနောက် အမေရိကတိုက်ကို မည်သည့် အင်အားကြီး နိုင်ငံကမှ မပိုင်ဆိုင်ကြောင်း မက္ကဆီကိုသမ္မတ ကလော်ဒီ ယာ ရှိန်းဘောင်က တနင်္လာနေ့တွင် ပြောကြားခဲ့သည်။
မက္ကဆီကိုမှ မူးယစ်ဂိုဏ်းများကို ကိုင်တွယ် ဖြေရှင်းသွားရေး အမေရိကန် တပ်ဖွဲ့များအား မက္ကဆီကိုထဲ ဝင်ခွင့်ပေးရန် ရှိန်းဘောင်ကို တွန်းအားပေးနေကြောင်း ထရန့်က တနင်္ဂနွေနေ့တွင် ပြောကြားပြီး ၎င်းကမ်းလှမ်းမှုကို ရှိန်း ဘောင်က ယခင်က ပယ်ချခဲ့သည်ဟုလည်း ပြောသည်။
အေးကျော်
Ref: AFP/co
#MeKongNews
#မူးယစ်ဂိုဏ်း
#နှိမ်နင်း
#စစ်ဆင်ရေး
#ထရမ့်
