မဲခေါင်၊ ဒီဇင်ဘာ ၂၁

ယခုနှစ်တွင် သွင်းအားစု အဆမတန် စျေးတက်ပြီး အရင်းနှီးကြီးကာ လက်ရှိ၌ အာလူးစျေး အဆမတန် ကျခြင်းကြောင့် ပင်လောင်းတောင်သူများ အရှုံးပေါ်နေကြာင်း ဒေသခံများထံမှ သိရသည်။

ယခင်နှစ်တွင် အာလူးတစ်ပိဿာ ၆ ထောင်၊ ၇ ထောင်ကျပ်အထိ ရရှိသော်လည်း ယခုနှစ်တွင် ၂ ထောင်ကျပ် ဝန်းကျင်သာရှိသဖြင့် အရှုံးဖြင့် ရင်ဆိုင်နေရကြောင်း တောင်သူများက ပြောသည်။

“အာလူးစိုက်တာက အရင်းအနှီးများတယ်။ ရရင်လည်း များတယ်၊ အခုနှစ်က ဈေးမရှိတော့ အများကြီးရှုံးတယ်။ ဆေးဖျန်းဖိုးရော၊ ရေဖိုးရော၊ ပိုက်ဖိုးရော၊ မြေသြဇာဖိုးရော၊ လူငှားခရော အများကြီးကုန်ခဲ့တာ။ အခုဈေးမရှိဘူး၊ အာလူးက အကြာကြီး သိုလှောင်ထားလည်း မရတော့ အရှုံးနဲ့ပဲ ရောင်းကြရတာ များတယ်”ဟု ဒေသခံ တောင်သူတစ်ဦးက ဆိုသည်။

ရှမ်းပြည်တောင်ပိုင်း၊ ပင်လောင်းမြို့နယ်၊ နောင်တရားဒေသ ကျေးရွာအများစုတွင် အာလူးကို အဓိက စိုက်ပျိုးကြခြင်း ဖြစ်သည်။

ပြီးခဲ့သည့်နှစ်တွင် ‌အားလူးဈေး ကောင်းသည့်အပြင် ကျေးရွာထိ လာဝယ်ပေးသည့် ပွဲစားရှိသော်လည်း ယခုနှစ်တွင် လာဝယ်မှုလည်း မရှိကြောင်း ဒေသခံများက ဆိုသည်။

“ဂိတ်မှာ အရမ်းတောင်းတော့ ရွာအထိ မဝယ်ကြတော့ဘူး။ ကုန်စိမ်းသယ်ပြီ ဆိုရင် ဂိတ်တစ်ခုမှာ ကားတစ်စီးကို တစ်သိန်းကျော်လောက် တောင်းတာ။ တချို့ ဂိတ်ဆို ကားပါဖမ်းထားတာ အဲလိုတွေကြောင့် ပွဲစားက ရွာဘက်အထိ လာမဝယ်ရဲကြဘူး။ တောင်သူတွေ ကိုယ်တိုင် အောင်ပန်းအထိ သွားရောင်းရတယ်”ဟု ဒေသခံတစ်ဦးက ပြောသည်။

ပင်လောင်း၊ နောင်တရား ဒေသခံအချို့မှာ မိသားစုဝင်ငွေ အတွက် အာလူးစိုက်ပျိုးမှု အပေါ်သာ မှီခိုနေရခြင်းကြောင့် လက်ရှိတွင် စားဝတ်နေရေး အခက်အခဲနှင့်လည်း ရင်ဆိုင်နေရကြောင်း အာလူးစိုက် တောင်သူများက ပြောသည်။

ပင်လောင်းနှင့် နောင်တရားဒေသတွင် အာလူးကို မိုးရာသီတွင် တစ်ကြိမ်နှင့် နွေရာသီတွင် ရေသွင်းပြီး တစ်နှစ် ၂ ကြိမ် စိုက်ပျိုးကြကြောင်း တောင်သူများထံမှ သိရသည်။

#MeKongNews
#အာလူးစျေး
#ပင်လောင်း
#တောင်သူများ
#အရှုံးပေါ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)