မဲခေါင်၊ ဒီဇင်ဘာ ၁၈
ဗင်နီဇွဲလားသို့ မည်သည့် ရေနံတင်သင်္ဘောမှ ဝင်ထွက်ခွင့် မပြုဘဲ ပိတ်ပင်ကြောင်း အမေရိကန်သမ္မတ ဒေါ်နယ်ထရမ့်က ပြီးခဲ့သည့် ရက်ပိုင်းတွင် Truth Social လူမှုကွန်ရက်တွင် ရေးသားခဲ့ရာ ဗင်နီဇွဲလားသမ္မတ မာဂျူရိုက နိုင်ငံတကာ လွတ်လပ်စွာ ကုန်သွယ်ခွင့်ကို ချိုးဖောက်ခြင်းနှင့် စစ်လိုလားသော ခြိမ်းခြောက်ခြင်းဟု တုံ့ပြန်လိုက်သဖြင့် နှစ်နိုင်ငံ စစ်ဖြစ်ရန် အလွန် နီးကပ်လာပြီ ဖြစ်သည်။
ဗင်နီဇွဲလား ရေနံတင် သင်္ဘောတစ်စီးကို ရဟတ်ယာဉ်ပေါ်မှ ကွန်မန်ဒိုများ ဆင်းကာ သိမ်းပိုက်ခဲ့ပြီးနောက် ထရမ့်၏ ရေးသားမှု ထွက်ပေါ်ခဲ့ခြင်း ဖြစ်သည်။
လက်ရှိတွင် အမေရိကန် စစ်သင်္ဘောများ၊ စစ်လေယာဉ်များဖြင့် ကာရစ်ဘီယံ ပင်လယ်ပြင်တွင် ဗင်နီဇွဲလားနိုင်ငံကို ဝိုင်းပိတ်ဆို့ထားပြီး မာဂျူရိုကို ပိုမို အကြပ်ရိုက်စေရန် ထရမ့်က ဗင်နီဇွဲလားနိုင်ငံ၏ အဓိက ဝင်ငွေရင်းမြစ် ရေနံ တင်ပို့မှုများကိုပါ ပိတ်ဆို့လိုက်ခြင်း ဖြစ်သည်။
မာဂျူရိုသည် ခိုးယူထားသော ရေနံလုပ်ကွက်များမှ ရေနံများကို ပိတ်ဆို့ အရေးယူထားသည့် သင်္ဘောများဖြင့် တတိယကြားခံနိုင်ငံ (တရုတ်) သို့ တင်ပို့ပြီး ဝင်ငွေရင်းမြစ် ရယူကာ မူးယစ် အကြမ်းဖက်မှုများ၊ လူမှောင်ခိုမှုများ၊ လူသတ်မှုနှင့် ပြန်ပေးဆွဲမှုများ လုပ်ဆောင်နေ ခြင်းကြောင့် အမေရိကန် နိုင်ငံအနေဖြင့် သမ္မတဂျိုးဘိုင်ဒန် လက်ထက်တွင် နိုင်ငံအတွင်း ခိုလှုံခွင့် ပေးခဲ့သော မည်သည့် ဗင်နီဇွဲလား နိုင်ငံသားကိုမှ လက်မခံဘဲ ပြန်ပို့ကာ နှိမ်နင်းမှုများ ပြုလုပ်သွားမည်ဟု ထရမ့်၏ ပြောရေးဆိုခွင့်ရှိသူက ထုတ်ပြန် ကြေညာသွားခဲ့သည်။
ကာရစ်ဘီယံ ပင်လယ်ပြင်တွင် တပ်ဖွဲ့စုံ ပို့ထားသော စစ်ဆင်ရေးသည် အာမန်ဒါ စစ်ဆင်ရေး ဖြစ်သည်ဟု ထရမ့်က အသိပေးထားပြီး မိမိစေလွှတ်ထားသည့် စစ်အင်အား ပိုကြီးသထက် ကြီးထွားလာမည်ဟု မာဂျူရို၏ တုံ့ပြန်မှုပြီးနောက် ထပ်မံ သတိပေးလိုက်ရာ အမေရိကန်က ဗင်နီဇွဲလားမြေအတွင်း အချိန်မရွေး ဝင်ရောက် တိုက်ခိုက်လာဖွယ် ရှိကြောင်း သုံးသပ်နေကြသည်။
ကိုကလင်း
Ref: Thesun
#MeKongNews
#ဒေါ်နယ်ထရမ့်
#မာဂျူရို
#ခြိမ်းခြောက်မှု
#ဗင်နီဇွဲလား
