မဲခေါင်၊ နိုဝင်ဘာ ၂၂
ထိုင်းနိုင်ငံ နာမည်ကြီး ဘန်ကောက် ရမန်ထောင်အတွင်း တရုတ်ရာဇဝတ်ဂိုဏ်းသားများသည် ငွေကြေး တတ်နိုင်သဖြင့် ထောင်တွင်းသူဌေးများသဖွယ် နေချင်သလို နေထိုင်နေကာ မိန်းကလေးများပင် ခေါ်ယူ လိင်ဆက်ဆံမှုများရှိနေကြောင်း စစ်ဆေးတွေ့ရှိရသဖြင့် ထောင်မှူး မာနော့ချွမ်ချန်းနှင့် ထောင်တာဝန်ရှိ သူ ၁၄ ယောက်အား ဖမ်းဆီးပြီး စစ်ဆေးနေပြီဖြစ်သည်။
အစောပိုင်းသတင်းများအရ တရုတ်ဒုစရိုက်အကျဉ်းသားများသည် အဆင့်မြင့်ဂျပန်လိင်ဝန်ဆောင်မှု ပေးသူ အမျိုးသမီးအား ထောင်တွင်းအထိ ခေါ်ယူပြီး လေအေးပေးစက်တပ်ထားသည့် မြေအောက် အချုပ်ခန်းအတွင်း အတူနေကာ လိင်ဆက်ဆံမှု ပြုကြောင်း သတင်းပေါက်ကြားပြီးနောက် တရားရေး ဝန်ကြီးကိုယ်တိုင် ထိုင်းဝန်ကြီးချုပ် အနုတင်အမိန့်ဖြင့် ထောင်အား နိုဝင်ဘာ ၁၆ ရက်မှ စတင်ပြီး အဆောင်အလိုက် စီးနင်းစစ်ဆေးမှုများ ပြုလုပ်ခဲ့သည်။
ဝန်ကြီးချုပ် အနုတင်က ယခုလို ရှက်စရာ ကောင်းလွန်းသော အကျင့်ပျက်မှုကြီးတွင် မည်မျှ ရာထူးကြီးနေပါစေ ကျူးလွန်သူတိုင်းကို ခွင့်မလွှတ် ဘဲ အရေးယူမည်ဖြစ်ကာ တရားရေးဝန်ကြီးက ဦးဆောင်တာဝန်ယူရမည်ဟု အစောပိုင်းကတည်းက ဒေါသတကြီး ပြောကြားသွားခဲ့သည်။
နိုဝင်ဘာ ၂၁ ရက်နေ့တွင် ရမန်ထောင် ဇုန် (၈) သို့ တရားရေးဝန်ကြီး ဒုတိယရဲမှူးချုပ် ရတ်သာပေါင်နာ အိုဝါရတ်ကိုယ်တိုင် ဦးဆောင်ပြီး စီးနင်းခဲ့ရာ ထောင်စောင့်များနေသည့် ထောင်တွင်းအခန်းအောက် မြေအောက်ခန်းထဲ ဇိမ်ခံလျှပ်စစ်ပစ္စည်းများ၊ လေအေးပေးစက်များ၊ တီဗီ၊ မီးခြစ်နှင့်အခြား ထောင်သား များ မသုံးဆောင်ရသည့် ဇိမ်ခံပစ္စည်းများစွာကို တွေ့ရသည့်အပြင် အအေးခန်းထဲ တရုတ်မော်ဒယ်မ လေး ၂ ဦးကို လိင်ကိစ္စ အသုံးတော်ခံရန် ခေါ်ထည့်ထားသည်ကိုပါ ပက်ပင်း ဖမ်းမိခဲ့သည်။
ယင်းရမန်ထောင် ဇုန် (၈) အဆောင်သည် အကျဉ်းသား ၉၀၀ ရှိပြီး တရုတ်မော်ဒယ်မ ၂ ဦးသည် ဧည့်သည် များဝင်ပေါက်မှ ဝင်ခြင်းမဟုတ်ဘဲ ထောင်စောင့် အခြံအရန်များဖြင့် ထောင်တွင်းသို့ အရာရှိ ဝင်ထွက်ခွင့်ကတ်ဖြင့်ဝင်ကာ မြေအောက် လေအေးပေးစက်တပ်ထားသည့် အခန်းအတွင်းသို့ ဝင်သွားခဲ့သည်ကို ဖျက်ထားသည့် CCTV မှတ်တမ်း များ ပြန်ဖော်ကြည့်ရာမှ မြင်တွေ့ခဲ့ရသည်။
ဒုရဲမှူးချုပ် ရတ်သာပေါင်က မိမိရဲဝန်ထမ်းဘ၀ နှစ်ပေါင်းများစွာအတွင်း ယခုလို ထောင်သားများ ထောင်တွင်း ဇိမ်ခံပြီး လိုချင်ရာ ရရှိနေသည်မျိုးကို မမြင်ဖူး၊ မကြားဖူးခဲ့ကြေင်း၊ တရားရေးစနစ်ကြီး တစ်ခုလုံးအတွက် အဆိုးရွားဆုံး အရှက်ကွဲခြင်းဖြစ်ကြောင်း၊ လက်ခံမရနိုင်သည့် အကျင့်ပျက်ခြစား မှုဖြစ်သောကြောင့် ဘန်ကောက်ရမန်ထောင်သာမက တစ်နိုင်ငံလုံးရှိ ထောင်များကိုပါ စီးနင်း စစ်ဆေး ရတော့မည်ဟု ပြောသွားခဲ့သည်။
ရမန်ထောင်မှူး မာနော့သည် ယခင်ကတည်းက မက္ကာအိုသို့ မကြာခဏသွားနေခဲ့သည်မှတ်တမ်းရှိသဖြင့် တရုတ်ရာဇဝတ်ဂိုဏ်းသားများနှင့် ရင်းနှီးပတ်သက်မှုများ ရှိနေခြင်းမှ ယခုလို တရုတ်အကျဉ်းသား ၂၀၀ ကျော်ရှိသည့်ထောင်အတွင်း လုပ်ချင်ရာ လုပ်နေနိုင်ခြင်းဖြစ်မည်ဟုလည်း ထိုင်းသတင်းများက သုံးသပ် နေကြသည်။
ကိုကလင်း
Ref: Khaosod
#MeKongNews
#ဘန်ကောက်
#အကျဉ်းထောင်
#တရုတ်နိုင်ငံသား
#ထောင်မှူး
