မဲခေါင်၊ ဇန်နဝါရီ ၃
ထိုင်းစစ်တပ် လှုပ်ရှားမှုများက နယ်စပ်စည်းအား ပြောင်းလဲပစ်နေခြင်း ဖြစ်ကြောင်း ကမ္ဘောဒီးယား၏ ပြောဆိုမှုများကို ထိုင်းက ငြင်းဆိုလိုက်ကာ မူလကတပ်များ ချထားမှုကို ဆက်လက် ထိန်းသိမ်းထားပြီး အပစ်အခတ် ရပ်စဲမှု သဘောတူညီချက်ကို အပြည့်အဝ လိုက်နာနေသည်ဟု အလေးအနက် ပြောသည်။
ဒီဇင်ဘာ ၂၇ ရက် တွင် နှစ်နိုင်ငံ ထုတ်ပြန်ခဲ့ကြသည့် ပူးတွဲ ကြေညာချက်ပါ အချက်များကို ထိုင်းနိုင်ငံက တင်းတင်းကျပ်ကျပ် လိုက်နာကြောင်းထို င်း – ကမ္ဘောဒီးယား နယ်စပ်အခြေအနေ ပူးတွဲ သတင်းစင်တာက ပြောကြားသည်။
“ တပ်ဖွဲ့တွေ ထပ်ပြီး အားဖြည့်တာမျိုး မရှိပါဘူး။ နယ်စပ်ကို ကျူးကျော် ထိပါးတာလည်း မရှိပါဘူး။ တခြားတစ်ဖက်ရဲ့ စခန်းတွေဆီ ကင်းလှည့်တာ မရှိပါဘူး” ဟု သတင်းစင်တာက ဆိုသည်။
အင်အားအသုံးပြု၍ နယ်စပ်စည်း ပြောင်းလဲခြင်းကို ကမ္ဘောဒီးယားက လက်ခံမည် မဟုတ်ကြောင်း ကမ္ဘောဒီးယား အစိုးရ ပြောရေးဆိုခွင့်ရှိသူ ပန်ဘိုနာက အစောပိုင်းတွင် ပြောကြားခဲ့ပြီးနောက် ထိုင်းသတင်းစင်တာ၏ ရှင်းလင်း ပြောကြားချက် ထွက်ပေါ်လာခြင်း ဖြစ်သည်။
ယခင်က သဘောတူညီချက်များတွင် မပါဝင်သော လုပ်ရပ်များသည် တရားဝင်မည် မဟုတ်ဘဲ အပစ်အခတ် ရပ်စဲမှု ကို ချိုးဖောက်မှု ဖြစ်မည်ဟုလည်း ကမ္ဘောဒီးယား ပြောခွင့်ရသူက သတိပေး ပြောကြားသည်။
အပစ်အခတ် ရပ်စဲမှုမတိုင်မီ ထိုင်းနိုင်ငံ၏ ထိန်းချုပ်မှုအောက်တွင် ရှိသော ဧရိယာများမှ လှုပ်ရှားမှုများမှာ နယ်စပ် စည်း ပြောင်းလဲမှုဟု မဆိုနိုင်ကြောင်း ထိုင်းဘက်က ပြောသည်။
“အပစ်အခတ် ရပ်စဲမှုမတိုင်ခင် မြေပြင် အခြေအနေပေါ် မူတည်ပြီး ထိုင်းနိုင်ငံက ယခင် ထိန်းချုပ်ထားတဲ့ ဧရိယာတွေမှာ ထိန်းချုပ်မှုနဲ့ လုံခြုံရေးရယူဖို့ ရည်ရွယ်ပြီး ထိုင်းတပ်ဖွဲ့တွေ ချထားတာဟာ နယ်စပ်ကို ပြောင်းလဲတာလို့ မသက်ရောက်ပါဘူး” ဟု ပူးတွဲသတင်းစင်တာက ထုတ်ပြန်သည်။
ထိုင်းနိုင်ငံက နိုင်ငံတကာဥပဒေ နှင့်အညီ ပြုမူ ဆောင်ရွက်နေပြီး မည်သည့်နိုင်ငံ၏ အချုပ်အခြာ အာဏာကိုမျှ မချိုးဖောက်ဘဲ ငြိမ်းချမ်းရေး၊ ပြည်သူ့လုံခြုံရေးနှင့် တည်ငြိမ်အေးချမ်းမှု ရှိရေးကိုသာ ရည်ရွယ်၍ လုပ်ဆောင်နေသည် ဟုလည်း ထုတ်ပြန်ချက်က ထပ်မံ အတည်ပြုသည်။
ထိုအတောအတွင်းမှာပင် ပြည်သူလူထု အနေဖြင့် ထိုင်းတော်ဝင်စစ်တပ်အား ယုံကြည်မှု အပြည့်အဝထားရှိရန် ထိုင်းနယ်စပ်၊ ဆူရင်ပြည်နယ်မှ တပ်ဖွဲ့များထံ သွားရောက်၍ အားပေးစကား ပြောကြားခဲ့သည့် ထိုင်းအိမ်စောင့် ဝန်ကြီးချုပ် အနုတင်ချန်ဗီရာကူးလ်က ပြောကြားသည်။
ထိုင်းနှင့် ကမ္ဘောဒီးယား နှစ်ဖက်စလုံးက အပစ်အခတ် ရပ်စဲမှုကို ဆက်လက် လိုက်နာနေကြသဖြင့် တတိယအကြိမ် တိုက်ပွဲများ ဖြစ်လာနိုင်သည် ဟူသော ကောလာဟလ မစိုးရိမ်ကြရန် ဆူရင်ပြည်နယ်၊ ကက်ပ်ချောင်ခရိုင်၊ ပရာဆက်ခါနာ ဒေသမှ တပ်ဖွဲ့များဆီ သွားရောပြီးနောက် အနုတင်က ပြောကြားသည်။
အေးကျော်
Ref: Thai PBS World/The Nation
#MeKongNews
#နယ်စပ်စည်း
#ကမ္ဘောဒီးယား
#ထိုင်း
#ငြင်းဆို
