မဲခေါင်၊ ဒီဇင်ဘာ ၂၇
ရက်ပေါင်း ၂၀ ခန့် နှစ်ဖက် အပြင်းအထန် တိုက်ခိုက်ခဲ့ကြပြီးနောက် ၇၂ နာရီကြာ အပစ်ရပ်ရန် ထိုင်းနှင့် ကမ္ဘောဒီးယားတို့ သဘောတူညီမှုရပြီ ဖြစ်သည်။
နှစ်နိုင်ငံ ကာကွယ်ရေးဝန်ကြီးများ ဆွေးနွေးမှုများအပြီးတွင် အောက်တိုဘာ ၂၆ ရက်က ရရှိခဲ့သော ကွာလာလမ်ပူ သဘောတူညီချက် နှင့်အညီ အပစ်အခတ်ရပ်စဲရေးနှင့် အနာဂတ် ပူးပေါင်း ဆောင်ရွက်ရေးဆိုင်ရာ သဘောတူစာချုပ်ဖြစ်သည့် ပူးတွဲကြေညာချက်ကို ယနေ့ ဒီဇင်ဘာ ၂၇ ရက် နံနက်ပိုင်းတွင် လက်မှတ်ရေးထိုးခဲ့ကြသည်။
ယင်းသဘောတူညီချက် အစိတ်အပိုင်းတစ်ရပ် အနေဖြင့် ထိန်းသိမ်းထားသော ကမ္ဘောဒီးယား စစ်သုံ့ပန်း ၁၈ ဦးကို ထိုင်းက ပြန်လွှဲပေးမည် ဖြစ်သည်။
ထိုင်းနိုင်ငံ၊ ချန်ဌာဘူရီခရိုင်၌ ယနေ့နံနက်တွင် ပြုလုပ်သည့် ထိုင်း – ကမ္ဘောဒီးယား အထွေထွေ နယ်စပ်ကော်မတီ အစည်းအဝေးသို့ ထိုင်းကာကွယ်ရေးဝန်ကြီး နက်သဖွန်နာ့ခ်ဖနစ်နှင့် ကမ္ဘောဒီးယား ကာကွယ်ရေးဝန်ကြီး တီဆေးဟတို့ ဦးဆောင်သော နှစ်ဖက် ကိုယ်စားလှယ်အဖွဲ့ တက်ရောက်ခဲ့ကြသည်။
နှစ်နိုင်ငံအကြား သီးသန့်ဆွေးနွေးမှုမှာ နာရီဝက်ခန့် ကြာမြင့်ခဲ့သည်။
ယင်းဆွေးနွေးပွဲသို့ ထိုင်းနိုင်ငံဆိုင်ရာ မလေးရှားစစ်သံရုံးမှ လက်ထောက်စစ်သံမှူးနှင့် ထိုင်းနိုင်ငံရောက် အာဆီယံလေ့လာရေးအဖွဲ့ အကြီးအကဲဖြစ်သူ ဗိုလ်မှူးချုပ် ဆမ်ဆူရီဇယ်ဘင်မူဆာ ဦးဆောင်သောအဖွဲ့ကလည်း လုပ်ငန်းစဉ်များကို စောင့်ကြည့်ရန် တက်ရောက်ခဲ့ကြသည်။
နှစ်နိုင်ငံအကြား လတ်တလော ဖြစ်ပွားနေသည့် ပဋိပက္ခ၏ အဓိက အကြောင်းအရင်းမှာ ၁၁ ရာစုက တည်ဆောက်ခဲ့သည့် ပရီယာဝိဟာရ ဟိန္ဒူဘုရားကျောင်း နယ်မြေပိုင်ဆိုင်မှုနှင့် ဆက်စပ််သည်။
ယင်းဘုရားကျောင်းအား ကမ္ဘောဒီးယားပိုင် ဖြစ်ကြောင်း အပြည်ပြည်ဆိုင်ရာတရားရုံး – ICJ က ၁၉၆၂ ခု နှစ်တွင် ဆုံးဖြတ်ခဲ့သော်လည်း ဘုရားကျောင်းဘေးရှိ ၄ ဒသမ ၆ စတုရန်းကီလိုမီတာ ကျယ်သည့် နယ်မြေကို နှစ်ဖက်စလုံးက ၎င်းတို့ပိုင်ဖြစ်ကြောင်း အငြင်းပွားနေကြဆဲ ဖြစ်သည်။
လတ်တလော တိုက်ပွဲများအတွင်း လူပေါင်း ၁၀၁ ဦးခန့် သေဆုံးခဲ့ပြီး နှစ်ဖက်စလုံးမှ လူပေါင်းတစ်သန်းခန့် နေရပ်စွန့်ခွာ တိမ်းရှောင်ခဲ့ရသည်။
Ref: Khaosod
#MeKongNews
#ထိုင်း
#ကမ္ဘောဒီးယား
#၇၂နာရီ
#အပစ်ရပ်
