မဲခေါင်၊ ဇန်နဝါရီ ၁

မြဝတီ – ရန်ကုန် ခရီးတွင် ရှမ်းပြည်မှတ်ပုံတင် ၁၃/ ကိုင်ဆောင်ထားသူများမှာ ကားခအခြား သူများထက် ကားခ အဆ ၂၀ ကျော် ပိုပေးနေရကြောင်း ရှမ်းဒေသခံ ခရီးသည်များထံမှ သိရသည်။

လက်ရှိတွင် ယင်းခရီးစဉ်အတွက် ပုံမှန် ခရီးသည်များ၏ ကားခမှာ တစ်သိန်း ၃ သောင်းကျပ်သာ ရှိသော်လည်း ရှမ်းပြည်မှတ်ပုံတင် ကိုင်ဆောင်ထား သူများမှာမူ ၁၈ သိန်းမှ ၂၅ သိန်း အထိပေးနေရကြောင်း သိရသည်။

“၁၃/ ဖြစ်ရတာလည်း မလွယ်ဘူးဗျာ။ တခြား တရုတ်ကျားဖြန့် လုပ်တဲ့သူတွေ ဘာတွေက ပိုက်ဆံတောင်းတာ ထားပါတော့။ ငါတို့ဆို ရှမ်းစစ်စစ်ကွာ၊ ကျားဖြန့်လုပ်တာလည်းမဟုတ်ဘူးကွာ၊ တရုတ်စကားလည်း မတတ်ဘူးကွာ။ အဲဒါကို ကားခက ၁၈ သိန်း ၂၅ သိန်း ဆိုတော့ မဟုတ်တော့ဘူးလေ။ ဘယ်လိုလုပ် အိမ်ပြန်လည် ရတော့မလဲ”ဟု မြဝတီတွင် ဈေးဆိုင်ဖွင့်နေသည့် ရှမ်းအမျိုးသမီးတစ်ဦးက ပြောသည်။

ကရင်ပြည်နယ်တွင် ကျားဖြန့်နှိမ်နှင်းရေး လုပ်ဆောင်လာ ပြီးနောက် ၁၃/ ကိုင်ဆောင်ထားသူများကို ကျားဖြန့်လုပ်ငန်းမှ ထွက်ပြေးလာသူများဟု သတ်မှတ်ကာ ခရီးသွားခွင့်မပြုခြင်း၊ ကားလက်မှတ် မရောင်းချပေးခြင်းများကို စစ်ကောင်စီ ဖိအားဖြင့် ပြုလုပ်နေသည်။

ထို့ကြောင့် မြဝတီတွင် နေထိုင်သည့် ရှမ်းပြည်မှတ်ပုံတင် ကိုင်ဆောင်ထားသူ အချို့မှာ ခရီးသွားရာတွင် အခက်အခဲ ကြုံတွေ့နေရပြီး မဖြစ်မနေ သွားလာရန် လိုအပ်ပါက စစ်ကောင်စီ စစ်ဆေးရေးဂိတ်များကို ပိုက်ဆံပေးကာ သွားလာရသဖြင့် ခရီးစရိတ်များ အဆမတန် ကုန်ကျနေကြောင်း သိရသည်။

“ဒါက ၁၃/ တွေကို တမင်သက်သက် ခွဲခြားနှိပ်စက်တာ ဖိနှိပ်တာလို့ပဲ မြင်တယ်။ သူတို့ စားပေါက်အတွက် လုပ်တာလို့ပဲ မြင်တယ်။ ကျားဖြန့်မှာ လုပ်တာ ရှမ်းပြည်သားတွေပဲ လုပ်တာမှ မဟုတ်တာ။ လူစုံ နေရာစုံကနေ လာလုပ်ကြတာပဲလေ။ ကျားဖြန့်တွေ ရှိတဲ့နေရာကို ဝင်ဖမ်းလေ။ အခုကျ ၁၃ မျဉ်းစောင်း ကိုင်တာနဲ့ အပြစ်သားလို ဖြစ်တာ ကျတော့ မဟုတ်သေးဘူးလေ”ဟု မြဝတီတွင် အဝတ်အထည်ဆိုင် ဖွင့်နေသူတစ်ဦးက ပြောသည်။

ယင်းအခြေအနေများကြောင့် နှစ်သစ်ကူးတွင် မြဝတီမှ တဆင့် အိမ်ပြန်ချင်သည့် ရှမ်းပြည်သူများလည်း ခရီးစရိတ် မတတ်နိုင်သဖြင့် မပြန်ဖြစ်သူများလည်း အများအပြားရှိခဲ့သည်။

#MeKongNews
#မြဝတီ
#၁၃/
#မှတ်ပုံတင်
#ကားခ
#ကုန်ကျ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)