မဲခေါင်၊ ဒီဇင်ဘာ ၃၀
ပူတင်အချစ်ဆုံး ချစ်သူ ကျွမ်းဘားမယ် အလီနာကာဘေးဗားနှင့် သား ၂ ဦးနေသည့် ဗယ်လ်ဒိုင်း နန်းတော်ကို ဒရုန်းများဖြင့် တိုက်ခိုက်ခံရသည်ဟု ရုရှားဘက်က ထုတ်ပြန်ပြီးနောက် ၎င်းတို့ လုပ်ခဲ့ခြင်းမရှိဟု ယူကရိန်းသမ္မတ ဇီလန်စကီးက ငြင်းချက်ထုတ်ထားသော်လည်း ဇီလန်စကီးအား သုတ်သင်ပြီး ရုပ်အလောင်းအား လှည့်လည်ပြမည်ဟုပါ ပူတင်၏ လက်ရုံး ရုရှား သမ္မတဟောင်း မက်ဗီဒက်ဗ်က ခြိမ်းခြောက် ပြောဆိုသွားခဲ့သည်။
ဒီဇင်ဘာ ၂၈ ရက်နှင့် ၂၉ ရက်တို့တွင် ယူကရိန်းဘက် မှ ဒရုန်းပေါင်း ၉၁ စီးဖြင့် ယခုတိုက်ခိုက်မှုကို လုပ်ဆောင်ရာတွင် ၄၁ စီးအား နော့ဗ်ဂိုရော့ဒ်ဒေသမှာပင် ဖျက်ချခဲ့ပြီး ကျန် ၄၉ စီးမှာ ပူတင်နန်းတော်သို့ ဦးတည်ပြီး အားလုံးကို ဖျက်ချနိုင်ခဲ့သည်ဟု ရုရှားနိုင်ငံခြားရေးဝန်ကြီး လက်ဗ်ရော့ဗ်က ထုတ်ပြန်ခဲ့သည်။
ယင်းနှင့်ပတ်သက်၍ ငြိမ်းချမ်းရေး ဆွေးနွေးမှု လုပ်နေချိန် ယခုလိုလုပ်ရပ် မှန်သည်ဆိုပါက ဒေါသထွက်စရာ ဖြစ်ပြီး အမှန်တကယ် တိုက်ခိုက်မှု ရှိ၊ မရှိကို စုံစမ်းသွားမည်ဟု အမေရိကန်သမ္မတ ဒေါ်နယ်ထရမ့်က ပြောဆိုခဲ့သည်။
သို့သော် ဒရုန်းတိုက်ခိုက်မှုရှိသည်ဟု လူဦးရေ ၁၅၀၀၀ နေထိုင်သည့် ဗယ်လ်ဒိုင်အရပ်မှ မည်သူကမျှ အသံမထွက်ခဲ့သဖြင့် ရုရှားဘက်က ငြိမ်းချမ်းရေး မလိုချင်သောကြောင့် အကွက်ဆင်ခြင်းသာ ဖြစ်သည်ဟု ဇီလန်းစကီးက တုံ့ ပြန်ဝေဖန်ခဲ့သည်။
သို့သော်လည်း “ငြိမ်းချမ်းရေးဆွေးနွေးနေတုန်း ဒီတိုက်ခိုက်လာမှုဟာ မိုက်မဲတာပဲ။ သူ (ဇီလန်းစကီး) က စစ်ကို လိုလားနေသူပါ။ ကောင်းပြီပေါ့။ ဒါဆိုလည်း အနည်းဆုံးတော့ သူ့ရဲ့ တန်ဖိုးမရှိတဲ့ အသက်အတွက် တစ်သက်လုံး ပုန်းအောင်းနေပေရော့ပဲ။ ဒီမှာ ရေးနေတာ သူ့ရဲ့ ရုပ်ပျက်ဆင်းပျက် အဆုံးသတ်ရမယ့် အကြောင်းမဟုတ်ဘူး။ အခု Grim Reaper (သေမင်း) က ဆင်းလာနေပြီ။ အနာဂတ်အတွက် သိပ်အရေးကြီးတဲ့ ကိစ္စ။ သူသေဆုံးရင် အလောင်းကို ကျောင်းတွေမှာ လှည့်ပြရမယ်။ စိန့်ပီတာစဘာ့ဂ်မြို့က ဇာဘုရင်တွေ သတ်ဖြတ်ပြီး သိမ်းထားတဲ့ အလောင်းတွေထားရာ ကန့်စ်ကာမာရာ ပြတိုက်မှာ ပြထားရမယ်” ဟု လူမှု ကွန်ရက် X တွင် မက်ဗီဒက်ဗ်က ရေးတင်သွားခဲ့သည်။
ကိုကလင်း
Ref:Thesun
#MeKongNews
#ပူတင်အိမ်
#ဒရုန်း
#တိုက်ခိုက်
#ဇီလန်စကီး
#ခြိမ်း ခြောက်
