မဲခေါင်၊ နိုဝင်ဘာ ၁၁
စစ်ဘေးတိမ်းရှောင်နေရသော သက်ကြီးပိုင်းအဖိုးအဖွားများသည် အအေးဒဏ်မခံနိုင်ခြင်း၊ ရာသီတုပ်ကွေးဖြစ်ပွားခြင်းနှင့် ကျန်းမာရေးစောင့်ရှောက်မှု မရရှိခြင်းတို့ကြောင့် ရှမ်းပြည်တောင်ပိုင်း၊ ပင်လောင်းမြို့နယ်တွင် သေဆုံးမှု များလာကြောင်း စစ်ရှောင်ကူညီသူများထံမှသိရသည်။
စစ်ရှောင်နေရသည့် ကာလအတွင်းတွင် နေစရာ အခက်အခဲရှိသည့်အတွက် မြေကြီးပေါ်အိပ်စက်ရခြင်း၊ အနွေးထည်၊ စောင်နှင့်အမိုးအကာပစ္စည်းများ အရေးပေါ်ဆေးဝါးများ မရှိခြင်းကြောင့် အဖိုးအဖွားတချို့လေဖြတ်ခြင်း၊ လေဖြန်းခြင်း၊ ရာသီတုပ်ကွေးရောဂါများ ဖြစ်ပေါ်နေကြောင်းသိရသည်။
“ဒီပင်လောင်း – ဖယ်ခုံ နယ်စပ်ဆို PNO တွေကစစ်ကြောင်းထိုးလာတော့ စစ်ရှောင်တွေကတစ်နေရာပြီး တစ်နေရာရှောင်ရတယ်။ အခုကအေးတဲ့ရာသီလည်းဖြစ်တယ်၊ မနက်ခင်းလည်း မြူကျ၊နှင်းရည်တွေကျတော့ သက်ကြီးပိုင်းတွေကမခံနိုင်တော့ဘူး။ ဒီတစ်ပတ်အတွင်းဘဲတောင်စလုံးဖက်ပဲကို သေဆုံးတဲ့သက်ကြီးရွယ်အို စစ်ရှောင် ၃ယောက်ရှိတယ်။ သေရေးထက်နေရေးခက်တဲ့ အဖိုးအဖွားတို့ရဲ့ဘဝနေဝင်ချိန်မှာ လူသားဆန်စွာမရှင် သန်ခဲ့ရဘူး။ စိတ်လည်းမကောင်းဖြစ်ရတယ်” ဟု စစ်ရှောင်ကူညီပေးနေသူတစ်ဦးက မဲခေါင်သို့ ပြောသည်။
သက်ကြီးပိုင်းအဖိုးအဖွားများအပြင် ကိုယ်ဝန်ဆောင်မိခင်၊ မွေးကင်းစ လသားအရွယ်ကလေးငယ်များနှင့် ရောဂါအခံရှိသူများအတွက်ဆေးရုံ၊ ဆေးခန်းမသွားနိုင်ခြင်း၊ ကျန်းမာရေး စောင့်ရှောက်မှုမရခြင်း တို့ကြောင့် ကျန်းမာရေး ချွတ်ယွင်းသူ ပိုများလာကြောင်း သိရသည်။
“ကျွန်မတို့က မိုးကာနဲ့ပဲဆိုတော့ နေပူရင်လူကို ပလပ်စတစ်နဲ့ထုပ်ထားသလိုပဲ။ ချမ်းတဲ့အခါလည်း ရေခဲသေတ္တာထဲ နေရသလိုပဲ အရမ်းချမ်းတယ်။ အရမ်းအေးလာတယ်၊ စောင်ကလည်းနည်းတော့ ညဖက်ဆိုအိပ်တောင်မပျော်တော့ဘူး၊ မီးပဲမွေးပြီးမီးလှုံရတာ။ တချို့ဆိုအအေးဒဏ် မခံနိုင်၊ မြေကြီးပေါ်လည်းအိပ်တော့လေဖြန်းသွားတာ၊ ပါစပ်းစောင်းသွားတာ၊ ခြေလက်မသန်တော့တာတို့ဖြစ်တယ်။ ဘယ်လိုအခြေအနေပဲဖြစ်ဖြစ် ကိုယ့်အိမ်ကိုယ်ပဲ ပြန်နေချင်ပါတယ်”ဟု စစ်ဘေးရှောင်တစ်ဦးကပြောသည်။
ပင်လောင်းမြို့နယ်တွင် စစ်ဘေးရှောင် တစ်သောင်းကျော်ရှိပြီး ဖယ်ခုံ – ပင်လောင်းနယ်စပ် တောတောင်ထဲနှင့် ဝါးလီ၊ သဲကုန်း၊ တောင်လေး၊ ထိဗိ၊ ပင်ခွန်၊ စင်းတောင်၊ ဆောင်းခါနှင့် နန်းထာစစ်ဘေးရှောင် စခန်းများတွင် အများဆုံးနေထိုင်ကြကြောင်း သိရသည်။
ပြီးခဲ့သည့် ၂၀၂၄ ခုနှစ်က ပင်လောင်းမြို့နယ်တွင် အအေးဒဏ်မခံနိုင်ခြင်းတို့ကြောင့် အသက် ၆၀ကျော် သက်ကြီးရွယ်အို၊ အဖိုးအဖွားသေဆုံးသူ ၂၀ ကျော်ရှိကြောင်း စစ်ရှောင်ကူညီသူထံမှသိရသည်။
#MeKongNews
#ရှမ်းတောင်
#ပင်လောင်း
#အအေးဒဏ်
#သေဆုံး
