မဲခေါင်၊ ဇန်နဝါရီ ၈
၂၀၂၇ ခုနှစ်တွင် အမေရိကန် စစ်အသုံးစရိတ်ကို အမေရိကန်ဒေါ်လာ ၁ ဒသမ ၅ ထရီလီယံအထိ တိုးမြှင့် သတ်မှတ်ပေးရန် အမေရိကန်သမ္မတ ဒေါ်နယ်ထရမ့်က ယမန်နေ့တွံင် အဆိုပြုလိုက်ပြီး အန္တရာယ်များသော ခေတ်ကာလကို အကြောင်းပြခဲ့သည်။
“ဒါဟာ ကျွန်တော်တို့မှာ ရှိသင့်ရှိထိုက်တဲ့ အိမ်မက်စစ်တပ်ကို တည်ဆောက်ခွင့် ပြုပါလိမ့်မယ်။ ပိုပြီး အရေးကြီးတာကတော့ ဒီစစ်အသုံးစရိတ်က ဘယ်ရန်သူနဲ့ပဲ ဖြစ်ဖြစ် ကျွန်တော်တို့ကို ဘေးကင်း၊ လုံခြုံ အောင် လုပ်ပေးပါလိမ့်မယ်” ဟု Truth Social လူမှုမီဒီယာပို့စ်တွင် ထရမ့်က ရေးသားသည်။
ပင်တဂွန်အတွက် စစ်အသုံးစရိတ်များ တိုးမြှင့် တောင်းခံခြင်းသည် ကာကွယ်ရေးနှင့် ကာကွယ်ရေး မဟုတ်သော အသုံးစရိတ်များ ကြားကွာဟမှု ကြီးမားမှု မရှိစေရန် အလိုရှိသော ဒီမိုကရက်များထံမှ ဆန့်ကျင်မှုများနှင့် ရင်ဆိုင်ရရန် သေချာသလောက် ရှိသည်။
ထို့အတူ စစ်အသုံးစရိတ်ကြောင့် ဘတ်ဂျက်လိုငွေ ကြီးမားမှုကို ဆန့်ကျင်သော ရီပတ်ဘလီကန်များထံမှ ကန့်ကွက်မှုများလည်း ရှိလာနိုင်သည်။
သို့ရာတွင် ဒုတိယအကြိမ် သမ္မတပြန်ဖြစ်လာပြီး နောက်ပိုင်းကတည်းက ကမ္ဘာတစ်ဝန်းမှ ရန်သူ၊ မိတ်ဆွေမခွဲခြားဘဲ နိုင်ငံတိုင်းအပေါ် ၎င်းတို့ အစိုးရက ချမှတ်ခဲ့သော အခွန်အကောက်များနှင့် အတူ ဝင်ငွေတိုးတက် လာခြင်းကြောင့်လည်း စစ်အသုံးစရိတ် တိုးမြှင့်ရန် သက်သောင့်သက်သာ ခံစားရကြောင်း ဒေါ်နယ်ထရမ့်က ဆိုသည်။
ဗင်နီဇွဲလား ခေါင်းဆောင် နီကိုးလပ်စ်မာဂျူရိုကို ဖမ်းဆီးပြီး မူးယစ်ဆေးဝါး မှောင်ခိုမှုဖြင့် အမေရိကန်တွင် အမှုရင်ဆိုင်ရေး ၎င်းအား ဖမ်းဆီးခေါ်ဆောင်ရန် စစ်ဆင်ရေးကို အမိန့်ပေးခဲ့ ပြီးနောက် ရက်ပိုင်းအကြာမှာပင် စစ်အသုံးစရိတ် တိုးမြှင့်ရန် ၎င်းက အဆိုပြုလာခြင်း ဖြစ်သည်။
ကာရစ်ဘီယံ ပင်လယ်တွင်လည်း အမေရိကန်တပ်ဖွဲ့များ ဆက်လက် စုဝေးနေကြသည်။
အမျိုးသားလုံခြုံရေး အကြောင်းရင်းများကြောင့် ဒိန်းမတ်၏ ဂရင်းလန်ဒေသကို လွှဲပြောင်းရယူလို ကြောင်းကိုလည်း ထရမ့်က ယခုရက်ပိုင်းမှာပင် ပြောကြားခဲ့သလို ကိုလံဘီယာတွင် စစ်ဆင်ရေး လုပ်ရန်လည်း လမ်းဖွင့်ထားကြောင်း ပြောကြားသည်။
ထို့ပြင် အမေရိကန်နိုင်ငံ၏ ရေရှည်ရန်ဘက် ကျူးဘားလည်း ပြဿနာရှိကြောင်း နိုင်ငံခြားရေးဝန်ကြီး မာကိုရူဘီယိုက သိသာစွာ သတိပေး ပြောကြားခဲ့သည်။
အမေရိကန်အစိုးရသည် ၂၀၂၄ ခုနှစ်တွင် အခွန်ကောက်ခြင်းမှ ဝင်ငွေ ဒေါ်လာ ၉၈ ဒသမ ၃ ဘီလီယံသာ ရရှိခဲ့သော်လည်း ပြီးခဲ့သည့်နှစ်က နိုင်ငံခြား အကောက်ခွန်နှင့် အခြား အခွန်အကောက်များမှ ဝင်ငွေ ၂၈၈ ဒသမ ၅ ဘီလီယံ ရရှိခဲ့ကြောင်း သိရသည်။
အေးကျော်
Ref: AP
#MeKongNews
#စစ်အသုံးစရိတ်
#၂၀၂၇
#ထရမ့်
#တိုးတောင်း
