မဲခေါင်၊ ဒီဇင်ဘာ ၂၂
သီတင်းသုံးပတ်ထဲ ဝင်ရောက်လာပြီ ဖြစ်သော နှစ်နိုင်ငံနယ်စပ် တိုက်ခိုက်မှုများအတွက် မလေးရှားနိုင်ငံ၊ ကွာလာလမ်ပူမြိုတွင် ယနေ့ ပြုလုပ်ခဲ့သော ဆွေးနွေးပွဲများတွင် အပစ်အခတ်ရပ်စဲရေး သဘောတူညီမှု မရခဲ့ဘဲ နှစ်ဖက် ကာကွယ်ရေးအရာရှိများ ဒီဇင်ဘာ ၂၄ ရက်တွင် တွေ့ဆုံရေးကို သဘောတူခဲ့ကြသည်ဟု ထိုင်းနိုင်ငံခြားရေးဝန် ကြီး သီဟာဆက်ဖွမ်ခက်ကောက ပြောသည်။
အာဆီယံ နိုင်ငံခြားရေးဝန်ကြီးများ၏ ယနေ့ အထူးအစည်းအဝေးတွင် ထိုသို့ ဆုံးဖြတ်ခဲ့ခြင်း ဖြစ်ကာ ကာကွယ်ရေးအရာရှိများက နှစ်နိုင်ငံကြား အပစ်ရပ်ရေး ဖြစ်နိုင်ခြေကို ဆွေးနွေးကြမည် ဖြစ်သည်။
ယင်းတွေ့ဆုံမှုကို နှစ်ဖက် ထူထောင်ထားသော စေ့စပ်ရေးယန္တရား ဖြစ်သည့် အထွေထွေနယ်ခြားကော်မတီ – GBC မှတစ်ဆင့် လုပ်ဆောင်သွားကြရန် နှစ်နိုင်ငံကြား သဘောတူခဲ့ကြကာ ထိုင်းနိုင်ငံ၊ ချမ်ဌာဘူရီခရိုင်ရှိ နယ်စပ်တစ်နေရာတွင် တွေ့ဆုံသွားကြရေးကို ထိုင်းက အဆိုပြုထားကြောင်း ဖွမ်ခက်ကောက ကွာလာလမ်ပူမြို့ သတင်းစာ ရှင်းလင်းပွဲတွင် ပြောသည်။
ယင်းနှင့်ပတ်သက်၍ မှတ်ချက်ပေးရန် တောင်းဆိုမှုကို ကမ္ဘောဒီးယား ကာကွယ်ရေးဝန်ကြီးဌာနက ချက်ခြင်း မတုံ့ပြန်ခဲ့ကြောင်း ရိုက်တာသတင်းက ဆိုသည်။
ကမ္ဘောဒီးယားထံမှ ခိုင်မာသော စိတ်ပိုင်းဖြတ်မှုနှင့် စစ်မှန်သော အပစ်အခတ် ရပ်စဲမှုကို ထိုင်းနိုင်ငံက အလိုရှိကြောင်းနှင့် လုပ်ငန်းစဉ်အား ရှေ့ဆက်နိုင်ရန် မိုင်းများရှင်းလင်းခြင်းကို မဖြစ်မနေ လုပ်ဆောင်ရမည်ဟုလည်း ထိုင်းနိုင်ငံခြားရေးဝန်ကြီးက ဆက်ပြောသည်။
“ အပစ်အခတ်ရပ်စဲမှု တစ်ခုကို ကြေညာလို့ မရပါဘူး။ ဆွေးနွေးဖို့ လိုအပ်ပါတယ်” ဟု ၎င်းက ဆိုသည်။
အာဆီယံ အိမ်နီးချင်းနှစ်နိုင်ငံကြား သီတင်းနှစ်ပတ်ကြာ အပြင်းအထန် တိုက်ခိုက်မှုများအတွင်း အနည်းဆုံး လူ ပေါင်း ၈၀ သေဆုံးခဲ့ကာ လူပေါင်း ၅ သိန်းခန့် နေရပ်စွန့်ခွာ စစ်ဘေးရှောင်နေရသည်။
နှစ်ဖက်ဆွေးနွေးပွဲများ ပြန်လည်စတင်ရန် နှစ်နိုင်ငံကြား ဆုံးဖြတ်ချက်တွင် အမေရိကန်လည်း မပါဝင်သလို၊ တရုတ်လည်း မပါဝင်ဘဲ ထိုင်းနှင့် ကမ္ဘောဒီးယားတို့ကသာ လုပ်ဆောင်ခဲ့ကြသည်ဟု သီဟာဆက်က ပြောသည်။
လာအိုနိုင်ငံအနီး သစ်တောထူထပ်သော ဧရိယာများမှ တောင်ပိုင်းကမ်းရိုးတန်း တစ်လျှောက်အထိ မိုင်းပေါင်း ၅၀၀ ကျော် ရှည်လျားသော နယ်စပ်မျဉ်းတစ်လျှောက် နေရာအများအပြားတွင် နှစ်ဖက်ကြား ပြင်းထန်သော တိုက်ခိုက်မှုများ ဖြစ်ပေါ်ခဲ့ကာ အခြားတစ်ဖက်က ပစ်ခတ်မှုများ စတင်ခဲ့ကြောင်း အပြန်အလှန် စွပ်စွဲနေကြသည်။
ထိုင်းနိုင်ငံက တိုက်ခိုက်မှုများ ပိုမိုလုပ်ဆောင်၍ ၎င်းတို့၏ အချုပ်အခြာ နယ်မြေကို ချိုးဖောက်နေကြောင်း ကမ္ဘောဒီးယား ကာကွယ်ရေးဝန်ကြီးဌာနက ယနေ့ ပြောကြားပြီး ၎င်းတို့၏ ပိုင်နက်ကို အစွမ်းကုန် ကာကွယ်သွားမည်ဟု သန္နိဌာန်ပြုခဲ့သည်။
ထို့အတူ နယ်စပ်မှ မြို့တစ်မြို့ဆီသို့ ဒုံးကျည်များဖြင့် ပစ်ခတ်ရန် ကမ္ဘောဒီးယားက ကြိုးစားနေကြောင်းနှင့် မြေမြှုပ် မိုင်းထိမှန်ပြီး နောက်ထပ် ထိုင်းစစ်သားတစ်ဦး ခြေတစ်ဖက် ဆုံးရှုံးသွားခဲ့ကြောင်း ထိုင်းစစ်တပ်က ယနေ့တွင် ထုတ်ပြန်ပြောကြားသည်။
ကမ္ဘောဒီးယားက မိုင်းအသစ်များ ထပ်ထောင်ပြီး နိုင်ငံတကာ သဘောတူညီချက်များကို ချိုးဖောက်နေကြောင်း ဘန်ကောက်က စွပ်စွဲပြီး ယင်းပြောဆိုမှုများကို ဖနွမ်းပင်က ပယ်ချသည်။
အေးကျော်
Ref: Reuters
#MeKongNews
#ထိုင်း
#ကမ္ဘောဒီးယား
#အပစ်ရပ်
#သဘောတူညီမှု
