မဲခေါင်၊ နိုဝင်ဘာ ၁၂
နိုဝင်ဘာ ၁၂ ရက် မွန်းလွဲပိုင်၌ ထိုင်းနိုင်ငံ ချင်းမိုင်ရှိ အမှတ် (၅) ခရိုင်ရဲတပ်ဖွဲ့မှ သတင်းစာရှင်းလင်းပွဲ ပြုလုပ်ခဲ့ရာ ရက်ပိုင်းအတွင်း မူးယစ်ဆေး အမှု ၄ ခုတွင် စိတ်ကြွဆေး ၁၃ ဒသမ ၂ သန်း သိမ်းဆည်းရမိသလို သံသယတရားခံ ၁၀ ဦးပါ ဖမ်းဆီးရမိခဲ့သည်ဟု ခရိုင် ဒုရဲမှူးကြီး ကရစ်သာပွန်က ထုတ်ပြန်ပြောဆိုခဲ့သည်။
အမှုဖြစ်စဉ် (၁) မှာ လမ်းဖန်းခရိုင် ဆော့ပရပ်ရဲစခန်းမှ ဖမ်းဆီးရမိသော အမှုဖြစ်ပြီး ငွေရောင် တိုယိုတာစီဒင်ကားတစ်စီး ရတ်ချာဘူရီရပ်မှ ရာယောင်းသို့ ဦးတည်မောင်းနှင်လာစဉ် စစ်ဆေးရေး ဂိတ်၌ ရဲတပ်ဖွဲ့က တားဆီး စစ်ဆေးရာ စိတ်ကြွဆေး ၂၀၀၀၀၀ နှင့်အတူ ယာဉ်မောင်းစုံတွဲဖြစ်သော မစ္စတာရာချန်နှင့် မစ္စမာယုရာတို့ကို လက်လုပ်သေနတ်နှင့် ကျည် ၅ တောင့်နှင့်အတူ ဖမ်းဆီးရမိခဲ့ခြင်းဖြစ်သည်။
အမှုဖြစ်စဉ် (၂) မှာ ဒန်ချိုင်ခရိုင်၊ ဟွိုင်ရိုင်စစ်ဆေးရေးဂိတ်၌ ပတ်ချာဘန်းခရိုင် ကားနံပတ်ပြားနှင့် နစ်ဆန်းစီဒင်ကားတစ်စီး မောင်းလာစဉ် စစ်ဆေးမခံဘဲ လှည့်မောင်းပြေးရာမှ လိုက်ဖမ်းရာ ကားကို ၁ ကီလိုမီတာအကွာ၌ ထားပြီး ထွက်ပြေးသွားသဖြင့် တရားခံများလွတ်မြောက်ခဲ့သော်လည်း ကားအတွင်း စိတ်ကြွဆေးပြား ၆၉၈၀၀၀ သိမ်းဆည်းရမိကာ နောက်ပိုင်း ကားသမား ဂျီဒါအိုဆိုသူကို ဖမ်းဆီးနိုင်ခဲ့ကြောင်းနှင့် ချင်းရိုင်မှ ယာလာခရိုင်သို့ ပို့ဆောင်ခိုင်းသဖြင့် အခကြေးငွေယူကာ ပို့ဆောင် သည်ဟု ထွက်ဆိုခဲ့ကြောင်း သိရသည်။
အမှုဖြစ်စဉ် (၃) မှာ ချင်းရိုင်ခရိုင် ရင်မ်ခုတ်ခရိုင်ခွဲမှ ကုန်လှောင်ရုံတစ်ခုအတွင်း ဆိုဖာခုံများထဲ ဝှက် ထားသည့် စိတ်ကြွဆေးပြား ၁၀ သန်းကို ချင်းရိုင်ထောက်လှမ်းရေးအသင်းမှ ရှာဖွေဖော်ထုတ်ဖမ်းဆီး မိခြင်းဖြစ်ကာ အလုပ်သမား ၅ ယောက်ကို ဖမ်းဆီးထားပြီး ဆက်လက်စုံစမ်းနေကြောင်း သိရသည်။
အမှုဖြစ်စဉ် (၄) မှာ ထောက်လှမ်းရေးအသင်းမှ သတင်းကြိုတင်ရရှိသဖြင့် တိုယိုတာကားတစ်စီးအား စောင့်ဖမ်းရာ ရှေ့ပြေး တိုယိုတာကားနှင့်အတူ ချော့ချိုင်ဆိုသူနှင့် အဖီချက်ဆိုသူ နှစ်ဦးကို ချင်းမိုင်- လမ်ဖန်းအမြန်လမ်းပေါ် ဖမ်းဆီးရမိခဲ့ခြင်းဖြစ်သည်။
အသီးအနှံများကြားတွင် ကားထဲ စိတ်ကြွဆေး ၂၅၇၀၀၀ သယ်ဆောင်လာအား တွေ့ရှိရပြီး နယ်စပ်ဒေသမှ သယ်ယူပို့ဆောင်ပေးရန် ငှားရမ်းသဖြင့် သယ်ဆောင်ပေးခြင်းဖြစ်သည်ဟု ထွက်ဆိုခဲ့ကြောင်း ချင်းမိုင်း မူးယစ်ဆေးကွန်ရက် ဖမ်းဆီးမှု သတင်းစာရှင်းလင်းပွဲ၌ ထုတ်ပြန်သွားခဲ့သည်။
ကိုကလင်း
#MeKongNews
#ချင်းမိုင်
#စိတ်ကြွဆေးပြား
#ထိုင်းနိုင်ငံ
#မူးယစ်ဆေးဝါး
